Waters of Life

Biblical Studies in Multiple Languages

Search in "Baoule":
Home -- Baoule -- The Ten Commandments -- 04 Second Commandment: Do Not Make Idols
This page in: -- Afrikaans -- Arabic -- Armenian -- Azeri -- -- BAOULE -- Bengali -- Bulgarian -- Cebuano -- Chinese -- English -- Farsi -- Finnish? -- French -- German -- Gujarati -- Hebrew -- Hindi -- Hungarian? -- Indonesian -- Kiswahili -- Malayalam? -- Norwegian -- Polish -- Russian -- Serbian -- Spanish -- Tamil -- Turkish -- Twi -- Ukrainian? -- Urdu? -- Uzbek -- Yiddish -- Yoruba

Previous Lesson -- Next Lesson

Ndԑ’n i ti’n 6: NYANMIƐN MMLA BLU - AWA KUN B’Ɔ SASA SRAN SA TƐ’N I LIKA
Wafa nga Jasin Fԑ’n b’ͻ ti kpajalԑ’n ͻ yiyi Mmla blu b’ͻ o Egypt lͻ Tulԑ ndԑ tre 20 nun’n

04 - MMLA NNYƆN SU: Nán yo amuɛn fi



EZIPT LƆ TULƐ'N 20:4-6
" Nán yo amuɛn fi, nán yo like wie fi b'ɔ fa nglo lɔ like, annzɛ asiԑ’n su wa like, annzɛ b'ɔ fa nzue b'ɔ o asiԑ’n i bo lↄ’n i nun like. 5Nán koto bé bo, nán su be, afin n ti Anannganman ɔ Nyanmiɛn yɛ n si kwla. Sɛ sran kun jaso mín wun'n, n tu i fɔ, n tu i nin i mma mun be fɔ lele n fa wlu i anunman'm be mma liɛ'm be nun. 6Sanngɛ sran nga be klo min'n, bɔ be fa min ndɛ'm bé su'n, n klo be lele n fa wlu be anunman'm be mma liɛ'm be nun lele ju be akpasua akpi su"

Mmla nnyͻn su’n ͻ uka mmla klikli’n i nun yiyilԑ’n su. I sͻ’n ti kristfuԑ wie’m be bu i kԑ ͻ nin mmla klikli’n be ti kun. Be nga be yiyi Nyanmiԑn ndԑ’n nun’n, be kpanngban kpa be waan mmla nnyͻn su’n i wlԑ wunlԑ yo ya.


04.1 - Be kplin-man waka sran nga kristfuԑ’m be sԑ be’n nin bé nzͻliԑ’m be su

Nyanmiԑn flԑfuԑ mun nin Zuif mun be jao kristfuԑ kpanngban bé wun yԑ be ijͻ be fianfian kԑ be ‵fͻn Nyanmiԑn bͻ o nglo mmua kpa lͻ’n i mmla nnyↄn su’n. Be kan e wun ndԑ se kԑ : "Amun yԑ an saci mmla’n i nun cinnjin kpa’n nin-ͻn. An sԑ waka sran bͻ be ti Nyanmiԑn bͻ kwla like kwlaa yo’n i nzᴐliԑ’n, an kan bé ayre yԑ like nga an kpԑ amun ti nun yoli i sͻ’n, a fa kle sran mun". Mmla nnyↄn su’n i su falԑ’n ͻ kacili sannganlԑ dan kpa asͻnun akpasua kpanngban bé afiԑn. Asͻnunfuԑ wie mun be ko kpԑli bé asͻnun liԑ kpԑkun be wͻli waka sran’m be nun ͻ nin nzͻliԑ kwlaa nga be fa be sie asͻnun sua’n nun laa mun. E wun i wlԑ kԑ e kwla yi-man Nyanmiԑn i anyrunnyan’n i nglo fluwa su. Nzͻliԑ kwlaa nga be yo’n, sԑ fluwa su o, sԑ waka sran nun o, ͻ ti Nyanmiԑn i sͻnnzͻnlԑ nin i famiԑn dilԑ’n i nzowa kpԑlԑ. Sran nga be wuli’n annzԑ anz mun bé nzͻliԑ nga sran’m be yo bé fluwa su’n, be ti ninnge bͻ be lԑ-man nyrun. Nyanmiԑn i wafa ng’ͻ ti’n, ͻ ti sͻ tra su ͻ man klͻ sran’n i akunndan’n ͻ kwla yi-mԑn i nglo, i nzuԑn’n nin klͻ sran liԑ’n ti’a kun, ͻ kwla like’n kwlaa yo. I nzͻliԑ nga sran’m be yi i fluwa su’n annzԑ waka sran nun’n, ͻ nin i kwlalԑ’n sԑ-man le, be kwla fa sunnzun-mԑn i. Be kwlaa nga bé sa ti klԑklԑ kpa bͻ be yo nzͻliԑ kpakpa mun fluwa su, kԑ bian nga be flԑ i Michԑl Anz sa’n, be kwla fa-man bé sa nuan ninnge wie fi sunnzun-man Nyanmiԑn i wafa ng’ͻ ti’n.

Nyanmiԑn nuan ndԑ fluwa nun’n, Nyanmiԑn yili i wun nglo kleli sran mun wafa nnyↄn nun : i klikli su’n, ͻ ijͻli, ͻ kan ndԑ kleli sran ng’ͻ kpԑli i’n, yԑ i nnyↄn su’n, ͻ yili i wun nglo laliԑ nun annzԑ aolia nun kle sran i nuan ijͻfuԑ’n. Anuansԑ Laa nun’n, blԑ sunman nun ͻ yi i wun nglo i ndԑ bͻ kwlalԑ o nun’n nun tra aolia nun annzԑ laliԑ nun. Kԑ Nyanmiԑn i Wa Yasua’n i anyrunnyan’n yili i wun nglo i sunmanfuԑ’m bé nyrun’n, be tͻli asiԑ wun nan b’a kaci kԑ sran bͻ b’a wu’n sa, afin i nzuԑn bͻ nin klͻ sran liԑ’n ti’a kun’n, ͻ yili i wun nglo weiin yԑ ͻ buli bé fiԑn’n kwlaa ng’ͻ o bé nun’n i fͻ. Sran nga Nyanmiԑn yi i wun nglo kle i laliԑ nun annzԑ aolia nun’n, ͻ kwla kan-man i wafa kwlaa ng’ͻ ti’n i wun ndԑ. Ɔ kwla kԑn i ndԑ kԑ like wie bͻ sin bé nyinma su’n sa.


