Fluwa kaan 04 -- Man amun wun Jᴐ amun fↄuun!
Blԑ nga e o nun yԑ’n ti sanganwa. Alԑ kunlԑ’n wo lika’n kwlaa, cԑn’n kwlaa be to alԑ kunlԑ ninnge mun guԑ sran’m be su kԑ nzue b’ↄ su tↄ’n sa. Sran kpanngban be wla a bo be wun, be lafi-man su kԑ aunnjuԑ’n kwla tran lԑ ekun nan ninnge mun be sin be osu nun ekun.
Krist dun mmua kaan kleli e, k’ↄ yo nan ᴐ’a fu-man e nun’n ti : « Amun wa ti alԑ’n i wun ndԑ nin i nganniԑn nán man amun klun titi amun, afin san sa sↄ’m be ′yo… » (Matie 24 : 6).
Sa nglo yilԑ fluwa nun’n, e kԑnngԑn kԑ be leli aunnjuԑ’n asiԑ’n sufuԑ’m be sa nun (sa nglo yilԑ 6 : 4). I afuԑ akpi-nnyᴐn-afuԑ-ya-nso yԑ, Nyanmiԑn seli i nuan ijↄfuԑ Ezai kԑ : « Be nga be bu-man min ndԑ’n like fi’n, bé wun su jᴐ-man be le » (Ezai 48 : 22 ; 57 : 21).
? Wan mun yԑ be bu-man Nyanmiԑn ndԑ’n i like fi-ↄ?
Sran kpanngban be bu be wun kԑ be ti kpa tra be nga mun yԑlԑ kԑ be akunndan’n ti kpa. Wienun-ᴐn be lԑ silԑ annzԑ be lԑ fawlԑ tra e nun kpanngban. Wie’m be bu i kԑ be sa kpakpa nga be yo be’n, be nunnun be sa tԑtԑ mun, nan jↄlԑ dilԑ cԑn’n nun kԑ be wa sunnzun sa kpa nin sa tԑ nga be yoli’n, be ′nyan be ti. Be su laka be wun! Sԑ e fa e wun sunnzun Nyanmiԑn’n, e ti’a like fi. Sran kwlaa ng’ᴐ fԑ i wun sunnzun Nyanmiԑn i kpa b’ↄ ti’n, nin i saun b’ᴐ ti i aunnvuԑ silԑ’n nun’n, ↄ ′kaci awԑnfuԑ nin wun tufuԑ Nyanmiԑn nyrun. ? Wan yԑ an fa amun wun suunzun i-ᴐ?
E blԑ nga nun sran kpanngban be di-man Nyanmiԑn i mmla’m be su afin sa tԑ yolԑ’n ↄ’a kaci be nzuԑn.
« Anannganman ′nian-an, sran’m be klunwi’n kᴐ i nyrun cԑn’n kwlaa. Kԑ aliԑ’n ′cԑn b’ↄ ′san’n, wuun be klun akunndan’n ′yo tԑ kᴐ i nyrun » (Bo Bolԑ 6: 5).
Nyanmiԑn nuan ijↄfuԑ David kpannin se kԑ : « Be kwlaa b’a yaci atin kpa’n, be kwlaa b’a saci. Be nun wie fi yo-man sa kpa bᴐ kun. Ͻ lԑ-man be nun bↄ kun » (Jue mun 14: 3; Rᴐmfuԑ 3: 10 -12).
Kԑ e se yԑ’n, sran mun be yo sa tԑ’n be fia-man kun, nyanzuԑn kun-man be sa tԑ yolԑ’n nun kun, be sisi-a be wun bo sa tԑ yolԑ’n nun kun. Sa tԑ’n yo-a be like fi kun. E mԑn’n ↄ fa Sodↄm nin Gomᴐr yԑ e o be nun wie. E kplin sa tԑ’n su, sanngԑ e si kԑ Nyanmiԑn i ya’n ↄ wa jaso e kwlaa e wun. “Nyanmiԑn nin be nga be tu be wun’n mun lԑ i, sanngԑ yᴐ aenwuԑfuԑ’m be ye” (Zak 4: 6).
