Previous Lesson -- Next Lesson
1. Noddaandu fii tuubugol ngol (Matta 3:1-12)
MATTA 3:12
12 Himo jogii feeteewo makko ngon ka jungo ko o hentinira bete makko on, o moobha nyaametee on ka beembal makko, o sunnira foron on yiite nge dhaanotaako.
Annabi Yaayaa lootoowo maande tuubuubuyee on no huutorde mdodo goo fii faamingol en goonga goo. Himo hollude en remoowo wondho e wesude awdi ndin. Ko kenkesama on hunditi awdi ndin e mbullaari ndin, hendu ndun wiirini ndi. Kono ndin awdi yani ka ley koydhe Jom baagol ngol on, on mari ndi ka tumusuuje makko.
Ko hombo nanditoton e mun? Hara ko on tawdaabhe e awdi moyyhiri ndin kaa ko on bhe hudho kon? Fariisiyaabhe bhen e Sadduusiyaabhe bhen no yhettitorii wa si ko bhe awdi moyyhiri, hibhe yhettiri bheya yimbhe wa hudho kon e kenkesama on. Annabi Iisaa no sifaade misal yhettaangal e hoore yhantoowo sagalle (hari e on saa’i hibhe yhettiraa wa hudho kon) bhen juulaynoobhe ka juulirde mawnde: yhantoowo sagalle on hay suusataano bhantude gite mun dhen ka kammu, kono himo torora doy wi’a dhun dhoo: «Yaa an Alla, yurminan min oo junuubankeejo.» Ko on neddho tuubudho jogoraa feewudho e ko kanko yhettiraa wa awdi moyyhiri ndin, ka tawi dhon Fariisiyaajo juulaynoodho on takko makko no mantora dewal mun ngal. Nyaawoore Alla nden yanii e makko, dhun e tawde himo hoolii hoore makko (Luuka 18:9-14). Hara ko on hombo? Hara ko on naafigiijo faaminkiniidho on ko dewo? Kaa ko on junuubankeejo tuubudho? Hara kuudhe mon dhen no holli wonde ko on tuububhe? E hara hidhon heewi Ruuhu-Seniidho on?
Matta lannitori yewtere mun nden e fee yewtugol fii «yiite» ngen. O yewtii laabiiji tati fii tikkere Alla nden. Kala bhen dartiibhe Ruuhu Almasiihu on ko naataybhe jahannama non, bhe yaada e dendaangal bhen salinoobhe fow wattiteede. Kisiyee Almasiihu on ko timmudho. O yedhay bawgal Ruuhu-Seniidho labbhinayngal ngal on aaden tuuboowo. Kono on faaminkiniidho ko o dewo, hara himo jokki wadhugol junuubu, o wontoyay leggal yiite jahannama nge roccataa ngen, hara tama’u woo o alaa.
TORAARE: Yaa an Iisaa-Almasiihu Joomi an, ko an woni Dandoowo e Nyaawoowo aduna on. Mi torirke ma yo a yaafano lan welsidaare an nden. Rewrude e Ruuhu maa on, wattitu ruuhu an on fii no mi huuwira kuudhe wondudhe e giggol e moyyhere e goonga. Hinaa fii kisiyee an on tun mi woni e toraade, kono ko fii kisiyee majjubhe bhen. Muncu bhee yimbhe naafigiibhe bhayru feewudho woo alaa yeeso maa. Medhen yankinaade yeeso mangu maa ngun, medhen wattude hoore amen e juudhe maa. Hebbin men Ruuhu maa on immorde ka kammu, yedhaa men doole no men yidhidirira hakkundeeji amen wano yidhirdhaa men non. Bhaawo maa, tama’u woo alaa. Mantooje amen dhen fow ko an fewti. Aamiina!
LANDAL:
- Ko hondhun sendindiri lootireede Ruuhu Seniidho on e lootireede yiite ngen?