04.2 - Man e nin amuin solԑ nin nzͻliԑ nga sran’m be yi be fluwa su, annzԑ talԑ wun’n, e kun

Sԑ e bu mmla nnyↄn su’n i akunndan kpa’n, e wun i wlԑ kԑ Nyanmiԑn tanninnin waka sran’m bé sԑlԑ’n i atin yԑ i kunngba’n wla e su nun kpa amuin sͻlԑ’n i wafa’n kwlaa i lika. Be nga be koto ninnge uflԑ’m be bo, bͻ be su nyanmiԑn uflԑ mun, sԑ waka sran o, annzԑ sԑ like wie bͻ be sԑli be nin o, be kwlaa sͻ’n, Nyanmiԑn i ya’n wo be su.

Anuansԑ Laa’n nun’n, be sԑ waka sran dandan bͻ be ti nglonglo kpa’n, be sie be oka’m bé ti’m be su. Be kplan be yԑbuԑ nun, yԑ sran mun be koto bé bo be sͻ be sran’n kwlaa bé nyrun. I sͻ waka sran sͻ mun be o sran wie’m bé sua’m be nun yԑ be koto bé bo be su be-ͻ. Wie ti waka nun, wie ti yɛbuɛԑ nun, wie ti sika ͻkwlԑ annzԑ jԑtԑ ufue nun. Be kwlaa nga be lafi-man Nyanmiԑn kpafuԑ’n su’n, be ‵kԑn i bo bé anwlԑn’n nun, yԑ wawԑ tԑtԑ mun be kan bé wun ndԑndԑ kpa be wlu bé anwlԑn’n nun. Zezi blԑ su’n, Grԑk mun be wu blibli be bé amuin mun be lika yԑ be fa bé wun wlԑ bla nin bian kunndԑlԑ’n nun. Laa’n Egyptfuԑ mun nin Asirifuԑ mun nin Babilͻnfuԑ mun be yo sa kunngba sͻ’n. I sͻ’n ti yԑ Moiz nin Nyanmiԑn nuan ijͻfuԑ mun be jaoli bé amuin’m bé sͻlԑ’n be wun bͻ be nin be kunnin kekleke kpa nin-ͻn. Kԑ e se yԑ’n, e kwla wun amuin sͻ’n bͻ be boli be sannzan laa’n, b’a fa be a sie lika nga be sie bé lalafuԑ ninnge’m be lͻ’n, Kԑr lͻ, Bagdad lͻ yԑ Bԑrut lͻ, sran’m be kͻ bé nianlԑ. Ɔ yo sran’m be nyԑnmԑn. Be tannin loto kpa, be fin mmua be kͻ ninnge sͻ’m bé nianlԑ. Bé ja bo’n ͻ’a wiewie atin ng’ͻ kͻ lika sͻ’m bé nun’n ͻ nin famiԑn mun be asieliԑ mun. Sa nga Grԑk mun nin Egyptfuԑ mun be yoli i laa’n, ͻ de suԑn. Sran mun be klo kԑ be yo nan be wun nvialiԑ nun ninnge mun. Nyanmiԑn Ndԑ’n ju-man be. Like nga be wun i’n, ͻ lo be tra ndԑ nga be ti’n. Be kwla wun-man nvialiԑ nun ninnge’m bé wlԑ. I sͻ’n ti televiziͻn nianlԑ’n ͻ’a kaci lakalԑ like be kwlaa nga be waan be di mmla nnyͻn su’n su’n, be sa nun.


04.3 - Nzͻliԑ nga Zuif mun be nin nyanmiԑn flԑfuԑ mun be tannin bé atin’n

Nvle nga nyanmiԑn flԑfuԑ mun yԑ be tinngԑ’n, be tannin waka sran mun nin nzͻliԑ nga be yo be fluwa su mun. Sanngԑ ͻ nin i sͻ ngba’n, be nian ninnge sͻ mun televiziͻn nun, fluwa nga be klԑ be’n be nun yԑ be di su aklunnjuԑ. I afuԑ akpi-kun-afuԑ-ya-nsan-ablenun yԑ, kԑ be tanninnin ninnge sͻ mun bé atin’n. Mmla sͻ’n ti yԑ Arab mun be yo be sa ti like nga be fa yo sua nun klanman nin-ͻn. I sͻ tapi nin rido nglanman mun be o lika’n kwlaa Arabi saudit lͻ bé nyanmiԑn flԑwlԑ’m be nun, marͻk lͻ sua dandan’m be nun nin sran ble nvle’n i ja ngua lͻ (Afrique du Sud). Mmla nnyↄn su’n i su dilԑ’n ͻ o bé nzuԑn’n nun, be kan be sua’m bé ayre nin waka nyrԑ mun bé nzͻliԑ. Be yo i sͻ fluwa su, waka nun nin blalԑ nun. Mԑn wunmuan’n nun’n, sran mun be klo bé tapi mun nin nzͻliԑ nglanman ng’ͻ o bé su’n. Wie mun be yi nyanmiԑn famiԑn diwlԑ’n nin tro fie mun.

