Fluwa kaan 07 -- Anannganman fↄnvᴐ amun!
S’ↄ ti kε e si sran’m be awlabuε’n i tεtrε b’ᴐ ti’n, ↄ nin nyinmuεn nga b’a guε i ase bᴐ kwla ju kε nzue ba dandan mun sa’n, wuun e awlεn’n ↄ ′kpε e klun yε e akunndan’n ᴐ ′sanngan. Sanngε ↄ nin i sᴐ’n ngba’n, Moiz i mmla’n ↄ nin Jasin Fε’n be man e fᴐnnvↄlε yε be uka e aosin sᴐ’n nun. ANANNGANMAN b’ↄ ti aunnvuε sifuε’n, ᴐ fali sunnzunlε ndε mun wlεli i nuan ijↄfuε Ezai nuan : “Sakpa kԑ bla ta kun fa fᴐnvↄ i wa’n, m bᴐbↄ kusu, kԑ n wa fᴐnvↄ amun sᴐ-ↄ” (Ezai 66 : 13). Nyanmiεn tinminfuε’n, ↄ fali bla ta kun i klolε’n nin i wεtεε b’ᴐ ti’n, ↄ fa sunnzunnin i bᴐbↄ i aunnvuε silε’n. Sran ng’ᴐ klo kε ↄ wun Nyanmiεn i fᴐnvↄlε’n i wlε’n, ᴐ kwla nian bla ta kun i wafa ng’ↄ fa luεluε i wa’n.
Kε ᴐ wunnzε’n, i wa’n lε i klun lↄ, ᴐ wu i afε’n nun. I sↄ’n ti, i wa’n ti wunnεn’n i bue kun. Ͻ si kԑ ba sᴐ’n i lika nianlԑ’n ti i junman. Ͻ niԑn i su, ↄ niԑn i lika wia su nin kᴐnguԑ. Kԑ awe kun i’n, ↄ men i like ᴐ di, ↄ wunnzin i kpԑ kaka cԑn ba kun nun, ᴐ fԑ i fa sie i wue nun, ↄ kԑn i nyrun ngowa, ᴐ kan ndԑ kle i kannzε ↄ si’a ijᴐ’n. Ͻ yaci’ԑ i wa’n i ngunmin le, yԑlԑ kԑ Nyanmiԑn yԑ ↄ faa ba sᴐ’n wlԑli i sa nun kԑ ↄ niԑn i lika-ᴐ. Bla ta kun yi i klolԑ nin i aklunye’n nglo i wa’n i lika.
Kԑ ↄ ′nyin’n, ᴐ to tralԑ nin ngbabua mԑn i, ↄ wunnzin i, ᴐ yo i sua ba’n nun saun, ↄ wlԑ i suklu ng’ᴐ ti kpa’n nun. Kԑ ↄ fin suklu ba’n, ᴐ kle i like yԑ ↄ ukԑ i i junman’m be nun. Sԑ i wa’n yo nyin kekle’n, ᴐ ijↄԑ, ᴐ tu i fↄ, afin kԑ ba sↄ’n ′nyin’n, ᴐ klo kԑ man i nantilԑ’n yo seiin. Ͻ mεn i afᴐtuε kε ↄ ‵niεn i wun su asra tεtε, nin bla kunndεlε, nin wawε tεtε, nin bae dilε’n be lika. Janvuε kpakpa mun yε ᴐ klo kε i wa’n nin be nanti-ↄ. I bᴐbↄ ti nzᴐliε kpa i wa’n i nyrun.
Ba’n si kԑ kannzԑ ↄ yoo sa wie bᴐbↄ’n, sanngԑ ᴐ kwla wlu awlo lↄ. Ͻ kԑn i afԑ mun kle i nin yԑ ᴐ sie i su tie ndԑ ng’ↄ kan’n yԑ ᴐ fa sie i klun. Ͻ kan su lafilԑ ndԑ kle i wa’n yԑ ↄ kan Nyanmiԑn i dan b’ᴐ ti’n i ndԑ kle i. Bla ta’n si’a afԑ.