Aunnjuԑ’n fin Nyanmiԑn
Anannganman b’ᴐ ti aunnvuԑ sifuԑ’n ↄ yili i nglo kleli i nuan ijᴐfuԑ Ezai kԑ be wa wu ba yasua kun b’ↄ ti i liԑ ngunmin bᴐ ↄ wa yo afᴐtuԑ manfuԑ b’ↄ yo nyԑnmԑn nin aunnjuԑ wlengbi. I famiԑn diwlԑ’n ti wawԑ’n nun liԑ yԑ ᴐ ′ka lԑ tititi (Ezai 9: 6 -7). Kԑ Mari wuli i wa yasua’n Bԑtlehԑm lↄ’n, anz mun be dili aklunnjuԑ yԑ be toli jue see kԑ: “Man Nyanmiԑn manmanlԑ’n tԑ nyanmiԑn su lᴐ, yԑ man sran bↄ Nyanmiԑn klun jᴐ bé wun asiԑ’n su wa’n, bé wun jↄ be” (Lik 2: 14).
Ͻ nin i sↄ’n ngba’n, sran kaan sa yԑ be tikeli be awlԑn’n su be sᴐli Nyanmiԑn i aunnjuԑ nin i aunnvuԑ silԑ b’ↄ lԑ-man wun su’n nun-ᴐn. Sanngԑ Nyanmiԑn i aunnjuԑ b’ↄ wie-man le’n, ᴐ yi be kwlaa nga be sↄ i kasiԑ’m be nun bᴐ be lafi i su’n be awlԑn mun.
Kԑ Krist cԑnnin’n, ↄ fԑli i wun kleli i sᴐnnzↄnfuԑ mun yԑ ᴐ guali be awlԑn su nzue afin srԑ kannin be kԑ be kunnin i’n, ↄ seli be kԑ : “ Man amun wun Jᴐ amun fᴐuun !” (Zan 20 : 19, 21, 26)
Wafa nga Mari i wa yasua’n fa yoli i sᴐnnzↄnfuԑ’m be like’n; i nun yԑ ᴐ fali Nyanmiԑn i aunnjuԑ’n mannin be-ↄ, aunnjuԑ b’ᴐ wie-man’n bↄ kԑ ᴐ kpↄli sran’m be ti’n yԑ ᴐ kpԑli i ba’n, ↄ fa mannin be, afin Nyanmiԑn nuan ndԑ’n kannin kԑ: “Sanngɛ kusu wuun e tukpacɛ’n yɛ ɔ fa suali-ɔ, yɛ e afɛ’n yɛ ɔ fali-ɔ. E liɛ’n e waan wuun Nyanmiɛn su tu i fɔ, e waan wuun ɔ su kle i nyrɛnnɛn, yɛ e waan wuun ɔ su guɛ i nyin ase. Sanngɛ e sa tɛ bɔ e yo be’n be ti yɛ ɔ nyannin kannin mɔnnɛn-mɔnnɛn i wunnɛn’n su-ɔ. E fɔnlɛ bɔ e fɔn’n, i ti yɛ be sisili i wunnɛn nin-ɔn. E fɔ b’ɔ fata kɛ be tu ye nan y’a nyan aunnjuɛ’n, yɛ ɔ tɔli i su-ɔ. Yɛ i wunnɛn i susuwa’n nin i kannin mun be ti yɛ man e yo juejue-ɔ. E kwlaa e ti kɛ bua bɔ b’a bo je’n sa, sran kun fɛ i bɔbɔ klun klo atin, yɛ Anannganman’n fali e kwlaa e fɔnlɛ bɔ e fɔnnin’n i su afɛ’n fa guɛli i su-ɔ” (Ezai 53: 4-6).