Arabi saudit lͻ kponngbo bue nga be o akpͻ’m be su bͻ be kle lika nga be nga be nanti bé ja mun be sin’n, sran nzͻliԑ o be su sanngԑ sran sͻ mun be lԑ-man ti. Lele ndԑ be nian mԑn-mԑn i wun atin kԑ be fa ti sԑ sie sran nzͻliԑ sͻ’m be su. Sanngԑ nyanmiԑn flԑfuԑ nga be o turki nin Ɛndi lͻ’n, be di’a mmla kekleekle sͻ’m be su kannzԑ bͻ be fin bé fluwa’n nun’n. Be yoli Mahome nin anz Gabriԑl bé nzᴐliԑ’n bͻbͻ. Sanngԑ wuun i sͻ’n ti mmla’n i fͻnlԑ nyanmiԑn flԑfuԑ nga be o Arabi lͻ’n be lika. Ɔ nian cԑ-man ngboko, Arab klͻ kun su’n, be yili flimun kun Mahome su sanngԑ be kle-mԑn i nyrun lika’n. Be yoli flimun sͻ’n kԑ Mahome bͻbͻ yԑ ͻ o lԑ-ͻ, nan ͻ wun sa nga be ju mun sa, yԑ i bͻbͻ i aniԑn’n yԑ ͻ fa ijͻ flimun’n nun-ͻn. Sanngԑ be kle-mԑn i bͻbͻ ba’n. Kristfuԑ nga be yi flimun kԑ be fa bo jasin kle nyanmiԑn flԑfuԑ mun’n, ͻ fata kԑ be bu sa sͻ’n i akunndan, kԑ be yi flimun nyanmiԑn nuan ijͻfuԑ mun annzԑ anz mun annzԑ Krist su’n.

Zuif mun be dili mmla nnyↄn su’n i su kpa yԑlԑ kԑ b’a yo-man Nyanmiԑn i nzͻliԑ wie fi waka nun o, annzԑ sika okwlԑ nun o, annzԑ blalԑ nun o. Kԑ Tit bͻ ti Rͻmfuԑ mun bé sonja’m su kpԑn’n ͻ fali Zerizalԑm klͻ’n, kԑ be wuli Zezi i afuԑ ableso su’n, ͻ wluli nyanmiԑn sua’n nun lͻ, ͻ wluli lika saun kpa’n nun lͻ afin ͻ bu i kԑ ͻ wa nyan sika okwlԑ waka sran wie annzԑ ninnge kpakpa wie mun lͻ sanngԑ ͻ’a nyan-man like fi yԑlԑ kԑ Nyanmiԑn ti aolia nun sran, ͻ ti-man like bͻ be sa kwla kԑn i-ͻ, ͻ ti’a waka sran bͻ be kwla sie lika kun-ͻn.


04.4 - ? Krist i nzͻliԑ nga sran’m be yo be’n, ͻ ti fͻnlԑ nyanmiԑn ndԑ’n i wun ?

Wafa nga kristfuԑ mun be fa yiyi mmla nnyↄn su’n nun’n, ͻ nin Zuif mun nin nyanmiԑn flԑfuԑ’m bé liԑ’n ti’a kun. Krist, Nyanmiԑn i Wa’n, ͻ kacili i wun sran yԑ be wuli i. Sran’n kwlaa be wunnin i. Ɔ seli kԑ : " Sran ng’ͻ wun min’n, wuun ͻ’a wun e Si’n" (Zan 14 : 9). Sa nga ti yԑ Nyanmiԑn yili ninnge’n kwlaa’n, i nuan yiali Krist nun. Nyanmiԑn Ndԑ’n se kԑ : "Yԑ Nyanmiԑn yili sran’n kԑ i bͻbͻ sa-a. Ɔ yili i kԑ i bͻbͻ Nyanmiԑn’n sa. Ɔ yili yasua nin bla" (Bo bolԑ 1 : 27). Nyanmiԑn kpali Adam nin Ɛv kԑ be yi i anyrunnyan’n i nglo. Nyanmiԑn yili sran’n kԑ niannun sa. Kԑ be nian sran’n, ͻ fata kԑ be ‵wun Nyanmiԑn. Andԑ bͻbͻ k’ͻ ti sͻ-ͻ.

Anuansԑ Uflԑ’n bo’n, e lԑ atin kԑ e ‵fa ninnge nga Nyanmiԑn yili be’n e ‵yo e wun sa ye. I sͻ’n ti, e kwla yi i waka nyrԑ mun nin i nnԑn mun nin i sran mun bé nzͻliԑ. Sanngԑ e kwla fa-man ninnge sͻ mun e yo-man e nyanmiԑn, e kwla koto-man bé bo e su-man be. Ninnge nga Nyanmiԑn yili be’n be ti i sa nuan ninnge mun. Be nin Nyanmiԑn kwla sԑ-man, afin Nyanmiԑn bͻbͻ yԑ ͻ yili be-ͻ, i sͻ’n ti, ͻ ti’ԑ i su kԑ e koto bé bo yԑ e su be. Wafa nga Nyanmiԑn fa yili sran’n kԑ i bͻbͻ sa’n, i wun kpԑli k’ͻ fin cԑn bͻ sran’n yoli sa tԑ’n. Sanngԑ Zezi bͻ ti Adam nnyↄn su’n, ͻ siesieli Nyanmiԑn i wafa ng’ͻ ti’n klͻ sran’n i akunndan’n nun, ͻ man siԑn’n, Nyanmiԑn i anyrunnyan’n ͻ yi i wun nglo sran’n nun. Nán ngbԑn ti yԑ Pͻl seli kԑ : "Ɔ fa Nyanmiԑn bͻ be wu-mԑn i’n" nin-ͻn (Kolͻsfuԑ mun 1 : 15).