Nyanmiԑn i fↄnvᴐlԑ b’ↄ ti wԑtԑԑ
Bla ta kun i klolԑ ng’ↄ yi i nglo’n, i aunnvuԑ silԑ’n, i klun ng’ᴐ tu’n nin i awlԑn tralԑ’n, ninnge sↄ mun be ti Nyanmiԑn i klolԑ’n nin i fᴐnvↄlԑ’n be nzᴐliԑ. Be kwlaa nga be kpԑ be nyin Nyanmiԑn wun’n, ↄ yi i klun ufue dan’n i nglo be lika. Ͻ gua e awlԑ su nzue se kԑ : “M bᴐbↄ min yԑ n fᴐnvↄ amun-ᴐn” (Ezai 51: 12). Nyanmiԑn b’ↄ yili ninnge kwlaa, b’ᴐ ti ninnge kwlaa be Min’n, ↄ kan kleli i nuan ijᴐfuԑ’n nin i nvle’n, ↄ jrannin su kpa kԑ kannzԑ be tra be lomuԑn’n i bᴐbↄ ᴐ ′fↄnvᴐ be yԑ ↄ ′uka be, sԑ be kpԑ be nyin i wun’n nan be kan be wun ase i klun sa’n i bo’n. Nyanmiԑn bᴐ kwla like’n kwlaa yo’n, ↄ klo kԑ ᴐ uka e yԑ ↄ fᴐnvↄ e. I sᴐ’n ti sԑ afԑ wie o amun su’n, nán amun fia su, sanngԑ an kan kle e Min’n yԑ amun ′wun kԑ ↄ kwla yo sa dandan man amun blԑ bᴐ an fa amun wla’n kwlaa guԑ i su’n.
Kԑ Nyanmiԑn yili e’n, ↄ mannin e nguan nin fanngan, ᴐ nin ngwlԑlԑ, ↄ nin akpue, ᴐ nin akunndan, ↄ nin wunnԑn nin wawԑ. E ti-man kԑ yԑbuԑ bᴐ be kwla tu-man be wun bo’n sa, annzԑ kԑ waka bↄ be ti-man sa’n sa. Sanngԑ ᴐ yili e sran, ↄ mannin e awlԑn kun, ᴐ man e kwla yo like nga e klo’n, ↄ mannin e ngwlԑlԑ ᴐ nin sa wlԑ wunlԑ. I b’ↄ si sa’n kwlaa’n, ᴐ si ye cԑlԑ mun, ↄ nin ye fakafaka lika’n. Ͻ si sa’n nga be wa ju e nguan’n nun cԑn wie lele’n, yԑ ᴐ si sa kpakpa ng’ↄ dun mmua siesieli kԑ e yo be’n (Efԑzfuԑ mun 2 : 10). Ͻ lԑ jajalԑ seiin kun amun nguan’n su, i kpa’n, ᴐ kwla nian amun lika kpa tra amun si nin amun nin mun. Like ng’ↄ ti kpa tra su’n, i yԑ ᴐ klo kԑ ↄ yo man amun titi-ᴐ.
Ͻ yaci-man wↄ ngunmin, sԑ srԑ kun wᴐ’n, ↄ nin wᴐ be o nun, sԑ ↄ nyrun yo wᴐ koun’n, ↄ nin wᴐ o nun, sԑ a wun-man sa fi yowlԑ’n, ↄ nin wᴐ o nun yԑ ↄ kle amun Nyanmiԑn srԑlԑ : “Man ye aliԑ ng’ᴐ ju ye ndԑ’n” (Matie 6 : 11). Nán amun wla fi su kԑ ↄ dun mmua tikeli like klelԑ’n i atin i sin nan b’a wu amun. Ͻ si bla annzԑ bian nga ng’ᴐ nin wↄ fata’n i sin nan a nin i b’a yia nun. Ͻ nian amun su yԑ ᴐ sasa amun Satan i lakalԑ’n nin i gblԑ’n be lika. An yo ngwlԑlԑfuԑ yԑ an fa amun wun man Nyanmiԑn b’ↄ ti amun si’n, k’ᴐ yo nan ↄ’a kwla tinngԑ amun kpa’n ti.