Krist wuli nyrԑnnԑn wie waka nda’n su, ᴐ jrannin ye ajalԑ nun, ↄ man ↄ siesieli e nin Nyanmiԑn e afiԑn, kalԑ ng’ↄ fԑ i moja’n tuali’n ti’n, e nin Nyanmiԑn e afiԑn a sԑ yԑ Nyanmiԑn yoli e ye.
Mari i wa yasua’n ᴐ mian-man amun kԑ amun sↄ i wawԑ nun aunnjuԑ’n nun, ᴐ fa mian-man amun; sanngԑ ↄ fa kle amun k’ᴐ yo nan amu’an tu amun klun amu’an sↄ i ye yolԑ’n nun nan amu’an lԑ i ase’n.
Aunnjuԑ’n nun sᴐlԑ
Krist wlԑli i sↄnnzᴐnfuԑ’m be fanngan, ↄ seli be kԑ : “N ′yo man amun wun ′jᴐ amun fↄuun, yԑ amun ′di alaje kԑ min sa. Alaje nga mԑn nunfuԑ’m be yra bé nuan kԑ sran di’n, ᴐ nin n liԑ’n ti’a kun. Nán amun wla bo, nán srԑ kun amun” (Zan 14 : 27).
Aunnjuԑ wlengbi’n ↄ fa i wawԑ nun aunnjuԑ’n cԑ be nga be lafi i ndԑ’n su’n. Sran ng’ᴐ sↄ aunnjuԑ Wawԑ’n nun’n, ᴐ ′kaci “ aunnjuԑ ba yasua annzԑ bla ”. Sunmanfuԑ Pↄl jrannin ndԑ kunngba sᴐ’n su : “ I sↄ’n ti Nyanmiԑn a bu ye sran kpa i su bᴐ e lafi’n ti, ↄ man siԑn’n, e Min Zezi-Krist ti e nin i e afiԑn a sԑ” (Rᴐmfuԑ mun 5 : 1).
Sran kpanngban nga be kunndԑ aunnjuԑ Wawԑ’n, be nyԑnnin yԑ ↄ tran be awlԑn nun titi. E wla amun fanngan kԑ an srԑ Nyanmiԑn m’ᴐn yiԑ i kasiԑ’n nuan amun nun, afin Krist fԑԑ i wun yili sran’m be ti tԑ, ↄ man sran kwlaa ng’ᴐ lafi i ndԑ’m be su’n, ↄ nyan aunnjuԑ bᴐ fin Krist’n yԑ ↄ nyan cԑlԑ ng’ↄ boli i kasiԑ’n.
Aunnjuԑ Wawԑ’n ᴐ kle amun weiin kpa kԑ Nyanmiԑn yoli amun akunndan nin amun awlԑn’n i saun ato bualԑ’n nin sa sukusuku’m be lika. Ͻ yo man amun wla gua ase afin Krist i wulԑ’n ti Nyanmiԑn yacili amun sa tԑtԑ’n kwlaa cԑli amun. Wawԑ sↄ’n, ᴐ ′tran amun nun titi yԑ Krist ti’n, ↄ ′siesie amun nin Nyanmiԑn amun afiԑn, i kunngba’n yԑ ᴐ ′fa Nyanmiԑn i aunnjuԑ b’ↄ wie-man’n man amun- ᴐn.
Man su yralԑ tran be nga be ti ndԑ siesiefuԑ’m be su
Nyanmiԑn Wawԑ’n ↄ yo man klolԑ nin aklunnjuԑ nin aunnjuԑ b’ↄ wie-man, nin aklunye nin awlԑn tralԑ, nin kpa yolԑ, nin sԑsԑ yolԑ, nin wԑtԑԑ yolԑ nin sa nuan su yolԑ’n, be nyin yԑ be trԑ Zezi i sᴐnnzↄnfuԑ’m be awlԑn’n nun (Galasifuԑ mun 5 : 22-23). ? An bu-man akunndan kԑ amun awlԑn’n i konvi sᴐ nzuԑn kpakpa kԑ nga sa mun ? Wawԑ nun nguan ng’ↄ ti saun’n, amun wla o su kԑ amun nyԑn, yԑ i sᴐ akovisuԑ liԑ’n, ↄ ti fiawa amun awlԑn’n nun.