Be wuli Zezi, ͻ wuli yԑ ͻ cԑnnin sran’m be kwlaa be ti. Wafa nga sran kun fa wun Krist’n yԑ ͻ fa bu i akunndan-ͻn. Sԑ e ti sran ble o, sԑ e fin wia afiliԑ lͻ o, sԑ e ti blͻfuԑ o, Sԑ e ti Arab o. Krist fa Nyanmiԑn nvle nvle’n kwlaa bé wafa nga be fa ti’n nun. I aklunnjuԑ’n nin i alaje’n nin i anwlԑn tralԑ’n, be ti-man ndԑ ngbԑngbԑn, sanngԑ ͻ yili be nglo i nzuԑn’n nun. Nyanmiԑn fԑli i wun mantannin sran mun Krist nun. Ɔ’a fԑ-mԑn i wun ͻ’a kle-man kԑ alԑ kunfuԑ’m be su kpԑn wie sa annzԑ kԑ sran bͻ i nyrun’n yo sro’n sa, sanngԑ ͻ fԑ i wun kleli kԑ Nyanmiԑn i Bua gbanflԑn bͻ ti wun ase kanfuԑ bͻ kplinnin su kԑ ͻ sua e fͻ bulԑ’n sa. Ɔ wuli e sa tԑ’m be ti k’ͻ yo nan e nin i y’a kwla tran mandimaan ti. Ɔ kleli e like nga be flԑ tԑ yilԑ’n i bo’n. Waka nda’n ͻ kacili Nyanmiԑn i klolԑ’n i nzͻliԑ. Krist wuli sanngԑ ͻ cԑnnin, ͻ fin ndia’n nun fiteli, ͻ man sran’m be wunnin i. I wunnԑn’n bͻ ti wawԑ nun wunnԑn’n, ͻ fa kleli sran mun, be kԑnnin (Lik 24 : 39).


04.5 - Krist i nzͻliԑ ng’ͻ o i sͻnnzͻnfuԑ’m be nun’n

Zezi i akunndan wԑtԑԑ’n, ͻ fa yili i sᴐnnzᴐnfuԑ’m bé anwlԑn’n k’ͻ yo nan Nyanmiԑn i klolԑ’n nin i saun b’ͻ ti’n, nin i aklunnjuԑ’n ͻ’a yi i wun nglo i nun’n ti. Ɔ kpali e kԑ e kaci Nyanmiԑn i nzͻliԑ mԑn’n bͻ sran kpͻlԑ nin wie’n ͻ’a yi i’n nun. Ɔ mannin e aklunjuԑ yԑlԑ kԑ ͻ yoli man y’a kaci kԑ " fluwa bͻ be klԑli bͻ kan Krist i ndԑ’n sa" e osufuԑ’m bé nyrun, e tranfuԑ’m bé nyrun yԑ e janvuԑ’m bé nyrun e nzuԑn kpa’n ti. Zezi trԑli i wafa ng’ͻ ti’n i ase e anwlԑn’n nun k’ͻ yo nan y’a kwla yi i wafa kwlaa ng’ͻ ti’n i nglo’n ti. Sran kwlaa ng’ͻ nin Zezi i sͻnnzͻnfuԑ kpakpa mun yia nun’n, kannzԑ ͻ wie sran ble nvle nun o, annzԑ wia afiliԑ lͻfuԑ mun o, annzԑ blͻfuԑ’m bé nvle’n nun o, annzԑ lika uflԑ o, sran sͻ’n ͻ ′wun Krist i kpajalԑ’n nin i aunnjuԑ’n i sᴐnnzᴐnfuԑ’m bé nyrun nun. Kԑ Krist bͻ be boboli i waka nda’n su bͻ cԑnnin’n i wawԑ’n wo sran kun i anwlԑn’n nun’n, kannzԑ ͻ ti sikafuԑ o annzԑ yalԑfuԑ o, kannzԑ ͻ si fluwa kanngan o annzԑ ͻ si’a fluwa kanngan o, kannzԑ ͻ ti gbanflԑn annzԑ talua o, kannzԑ ͻ ti kpԑnngbԑn o, Nyanmiԑn i nvle’n nun kpajalԑ’n, ͻ yi i wun nglo sa blԑblԑblԑ sran sͻ’n nun. Sԑ e waan e bubu mԑn nunfuԑ’m be nun’n sikafuԑ’m be nu’an bue kun yԑ yalԑfuԑ’m be nu’an bue kun. Sran’m be ti akpasua nnyↄn mԑn’n nun : bue kun su be nga b’a wu bé uflԑ’n yԑ bue kun ekun su’n, be nga be ti kԑ sran bͻ b’a wu’n sa bé sa tԑ’n ti’n. Kԑ sran kun sͻ Krist nun i anwlԑn’n nun’n, sran’n kwlaa be kwla wun Nyanmiԑn i nguan’n sran sͻ’n i nun.

Nyanmiԑn Wawԑ’n su-man e bo kԑ e tu e wun, sanngԑ ͻ tinngԑ e kԑ e ‵yo nan Nyanmiԑn i Wa’n ‵nyan nyrun. Nán man e fa e wun kle kԑ sran’n kwlaa be ‵wun ye. Ɔ fata kԑ e fa anyrunnyan’n kwlaa e man Nyanmiԑn i Bua gbanflԑn b’ͻ wuli e ti’n. Mari, Zezi i nin’n, ͻ nin be kwlaa nga be ti Nyanmiԑn liԑ bͻ be wuli’n, sԑ bé nyin tԑ o su’n, be klun su jͻ-man be kwlaa nga be koto waka sran annzԑ nzͻliԑ wie’m bé bo, be manman be’n bé wun, san be saci waka sran sͻ mun lika kwlaa nga be wun be’n, asͻnun sua’m be nun, awlo’m be nun, gua’m be su. Sran fi nian kwla yi-man Nyanmiԑn i wafa kwlaa ng’ͻ ti’n i nglo kpa sakpa san Zezi kunngba. Sran fi ti’a kpa san Nyanmiԑn kunngba. I aunvuԑ silԑ’n kunngba cԑ ti yԑ ͻ buli ye sran kpa b’ͻ yoli e saun-ͻn. Mari i srԑlԑ annzԑ be nga be ti Nyanmiԑn liԑ bͻ be wuli’n be srԑlԑ, bé bo kotolԑ annzԑ e sin bé sin nan be srԑ Nyanmiԑn man e’n, ͻ ti mmla nnyↄn su’n i fͻnlԑ weiin kpa. Sԑ e yo i sͻ’n, ͻ kle weiin kpa kԑ nán e Si bͻ o nyanmiԑn su lͻ’n i su yԑ e wla’n kwlaa wo-ͻ, sanngԑ e fa e wla’n guԑ i su kan kpԑkun e fa wie guԑ ninnge ng’ͻ yili be bͻ cԑn kun be sin’n be su wie. Nzͻliԑ wie fi annzԑ waka sran wie fi annzԑ like uflԑ wie fi kwla man-man tinmin bͻ kwla yo sran juejue-ͻ. Nyanmiԑn deli e i Wa Zezi-Krist nun. Ninnge’n kwlaa nga sran’m be koto bé bo asͻnun sua’m bé nun’n, be ti tete like e Min’n i nyrun.

