Previous Lesson -- Next Lesson
1. Taariika fii Iwdi Iisaa Almasiihu on (Matta 1:1-17)
MATTA 1:1
1 Taariika iwdi Iisaa-Almasiihu mo Daawuda mo Ibraahiima:
Yahuudiyankeebhe bhen no teddini annabi Ibraahiima maamiraawo mabbhe on bhayru ko immorde e makko e yimbhe goo kadi taariika fii humondiral ngal hakkunde mabbhe e Alla fuddhii. Allaahu on noddi annabi Ibraahiima fewndo ko on hodhi e ndee nokkuure wi’eteende Haraana, o yamiri mo yo o yaltu ka fina-tawaaji makko e ka yibbhe makko bhen e ka wondigal bheynguure makko nden. O wadhi mo eggoowo mo alaa hodho tabitungo. Annabi Ibraahiima fawii e ko Allaahu on ardotoo mo kon, o wonani gomdhinbhe bhen misal. Gila ka fuddhoode, Allaahu on foduno annabi Ibraahiima wondema o dhuddhiniray jurriya makko on wa koode dhen ka kammu e wa mbullaari ndin ka sera baharu, awa kadi bolondaaji aduna on fow barkinte sabu makko (Fuddhoode 12:2, 7, 13:16; 15:5, 18). Hay si tawii o joganooki leydi, o alaano kadi gedhal, annabi Ibraahiima gomdhini fodaariiji Joomiraadho on, o woni baaba gomdhinbhe bhen fow.
Dhun e tawde himo jogii anniye laabhudho e nder gomdhinal makko ngal, kono o yanuno e nder jarrabuuyee. O habbanooki yo Allaahu on okkor mo bhiddho, kono o jombi Haajirata e hoore hawjere, oo Misirayankeejo kurkantoodho sonna makko Saarata. Haajirata jibini Ismaa’iila. Hawjere makko nden addi tampereeji e hareeji hakkunde jamaaji dhin e nder duubhi teemeddhe teemeddhe.
Bhawto ko Alla woddhitii annabi Ibraahiima e nder duubhi sappoo e tati, Allaahu on yurmaa mo. Hari ontuma annabi Ibraahiima no mari duubhi 99. Bhurdho Toowude on sincidi e makko ahadi, o yamiri mo maande sunninegol ngol, o fodi, o heydhintini fodaari ndin fii yedhugol mo bhiddho e nder nayeewu makko. Annabi Ibraahiima gomdhini Alla e ko on fodi mo kon bhiddho, hay si tawiino dhun yaadaa e ko yaasi on andi kon. Fii kala hari yumma Saarata wonaa jiidotoodho, awa le Tagudho on yedhuno gedhal bhen yhettidirbhe fewndo ko bhe nawyi, on gedhal mabbhe no wi’ee Issaaqa. Yhubbhondiral ngal hakkunde Alla e annabi Ibraahiima bhurti luggunde. Bhay neebhii, o fattanii jamaa dhee ca’e wi’eteedhe Saduuma e Amuura, o noddiraa gidho Alla. Allaahu on ndarndii annabi Ibraahiima, baaba gomdhinbhe bhen, o yamiri mo yo o ittu Issaaqa bhiddho makko on sadaka. Gomdhindho on dhoftii hawa Alla kan, o hebulii fii ittugol bhiddho makko yidhaadho on sadaka sabu giggol ngol o joganii ngol Joomi makko on. Ko non o wontiri misal fii Alla, on ittudho Bhiddho mun on sadaka sabu giggol ngol o joganii en ngol fii no hisiniredhen. Sabu sella-finde makko on kanko annabi Ibraahiima, Allaahu on woondiri hoore makko wondema leyyhi aduna on fow barkinte sabu jurriya makko on (Fuddhoode 22:12, 16-18).
Sahaabaajo maaketeedho on Puulusa no janni en wondeam ndee innde «jurriya Ibraahiima on» ko aaden nde toddhii, on le ko Iisaa-Almasiihu on (Galaasi 3:16), awa kadi leyyhi aduna on fow barkinte sabu makko e rewrude e makko. Kono ontuma fewndo ko Matta noddiri annabi Iisaa «mo Ibraahiima», yogaabhe e Yahuudiyankeebhe bhen no bugitii on Bhiddho e ko kambhe fempi on timminoowo fodaari ndin. Windoowo on Linjiila on no tentini wonde ko o fuddhotoo windugol deftere nden wondema jamaa annabi Ibraahiima on waawii hendaade baraaji dhin woo si tawii ko e annabi Iisaa bhe rewri. Hande kadi, ko rewrude e makko tun waaweten hendorde baraaji dhin immorde Alla.
TORAARE: Mi sujjanii ma, an Alla Seniidho sabu a subhike yimbhe bonbhe bhen. A subhoraali yimbhe bhen sabu moyyhere mabbhe nden e gomdhinal mabbhe ngal, kono ko sabu moyyhere maa nden e yurmeeende maa nden. Wallito men no men waawira wuurirde gomdhinal wurngal hara ko no yaadiri e noddaandu ndu noddudhaa men ndun no men darora, men tabita, men nyemba misal annabi Ibraahiima ngal, men tawdee e barki timmuki ki men yedhaa kin e innde Iisaa Bhiddho maa on.
LANDAL:
- Ko honno annabi Iisaa wontiri kadi gedhal annabi Ibraahiima?