Mԑn’n i sacilԑ bᴐ ↄ’a saci’n ti’n, san Nyanmiԑn ′di sran’m be jᴐlԑ. I bↄ fiԑn kaan sa nu’ԑn i wun’n, ᴐ’a nunnun-man e sa tԑ yofuԑ mun, sanngԑ ↄ sunmannin Mari i wa yasua’n kԑ ᴐ bla nan ↄ wa siesie i nin ye e afiԑn. Ͻ su flԑ sran’n kwlaa kԑ be kaci bé nzuԑn’n nan be blԑ i sin nan be kplin sa nga Krist yoli b’ᴐ tu mԑn’n i sa tԑ’n su.
Afin Nyanmiԑn kloli mԑn’n lele ↄ fԑ i wa kunngba cԑ’n mannin nan sran kwlaa ng’ᴐ lafi i su’n ↄ’a mlin-man sangԑ ᴐ ‵nyan anannganman nguan (Zan 3 : 15 – 16).
Kԑ bla ta kun nunnun i wa’n wun kpԑ kpanngban cԑn ba kun nun’n, i kunngba nin-ↄn, Nyanmiԑn bↄ fiԑn kaan sa nu’ԑn i wun’n, ᴐ klo kԑ ↄ ′tu e nun fiԑn’n kwlaa, ᴐ ′yo e saun yԑ ↄ ′bo e uflԑ. I b’ᴐ ti aunnvuԑ sifuԑ nin aklunyefuԑ’n, ↄ klo kԑ ᴐ uka amun, kannzԑ blԑ’n ti kekle amun sa nun’n. I wun ti siesiewa kԑ ↄ yaci amun sa tԑ’n cԑ amun, kannzԑ ᴐ ti fiawa bↄbᴐ’n, sԑ amun di be nanwlԑ kle i’n, ↄ yaci be cԑ amun. Ͻ klo amun, ↄ klo kԑ ᴐ nin amun koko yalԑ, ↄ su minndԑ amun. ? Blԑ onin yԑ amun wun i wlԑ kԑ ᴐ klo amun bↄ amun lԑ i ase, bↄ amun kan amun klun ndԑ kle i, bↄ amun kan amun wun ase i klun sa’n i bo-ↄ ? Sԑ amun bԑ i sin’n, ᴐ ′trԑ i sa’n nun ↄ ′sᴐ amun nun.
I b’ↄ o nglo mmua kpa lↄ’n, i jajalԑ’n ᴐ kↄ mmua kpa. Ͻ klo kԑ ᴐ fa amun yo i klun mma mun. Ͻ klo kԑ i Wawԑ’n ‵yi amun k’ↄ yo nan amu’an kaci i wawԑ nun ba yasua nin ba bla wie’n ti. Ͻ klo kԑ ᴐ man amun wunnԑn b’ↄ wu’n, i nguan b’ᴐ wie-man. An blԑ i sin, an kunndԑ i yԑ amun ′wun i afin ↄ boli kasiԑ see kԑ: “Sԑ amun tu amun klun kunndԑ min’n, amun ′wun min” (Zeremi 29: 13).