Anuansԑ uflԑ’n bo’n, e kwla fa e wun mantan Nyanmiԑn yԑ e nin i e koko yalԑ afin e ti i mma mun yԑ ͻ klo e kpa sakpa. Krist i tԑ bͻ yili e ti’n, i yԑ ͻ man e atin sͻ’n nin-ͻn. Asa kusu cԑn kwlaa ͻ o Nyanmiԑn i fama su lͻ ͻ srԑ Nyanmiԑn man e. Ba’n ͻ yoli man siԑn’n, e nin Nyanmiԑn e afiԑn ͻ’a sԑ. Sran ng’ͻ bu-man sa sͻ’n i like fi’n, wuun ͻ bu’a Nyanmiԑn kԑ ͻ ti i Si. E nyannin aunvuԑ silԑ nin sԑsԑ yolԑ nin sa tԑ yaci cԑlԑ’n, e Si Nyanmiԑn nin i Wa’n nin i Wawԑ’n i sa nun. Man e la Nyanmiԑn bͻ ti Siԑ, Ba yԑ Wawԑ’n i ase nin e anwlԑn’n kwlaa.


04.6 - Nyanmiԑn i akpue’n

Ngbacԑ o be nga be klo Nyanmiԑn’n nin be nga be kaci bé sin si i’n bé afiԑn. E wun ngbacԑ sͻ’n mmla nnyↄn su’n nun. Mmla nnyↄn su’n kaan kԑ fͻ bulԑ o be nga be kaci bé sin si Nyanmiԑn’n be su, sanngԑ su yralԑ yԑ ͻ o be nga be klo Nyanmiԑn’n be su-ͻ. Kԑ Nyanmiԑn yili i wun nglo mmla nnyↄn su’n nun bͻ seli kԑ : " Min yԑ n ti’n", i bo’n kle kԑ ͻ ti sran bͻ o nguan nun, ͻ lԑ i klun klo sa b’ͻ yo-ͻ, yԑ ͻ ‵kwla ‵ijͻ. Ɔ jran su kpa kԑ ͻ ti Miԑn bͻ ti sԑsԑfuԑ, ͻ kaci-man yԑ ͻ sie like’n kwlaa. Ɔ nin e trali aeguԑ kun bͻ ti mandimaan yԑ ͻ klo kԑ e kusu e fa e wun mԑntԑn i nanwlԑ su yԑ e tu e klun kan e wun ase i bo.

Nyanmiԑn su minndԑ kԑ e yi e klolԑ’n i nglo i lika. Ɔ kplin-man su kԑ e koto i bo nan e kunngba’n y’a koto amuin wie bo, annzԑ klͻ Sran wie bo, annzԑ famiԑn wie bo, annzԑ sika ͻkwlԑ bo, annzԑ jԑtԑ ufue bo. I kunngba cԑ yԑ ͻ ti Nyanmiԑn nin-ͻn yԑ Defuԑ uflԑ fi nu’an lԑ kun.


04.7 - Be kwlaa nga be kpͻ Nyanmiԑn san be ′tͻ

Be nga be yo Nyanmiԑn i klolԑ’n i finfin’n, be yako, yԑ be nga be bu-man Nyanmiԑn i like fi’n, be yako. Be ti kԑ waka sa mma bͻ be kpԑli waka bo’n su’n sa. Ɔ cԑ-man be ′wu kee yԑ be ′saci. Bé awieliԑ’n yԑlԑ anannganman sin’n. Nyanmiԑn nun yԑ nguan kpa’n wo-ͻ. Sԑ y’a kplin-man su kԑ e nin i e nanti’n, wuun e su lԑkԑ i wawԑ nun, afin e man wawԑ uflԑ mun bé atin be wlu e nun, yԑ e man amuin mun bé atin ͻ nin tinmin tԑtԑ mun, e man bé atin e nguan’n nun annzԑ e yo e bͻbͻ e wun kԑ e ti Nyanmiԑn sa. Nyanmiԑn nin sran uflԑ fi cԑ-man i anyrunnyan’n nun san i Wa’n yԑ i Wawԑ’n. I kunngba yԑ ͻ ti ninnge kwlaa bé yifuԑ-ͻ. I kunngba yԑ ͻ ti jͻlԑ difuԑ’n nin-ͻn, blԑ’n kwlaa nun, yԑ mandimaan.

Sԑ sran’n kpԑ-mԑn i nyin Nyanmiԑn kpafuԑ’n i wun, sanngԑ ͻ nian nyanmiԑn uflԑ’m bé nyin bo annzԑ ͻ bu i bͻbͻ wun kԑ ͻ di i tiaun’n, wuun sran sͻ’n ti wun tufuԑ yԑ ͻ kete i anwlԑn’n Nyanmiԑn bͻ yili i’n i klolԑ’n i lika. I sͻ sran liԑ’n kaci klunwifuԑ, ͻ si-man aunnvuԑ. Ɔ klo kԑ ͻ tintin sran’m be su, ͻ klo-man kԑ ͻ su be. Ɔ klo-man Nyanmiԑn kpԑkun ͻ klo-mԑn i wiengu. Ɔ wun-man mԑn’n i wafa ng’ͻ ti’n i wlԑ yԑ ͻ wun-man wawԑ nun ninnge’m be wlԑ, afin ͻ lԑ-man Nyanmiԑn i ninnge kpakpa’m bé wie. I sͻ’n ti, i akunndan’n ti kԑ ͻ’a tri sa yԑ i nzuԑn’n saci kͻ i nyrun tititi. Ɔ kaci wlaka bofuԑ yԑ, ͻ di-man nanwlԑ yԑ i sacilԑ’n ti tԑ tra blo nnԑn bͻbͻ, afin i bͻbͻ i wunmiԑn’n nin i ngwlԑlԑ’n yԑ ͻ fa di mԑn’n nin-ͻn.