Aunnjuԑ Nyanmiԑn’n ᴐ klo kԑ ↄ kaci amun nan an kaci aunnjuԑ manfuԑ afin lika nga amun tranlԑ’n ti saciwa. Sran ng’ᴐ sↄli Nyanmiԑn i aunnjuԑ’n nun’n, ᴐ kwla fa cԑ sran uflԑ. Sran nga Nyanmiԑn yacili i sa tԑ mun cԑli i’n, i kusu kwla yaci be bↄ be yo i tԑ’n, be wun sa liԑ’n cԑ be. Krist klo kԑ ᴐ fԑ i aunnjuԑ’n man wↄ osufuԑ mun, wᴐ suklu nunfuԑ mun yԑ wↄ janman diwlԑ lᴐfuԑ mun. Nán an tu amun wun junman nga an di i asↄnun nun’n ti, afin Mari i wa yasua’n ᴐ yo man amun kaci wun ase kanfuԑ nin wԑtԑԑfuԑ kԑ i bↄbᴐ fa trannin e afiԑn wa’n sa. Krist suli sran kpa mun nin sran tԑ mun. Sran kwlaa ng’ↄ fԑ i ja osu’n su’n, ᴐ tu-mԑn i wun sanngԑ ↄ yo sran’m be sufuԑ kԑ Krist bᴐbↄ sa.
Su yralԑ ng’ᴐ fin Nyanmiԑn’n, sunmanfuԑ Pↄl yrԑli i nuan kԑ man Filipfuԑ mun be nyԑn. Su yralԑ sᴐ’n ti amun liԑ wie yԑlԑ kԑ amun su e Min’n nin aklunnjuԑ : “ Yԑ ↄ man amun wun ′jᴐ amun fↄuun, amun su wun-man sa ti bᴐ amun wun jↄ amun fᴐuun sↄ’n i bo mlↄnmlᴐn. Aunnjuԑ sↄ’n man amun wla su bo-man yԑ amun akunndan’n su sangan-man sran wunmuan bᴐ amun nin Krist-Zezi ti’n ti. ” (Filipfuԑ mun 4 : 7)
?An klo kԑ amun nyan Nyanmiԑn i aunnjuԑ’n?
Sԑ ᴐ ti amun klun su’n, an klԑ ye fluwa. E fa Krist i Jasin Fԑ’n nin srԑwa wie mun nin fluwa uflԑ mun bↄ be wa uka amun Nyanmiԑn ndԑ’n i akunndan bulԑ nun’n e blԑ amun yԑ amun wa jran kekle Nyanmiԑn i aunnjuԑ’n nun.
An kan Nyanmiԑn i aunnjuԑ’n i Jasin Fԑ’n kle amun tranfuԑ nin amun jannvuԑ mun
Kԑ Krist guԑ i like klelԑ’m be bo sa: “ N kԑnnin i kwlaa sᴐ kleli amun nan amun wun‵jↄ amun fᴐuun sran wunmuan bↄ min nin amun y’a kaci’n ti. Amun wa wun amun nyin su kpa, sanngԑ an ‵tra amun awlԑn, mԑn nga nun wa’n, min yԑ n kwlaa-ᴐ” (Zan 16 : 33).
Sԑ fluwa nga i nun ndԑ’n kannin amun awlԑn’n yԑ sԑ amun nyannin ukalԑ nun’n, yԑ sԑ an klo kԑ an fa man amun jannvuԑ nga be sa a mian Nyanmiԑn i aunnjuԑ’n i wun’n, an klԑ e fluwa yԑ e ′blԑ amun fluwa nga wie an ′fa cԑ be. An klԑ amun adrԑsi’n i weiin kpa.
WATERS OF LIFE
P.O. BOX 60 05 13
70305 STUTTGART
GERMANY
Internet: www.waters-of-life.net
Internet: www.waters-of-life.org
e-mail: info@waters-of-life.net