Krist i sran fↄnvᴐlԑ’n
“Be nga bé wla a bo’n, be liԑ su ti ye afin Nyanmiԑn wa fᴐnvↄ be” (Matie 5: 4). Krist bali e afԑ mԑn nun nin i klolԑ ᴐ nin i aunnvuԑ silԑ b’ↄ lԑ-man wunsu’n. Ͻ si afԑfuԑ’m be aunvuԑ afin be ti kԑ bua bᴐ be lԑ-man su nianfuԑ’n sa (Matie 9 : 36). Ͻ flԑli i sↄnnzᴐnfuԑ mun kԑ be su i su, sanngԑ ↄ’a mianmian-man be. I yԑ ᴐ ti bé nzↄliԑ kpa’n nin-ᴐn. Ͻ tinngԑ be wԑtԑԑ su. Kԑ Zan nin i niaan bian be klo kԑ be srԑ Nyanmiԑn nan sin’n fin nglo lↄ yra be bᴐ b’a sↄ-man Zezi nin i sᴐnnzↄnfuԑ’m be nun’n, ᴐ ijↄli be se kԑ: “An si-man akunndan nga an bu’n, afin m bᴐ n kacili sran’n m’an ba-man kԑ sran’m be sacilԑ, be delԑ ti yԑ m bali-ↄ” (Lik 9: 55).
Zezi seli Piԑr kԑ ↄ wa se kԑ ↄ si-mԑn i sↄ kpԑ nsan. Kԑ piԑr Sali Zezi wieli’n, ᴐ sunnin yԑlԑ kԑ i awlԑn’n kpԑli i klun. Kԑ Mari i wa yasua’n cԑnnin’n, ↄ ᴐli Piԑr wun lↄ, ᴐ yacili i tԑ’n cԑli i yԑ ↄ fᴐnvↄli i nan ᴐ’a se i kԑ ↄ su i su ekun.
Kԑ Zida to i sa yili Zezi i kᴐmi b’ↄ fԑ mannin i kpᴐfuԑ mun’n, Zezi ↄ’a bo-mԑn i sannzan, ᴐ’a ijↄ-mԑn i, sanngԑ ᴐ usԑli i kԑ : “ ? A ′to ↄ sa yi m bᴐ n kaci sran’n n kↄmi yԑ a ′fa min man sran mun-ᴐn ? ” (Lik 22 : 48 ; Matie 26 : 50).
Zezi nun yԑ Nyanmiԑn i klolԑ’n yi i wun nglo-ↄ. Ͻ yoli aunnvuԑ sifuԑ kԑ i si b’ᴐ o Nyanmiԑn su lↄ’n sa (Lik 6 : 36). Sran ng’ᴐ yoli be juejue’n, ↄ yi i nglo weiin kpa kԑ ᴐ si yalԑfuԑ mun ↄ nin tukpacԑfuԑ’m be aunnvuԑ. Kԑ ᴐ wunnin angbeti bla bↄ be su kᴐ i wa yasua kunngba’n i sielԑ’n, ↄ jrannin sran mun, ᴐ cԑnnin ba’n nan ↄ’a fԑ i a mԑn i nin.
Kokowefuԑ blu bᴐ be kwla fa-man be wun mantan-man sran nga mun’n, be tili kԑ Zezi su sin lԑ. Be flԑli yԑ be srԑli kԑ ↄ yo be juejue. Ͻ’a fuan-man be sanngԑ ᴐ yoli be juejue nin i nuan ndԑ bↄ kwlalԑ o nun’n. Kԑ ᴐ nin sran bↄ musu’m be sacili i’n yiali nun’n, wawԑ tԑtԑ sᴐ mun be kpannin kekle kpa yԑlԑ kԑ be si kԑ be liԑ a wie. Zezi a wanndi-man be nyrun, sanngԑ ↄ deli sran sᴐ’n musu’m be sa nun ↄ nin i nuan ndԑ bᴐ lԑ kwlalԑ’n.