Sran kwlaa nga Nyanmiԑn wla bé su nun lele bͻ sanngԑ be waan san fii be kpͻci Nyanmiԑn’n, ͻ yaci bé nun be tͻ, afin ͻ yili i klolԑ’n nglo kleli be lele ngbԑn. Ɔ yi i sa bé su ͻ man be yo bé bͻbͻ bé klun sa mun lele be saci mlↄnmlↄn. Sran sͻ’m be wie yԑlԑ famiԑn Sail nin Zida Iscariͻt. Nyanmiԑn di sran mun nin nvle’m bé jͻlԑ sͻ wie. Bla wie’m be su bé wun’m be bo be tͻ sa tԑ yolԑ’n nun ͻ man bé fͻ bulԑ’n ͻ kan bé mma mun wie. Wafa kԑ nga sa yԑ bé wun bͻ be fa mantan-man Nyanmiԑn’n, ͻ kaci kԑ tukpacԑ sa ͻ sa bé afiliԑ wunmuan nin-ͻn. Awlo bo kwlaa nga gblԑ kpԑlԑ o bé nun’n, be wun i sͻ’n bé nzuԑn nun yԑ be kwlaa nga be bo sin yia be’n, be wun i sͻ. Kannzԑ awlo bo kun nunfuԑ’m be yo bé wun kԑ be klo sran sa sanngԑ be si-man Nyanmiԑn annzԑ kusu be o be nga be waan Nyanmiԑn nu’an lԑ’n bé nun wie’n, i kwlaa ti kun. Be wun awlo bo kun i akunndan’n bé mma’m be nyinma’n nun. Awlobo wie mun be ti kͻmiԑn difuԑ annzԑ be nin wunmiԑn mun be ijͻ annzԑ be o bae dilԑ’n nun. Wie mun be yo i sͻ nan be fa kunndԑ kpekpe yolԑ annzԑ be kunndԑ nvialiԑ nun sa wie mun. Zezi bu nyoliԑ sͻ’m be kwlaa bé fͻ, sanngԑ sran kwlaa ng’ͻ kaci i nzuԑn’n, ͻ sͻ i nun aklunjuԑ su yԑ ͻ de i Satan i jrͻkͻ’m bé nun. Zezi seli kԑ : "Sԑ Nyanmiԑn Wa’n ‵kpͻ amun ti’n, amun ′nyan amun ti mlↄnmlↄn" (Zan 8 : 36). Krist i kwlalԑ’n tra sran’n i akunndan’n su, ͻ kwla wie-mԑn i wlԑ wun. I kunngba yԑ ͻ kwla bubu amuin wualԑ’n nin sannzan bolԑ’n kwlaa nun-ͻn.

Nyanmiԑn kle e kԑ awlo bo ng’ͻ kete i anwlԑn’n i wun’n, ͻ ′tu bé fͻ lele ͻ fa wlu bé mma’m bé mma liɛ’m bé mma’m be nun. Sanngԑ sԑ awlo bo sͻ nunfuԑ’m be kaci bé nzuԑn’n yԑ be kpԑ bé nyin Nyanmiԑn wun’n, ͻ yra bé su. Ba kanngan wie mun annzԑ kpԑnngbԑn wie mun bͻbͻ, be su fԑ, sa tԑ nga bé nannan wie’m be yoli’n ti. Sanngԑ ͻ nin i sͻ’n ngba’n, ͻ fata-man kԑ e ‵bu be nga ndrunmun dilԑ o bé anwlԑn’n nun’n bé fͻ, man e kunndԑ sa nga be sinnin laa bé afiliԑ’n nun’n yԑ man e klo be. Zuif wie mun ͻ nin nyanmiԑn flԑfuԑ wie mun, be klo-man kԑ be ‵ti Nyanmiԑn i Wa’n i dunman, afin bé nannan mun be fa klelԑ wie mun wlԑli bé ti nun. Be kwlaa bé akunndan’n ti kun, ͻ ti kԑ nyanman wie ci be kwlaa lika wlԑ sa, i sͻ’n ti be yi mԑn’n i ti Defuԑ’n i blo. Sran kwlaa ng’ͻ klo kԑ ͻ nyԑn i ti akunndan tԑtԑ nga sran’m be bu i Krist wun i lika’n, man ͻ wun i wlԑ kԑ ͻ ti ciwa akunndan tԑtԑ sͻ’m bé ti, man ͻ kpͻci be yԑ Zezi dunman nun man ͻ kpԑkpԑ osu nun jrͻkͻ sͻ’m bé nun. Sԑ e fa e awlo bo’n nin e klͻ mun wlԑ Nyanmiԑn sa nun kԑ ͻ nian bé su yԑ ͻ sasa be’n, e ′wun junman nga e Si bͻ o nyanmiԑn su lͻ’n ͻ ′di’n. Ɔ ′nian e lika yԑ e ′yo kpa. Ɔ jran su kpa titi kԑ : " N TI MIƐN, ͻ Si bͻ klo wͻ titi. N si wͻ, n fa ͻ dunman’n yԑ n fa flԑli wͻ-ͻ, a ti min liԑ, fͻ wun mantan min yԑ kpͻci ninnge tԑtԑ nin fiԑnfiԑn nga a fa ͻ wun mantan bé laa mun. Fͻ wla guԑ min su afin n ti sԑsԑfuԑ yԑ n ti kwlafuԑ, yԑ a nyan ͻ ti yԑ a fite nun mlↄnmlↄn".


04.8 - Be nga be klo Nyanmiԑn sakpa’n, be lԑ suyralԑ bͻ lԑ-man awieliԑ

Sran ng’ͻ klo Nyanmiԑn bͻ bu i sran’n, ͻ bu nyanmiԑn ndԑ’n i akunndan yԑ Nyanmiԑn i fanngan nun yԑ ͻ o nguan’n nun-ͻn. Ɔ wun i wlԑ kԑ ye nga Nyanmiԑn yoli i’n, ͻ ti dan yԑ ͻ lԑ i ase titi delԑ bͻ deli i’n nin i anwlԑn bͻ trԑli i wun’n ti. Ɔ si I wun ye, yԑ ͻ lԑ i ase titi nin i anwlԑn’n kwlaa. Kristfuԑ kwlaa ng’ͻ si Nyanmiԑn wun ye’n, ͻ wun ninnge kpakpa mun Nyanmiԑn ndԑ’n nun, ͻ wun kwlalԑ kun nin su yralԑ kpanngban Nyanmiԑn ndԑ’n nun yԑlԑ kԑ Nyanmiԑn ndԑ’n yԑ ͻ tinngԑ i-ͻ. ? Sԑ yasua kun tra bla kun ase, bͻ be su siesie aja’n, sԑ ͻ klԑ fluwa kͻ man i so-man’n bͻ ͻ tike-man fluwa’n su bͻbͻ kpԑkun i wla fi su’n, an bu i sͻ bla liԑ’n sԑ? Amun ′se kԑ ͻ klo-man yasua’n. Bla nga b’a trԑ i se bͻ klo yasua’n, i konvi sͻ kԑ yasua bͻ cԑn wie lele ͻ wa yo i wun’n, ͻ ‵klԑ i fluwa. Kԑ yasua’n klԑ i fluwa’n, ͻ kpli yԑ ͻ tike su-ͻ, ͻ kanngan nun, ͻ flan nun ekun yԑ ndԑ nga yasua’n kaan bé fluwa’n nun’n, be kԑ i akunndan’n nun. Kԑ e klo Nyanmiԑn’n, e suan i nuan ndԑ’n, afin ͻ ti kԑ Nyanmiԑn bͻ klo e’n, yԑ ͻ klԑli fluwa blԑli e sa. E kanngan e flan nun yԑ e suԑn i nun ndԑ cinnjin mun e ti nun. Nyanmiԑn ndԑ bͻ man e kwlalԑ bͻ man e yo Nyanmiԑn klun sa’n, ͻ yi e anwlԑn’n.

Sԑ siԑ mun be srԑ nyanmiԑn man bé awlo’n sakpa’n, bé awlofuԑ mun be ′nyan Zezi i suyralԑ mun. Kԑ ba’m be nyin’n, be su kaci-man bé sin si-man Nyanmiԑn. Afin be ti kԑ sua bͻ be wlԑli i bo ase kpa’n sa. Ɔ ti nanwlԑ kԑ siԑ nin niԑn mun be kwla mian-man bé mma mun kԑ be lafi Krist su, i kunngba nin-ͻn, kannzԑ be bo be’n, ͻ kwla tu-man sa tԑ ng’ͻ o bé anwlԑn’n nun. Sanngԑ sԑ siԑ nin niԑn mun be klo bé mma mun’n, bé nzͻliԑ’n ͻ ka bé akunndan’n nun. Ba mun bé wla kpԑn bé si’m bé nzͻliԑ’n su ndԑndԑ tra ndԑ nga be kan kleli be’n. Kԑ bla kun bu i nyinma kle i wa’n, ͻ ti i ndԑndԑ tra bé nuan nun ijͻlԑ’n. Kannzԑ ͻ wuli bͻbͻ’n sanngԑ i klolԑ’n tԑ di junman i mma mun bé nguan’n nun.

Nyanmiԑn boli kasiԑ kԑ ͻ ′yra be nga be klo i’m be su lele ju akpasua akpi su ! Kasiԑ sͻ’n ti wla ase gualԑ ndԑ man siԑ nin niԑn nga be ta bé mma mun lakalԑ nin sa tԑ mԑn’n nga nun’n. Kwlalԑ ng’ͻ o Nyanmiԑn i klolԑ’n nun’n, ͻ wlu aosin nun, ͻ kpaja aosin nun kԑ wia je bͻ wlu sua tuun kun nun’n sa. Wawԑ nun aja like ng’ͻ o awlo bo’n nun’n, ͻ wa sͻn kpanngban kpa sԑ siԑ nin niԑn mun be lafi Nyanmiԑn su yԑ sԑ be nin Nyanmiԑn koko yalԑ titi’n.

? Amu’an bu afuԑ ng’ͻ o akpasua akpi’n nun’n i akunndan le ? Akpasua kun ti afuԑ ablaun-nin-nnun. Akpasua akpi’n, ͻ ti afuԑ akpi-ablaun-nin-nnun (25000). Blԑ nga Nyanmiԑn bͻ ti aklunyefuԑ’n, ͻ klo kԑ ͻ yra be nga be lafi i su’m bé su’n, yԑ ͻ o lԑ. Sԑ e bu awlo kun nun ba mun, ͻ nin anunman mun nin anunman siansiansian mun be akunndan’n, ͻ yo nyԑnmԑn dan, be sↄnnin, ͻ man be ti kԑ " Wawԑ nun alԑ kunfuԑ mun sa" yԑ be kwlaa sͻ’n, Nyanmiԑn ′yra be su bé nannan klikli mun bé anyinyԑ’n nin bé Nyanmiԑn su lafilԑ’n ti. Nyanmiԑn kan kle i klofuԑ kpa’m be kԑ bé klolԑ’n ͻ wa kaci kԑ nzue ti kun sa, ͻ sͻnji sran ya-ya bé nguan’n nun. Zezi i sͻnnzͻnfuԑ wie fi kwlaa se-man kԑ i yԑ man sran’m be fa bé wun mantan Nyanmiԑn-ͻn, sanngԑ Nyanmiԑn sin i nun yԑ ͻ yo sran’m be ye-ͻ. Be nga be klo Nyanmiԑn bͻ be fa bé wla guԑ i su’n, ͻ ‵yo bé ye lelele.