Zezi jrannin anngban’n ng’ↄ kpԑ fԑtԑ’n su’n ᴐ man i sᴐnnzᴐnfuԑ’m b’a mlↄn-man. Ͻ fali kpaun nnun nin kpatra nnyↄn tali sran akpi nnun bↄ awe kunnin be’n. Ͻ yacili bubuwafuԑ bᴐ be fԑ fuli sua’n su be jrԑ i wun lↄ’n i sa tԑtԑ mun cԑli i. Ͻ yrali ba kanngan’m be nguan yԑ ᴐ wlali Lazar i nian bla’n i fanngan se kԑ : “ ? M’an se-man wↄ kԑ sԑ a lafi n su a ′wun kԑ Nyanmiԑn ti kpli ? ” (Zan11 : 40).
Zezi klo sran’m be kwlaa, ↄ wie i kpᴐfuԑ mun bↄbᴐ ↄ klo be. Ͻ si kԑ sran’m be ti sa tԑ yofuԑ nan be kwla de-man be bᴐbↄ be wun. Ͻ suali mԑnfuԑ’n kwlaa be sa tԑ’n, ᴐ tuli be sa tԑ’n, afin ↄ jrannin be ajalԑ nun ᴐ wuli kɛ Nyanmiԑn nuan ijↄfuԑ Ezai boli i kasiԑ’n sa : “Sanngԑ kusu wuun e tukpacɛ’n yɛ ɔ fa suali-ɔ, yɛ e afɛ’n yɛ ɔ fali-ɔ. E liɛ’n e waan wuun Nyanmiɛn su tu i fɔ, e waan wuun ɔ su kle i nyrɛnnɛn, yɛ e waan wuun ɔ su guɛ i nyin ase. Sanngɛ e sa tɛ bɔ e yo be’n, be ti yɛ ɔ nyannin kannin mɔnnɛn-mɔnnɛn i wunnɛn’n su-ɔ. E fɔnlɛ bɔ e fɔn’n, i ti yɛ be sisili i wunnɛn nin-ɔn. E fɔ b’ɔ fata kɛ be tu ye nan y’a nyan aunnjuɛ’n, yɛ ɔ tɔli i su-ɔ. Yɛ i wunnɛn i susuwa’n nin i kannin mun be ti yɛ man e yo juejue-ɔ. E kwlaa e ti kɛ bua bɔ b’a bo je’n sa, sran kun fɛ i bɔbɔ klun klo atin, yɛ Anannganman’n fali e kwlaa e fɔnlɛ bɔ e fɔnnin’n i su afɛ’n fa guɛli i su-ɔ” (Ezai 53: 4-6).
Mari i wa yasua’n ᴐ guali klↄ sran’m be ti kpᴐlԑ junman’n i bo. Ͻ fali i sԑsԑ yolԑ’n mannin sran nga be lafi i su mun, ᴐ man Nyanmiԑn nyrun’n be ti sran kpa. Ͻ kpↄli e ti afin ᴐ wuli e sa tԑ’m be ti, ↄ man e o be bᴐ Nyanmiԑn fԑ i fↄnvᴐlԑ wawԑ’n man be’n be nun wie.
Nyanmiԑn Wawԑ’n tↄli Krist i sᴐnnzᴐnfuԑ’m be su
Sran kwlaa ng’ↄ tike i awlԑn’n su b’ᴐ sↄ Nyanmiԑn i klolԑ nin i aunnvuԑ silԑ b’ᴐ man ↄ tu e sa tԑ mun’n nun’n, ᴐ nyan Nyanmiԑn Wawԑ b’ↄ fᴐnvↄ sran’n, b’ᴐ ti nanwlԑ wawԑ’n. I sin nan ↄ’a wu’n, Zezi boli kasiԑ kleli i sᴐnnzↄnfuԑ mun, ᴐ seli kԑ : “N ′ko srԑ e Si’n, yԑ ↄ ′blԑ amun sran uflԑ b’ᴐ ′uka amun, yԑlԑ Nyanmiԑn Wawԑ’n b’ↄ ti nanwlԑfuԑ’n, ᴐ nin amun ′tran titi. Mԑn nunfuԑ’m be kwla nyԑn-mԑn i, yԑlԑ kԑ be wun-mԑn i, yԑ be si-mԑn i, sanngԑ amun liԑ’n, an si i, afin ↄ nin amun yԑ ᴐ ′tran-ↄn, yԑ ᴐ wa tran amun awlԑn’n nun” (Zan 14 : 16 – 26 ; 15 : 26-27 ; 16 : 7 – 14). Fↄnvᴐlԑ wawԑ’n i yԑ ↄ ti kasiԑ dan bᴐ e Si’n boli-ↄ. Sran kwlaa ng’ᴐ srԑ i Wawԑ’n, Krist dunman nun’n, Nyanmiԑn ′fa mԑn i (Lik 11 : 13).