Sԑ e wunnin e wunnԑn nun si mun annzԑ e wawԑ nun si mun bé su yralԑ’n e nguan’n nun’n, wuun e kwla wun ngbacԑ nga be o mԑn nun sran’m be nzuԑn’n i afiԑn’n i wlԑ. Klͻ kaan annzԑ klͻ dan annzԑ be nga nyanmiԑn ndԑ’n wluli bé akpasua’n su ͻ’a tra afuԑ ya’n, e wun wafa nga be ti’n. Nyanmiԑn ndԑ’n di junman bé nguan’n nun, ͻ man be nin be nga mun ti’a kun. Kԑ Zezi deli sran sͻ mun’n, be si i wun ye yԑ ͻ man be su bé wiengu aklunjuԑ nun. Kԑ Nyanmiԑn Wawԑ’n ko di junman akpasua kun su’n, awlobo mun, suklu mun, aata ninnge mun, awa junman difuԑ mun, nin mԑn’n i siefuԑ mun be nyan Nyanmiԑn i ninnge kpakpa sͻ’m be wie, e kwla wun junman nga Nyanmiԑn dili’n, nvle wunmuan’n i nguan wunmuan’n nun.

Asa kusu sran wie mun be fa amuin mun kaci bé nyanmiԑn be sͻ be. Ɛnd lͻ amuin fiԑnfiԑn nga be nͻn moja mun, Sin lͻ be sͻ be nga be wuli mun bé wawԑ’n annzԑ be ijͻ amuin’m bé su, sran ble nvle nunfuԑ mun be kunndԑ bé wun sasalԑ like amuin sͻlԑ’n nun. Klͻ sͻ mun be su’n, srԑ kun sran mun, yԑ be o kannga dilԑ nun wawԑ nun yԑ bé wla gua-man ase. Blԑ sunman kpa be bu-man bla mun be like fi, be yo be finfin, yasua’m be yo be like kwlaa nga be klo’n. Akpasua akpasua mun be bu nun kun. Alԑ sͻ’m be ti’n, nvle sͻ mun be kͻ-man bé nyrun yԑ yalԑ’n di be. Sԑ amun wlu nyanmiԑn flԑfuԑ’m bé klͻ kun su annzԑ kristfuԑ mun bé klͻ kun su’n, amun ′wun wawԑ nun anngban’n ng’ͻ fita lͻ’n. Blo nnԑn’m be bͻbͻ be si lika nga be bo be’n, bͻ aunnvuԑ silԑ nu’an lԑ’n, ͻ nin lika nga be yo be wԑtԑԑ lԑ’n.


04.9 - Ndԑ kpͻlԑ bolԑ : Man e fa akpue nan e nin mԑn’n e bu

Siԑ nga be klo Nyanmiԑn’n, e wun kԑ bé su yralԑ’n kwlaa be yi be wun nglo bé awlofuԑ mun bé nguan’n nun. I sͻ sran liԑ mun be srԑli nyanmiԑn tantrantan, be dili junman kekle yԑ be trannin sԑsԑ yolԑ nun lele be fa yoli kpԑnngbԑn. Mԑn nunfuԑ mun bé nun ti bubuwa nnyↄn. Be nga be klo Nyanmiԑn mun be o bue kun yԑ be nga be kpͻ i mun, be o bue kun kusu. Sԑ amun klo Nyanmiԑn sakpa’n, amun ′klԑn amun wun ′mԑn i kԑ bakan sa yԑ i klolԑ’n ͻ nyin amun nun. Sanngԑ sԑ amun kete amun anwlԑn’n yԑ sԑ amun tie-man i flԑlԑ’n, amun nguan’n saci, yԑlԑ kԑ amu’an kpͻci i bͻ yo sran’m be kpa’n. Ɔ ti-man abonuan kԑ sran wie mun be klolԑ’n i su ͻ’a kpԑ blԑ kasiԑn nga nun. Sԑ sran’n ͻ’a kpԑ-mԑn i nyin Zezi wun lͻ’n, ͻ kaci klun wifuԑ yԑ i klun wi sͻ’n, ͻ sa be nga mun. Nyin kekle nga be yo i Nyanmiԑn su’n, ͻ yo man akunndan tԑtԑ mun be ba e nun. Bian nga be flԑ i Karl Marx’n, ͻ klo Nyanmiԑn i gbanflԑn nun. Sanngԑ ͻ yacili i wun lԑ man wunnzue yilԑ’n ͻ wluli i anwlԑn’n nun yԑ ͻ nin wawԑ tԑtԑ mun be trali aeguԑ. Ɔ yoli man sran kpanngban kpa be mlinnin, afin be waan anyanbeun’n ti like tԑ yԑ junman dilԑ’n nun yԑ ti delԑ’n wo-ͻ. Sanngԑ ͻ nin i sͻ’n ngba’n, i sͻnnzͻnfuԑ’m be kplan-man aunnjuԑ klͻ kun man-man junman difuԑ mun kannzԑ be jao Nyanmiԑn wun’n, i sͻ’n kwla yo-man ye. Sran kwlaa ng’ͻ se kԑ ͻ si’a Nyanmiԑn bͻ ti nguan bͻ ti klolԑ’n, bͻ fa sran uflԑ mun kԑ i nyanmiԑn sa’n, i sͻ sran liԑ’n, klunngbͻ tu-mԑn i anwlԑn’n nun. Nyanmiԑn i ya’n wo sran sͻ’n su kԑ e se yԑ lele jͻlԑ dilԑ cԑn’n nun.

www.Waters-of-Life.net

Page last modified on March 02, 2023, at 01:18 PM | powered by PmWiki (pmwiki-2.3.3)