Nyanmiԑn Wawԑ’n yԑ ↄ yi nanwlԑ ng’ᴐ fata kԑ e si i Nyanmiԑn b’ↄ ti e wawԑ nun siԑ’n su’n, ᴐ nin e bↄbↄ e su ᴐ nin sa nga be wa ju cԑn wie lele’n, i nglo kle e-ↄ. Ͻ tike e awlԑn’n i nyima Nyanmiԑn i ndԑ b’ᴐ ti nanwlԑ’n su. Ͻ yo man e su lafilԑ’n jran kekle yԑ ↄ man e sunnzunlԑ b’ᴐ wie-man. I yԑ ↄ ti e ti ndԑ kanfuԑ jᴐlԑ dilԑ cԑn’n nun-ↄn, i yԑ ᴐ ti e fↄnvᴐfuԑ-ↄ blԑ nga e akunndan’n bu e fↄ’n.
Nanwlԑ wawԑ’n, ᴐ tinngԑ e blԑ’n kwlaa nun e nguan’n nun kԑ sunmanfuԑ Pↄl kannin’n sa : “Be kwlaa nga Nyanmiԑn Wawԑ’n tinngԑ be’n, be ti Nyanmiԑn wa” (Rᴐmfuԑ mun 8 : 14).
Fↄnvᴐlԑ wawԑ’n ↄ uka e blԑ kekle’n nun, blԑ bᴐ e wu’an sa ng’ↄ ti ᴐ e yo’n, ↄ uka e, blԑ bᴐ like nga e yo’n saci’n, ᴐ uka e, ↄ man e silԑ jrԑiin kpa b’ᴐ man e wla’n gua ase yԑ ↄ man e alaje, ᴐ sasa e sa kekle’n i lika yԑ ↄ de e wie’n i aya’n nun. Nyanmiԑn Wawԑ’n ᴐ uka e man e kpↄ sa tԑ yԑ e kwla sa tԑ’n yԑ e nanti ngwlԑlԑ su. Nyanmiԑn Wawԑ’n ti saun. Ͻ klo kԑ ᴐ yo e saun yԑ ᴐ yo man e wun e sa tԑ’m be wlԑ yԑ e di be nanwlԑ kle Nyanmiԑn yɛ e nanti nanwlԑ nun, saun yolԑ’n nun ↄ nin afiԑn siesielԑ’n nun.
Wawԑ saun b’ᴐ ti Fↄnvᴐfuԑ’n, ↄ manman-man i bᴐbↄ wun, sanngԑ ᴐ manman Mari i wa yasua’n b’ↄ ti e ti kpᴐfuԑ’n, yԑ ↄ uka e man e wun sa nga be ti i klolԑ’n i nzᴐliԑ’n be wlԑ. Nyanmiԑn Wawԑ b’ↄ yi anannganman nguan b’ᴐ o Krist nun’n i nglo’n, i kunngba’n yԑ ↄ yi kwlalԑ b’ᴐ o Krist nun’n i nglo-ↄ. Anannganman nguan’n ᴐ nin Nyanmiԑn i kwlalԑ’n be su wie-man le. Kԑ bↄ ᴐ tran e nun titi’n ti’n, ↄ fᴐnvↄ e yԑ ᴐ man e kwlalԑ wie’n su i nguan b’ↄ o e nun’n ti.
Fↄnvᴐlԑ wawԑ sᴐ’n ↄ tran Zezi i sᴐnnzᴐnfuԑ’m be nun afin be lafi sran’m be ti kpᴐlԑ junman ng’ↄ dili’n su. Wawԑ sᴐ’n kaci sran’m be nzuԑn’n ᴐ man Nyanmiԑn i klolԑ’n ↄ nin i kpa yolԑ’n ᴐ nin i klun ufue’n be yi be wun nglo sran mun be awlԑn’n nun. Fↄnvᴐfuԑ sↄ’n ᴐ uka e Jasin Fԑ’n i bolԑ’n nun ↄ nin afԑfuԑ’m be ukalԑ’n nun. Ͻ su e bo man e to Nyanmiԑn i ayԑ yilԑ ᴐ nin i wun ye silԑ jue mun. Fↄnnvᴐfuԑ b’ↄ ti aunnvuԑ sifuԑ’n, ᴐ klo kԑ ↄ fa e kaci sran’m be fᴐnnvↄfuԑ kԑ sunmanfuԑ Pᴐl kannin sa: “E Min Zezi-Krist i si Nyanmiԑn kwla o! Ͻ ti e si, ↄ si aunnvuԑ, ᴐ ti Nyanmiԑn kun b’ↄ jran é sin sa’n kwlaa nun. Sa’n kwlaa b’ᴐ tↄ e su’n, i yԑ ᴐ fↄnnvᴐ ye-ↄ, e kusu e fa fᴐnvᴐ wie mun sa kwlaa b’ↄ tᴐ bé su’n i nun!” (2 Korԑnt 1: 3 – 4). Nyanmiԑn Wawԑ’n ka-man lԑ be ja osu kunngba’n nun’n ↄ kaci-man sa nga be ju e su’n. Sanngԑ ᴐ dun mmua kaci e awlԑn’n e ti bↄ Krist kpᴐli’n ti. E awlԑn’n i wun blibli i, i konvi sↄ e Defuԑ’n afin ᴐ klo e i bo bolԑ’n nun. I Jasin Fԑ’n nun yԑ ↄ fԑ i kwlalԑ b’ᴐ o i ye yolԑ’n nun’n, ↄ man ye-ᴐ. Sran kwlaa ng’ↄ kanngan Krist i ndԑ’n b’ᴐ fa sie, b’ↄ di su’n, ᴐ ′nyan su yralԑ yԑ ↄ ′di aklunnjuԑ.
? Amun nyannin Nyanmiԑn i fᴐnvↄlԑ’n? Sԑ an klo kԑ an suan fᴐnvↄlԑ Wawԑ’n i wun ndԑ uflԑ’n, e ′fa Krist i Jasin Fԑ’n, ↄ nin Nyanmiԑn ndԑ’n i wun akunndan bulԑ fluwa wie mun, ᴐ nin srԑlԑ wie mun, ′blԑ amun ngbԑnn k’ᴐ yo nan amu’an nyan alaje aosin nun’n ti.
An fↄnvᴐ be nga be sin yia amun : Sԑ fluwa nga mannin amun sunnzunlԑ uflԑ’n, an fa cԑ be nga be su kunndԑ alaje dilԑ ng’ↄ o Nyanmiԑn nun’n, k’ᴐ yo nan be kusu b’a kwla nyan fↄnvᴐlԑ wie’n ti. Fluwa nga an klo kԑ an fa cԑ sran mun, an bo i nuan kle ye. An klԑ amun adrԑsi’n i weiin kpa.
WATERS OF LIFE
P.O. BOX 60 05 13
70305 STUTTGART
GERMANY
Internet: www.waters-of-life.net
Internet: www.waters-of-life.org
e-mail: info@waters-of-life.net