Waters of Life

Biblical Studies in Multiple Languages

Search in "Peul":
Home -- Peul -- Matthew - 014 (Jesus' birth)
This page in: -- Arabic -- Armenian -- Azeri -- Bulgarian -- Chinese -- English -- French -- Georgian -- Hausa -- Hebrew -- Hungarian? -- Igbo -- Indonesian -- Javanese -- Latin? -- PEUL -- Polish -- Russian -- Somali -- Spanish? -- Telugu -- Uzbek -- Yiddish -- Yoruba

Previous Lesson -- Next Lesson

MATTA - Tuubee ko fii laamu Almasiihu on ngun bhadike!
Jandeeji suutaadhi ka Linjiila Almasiihu on no Matta yottiniri mo non
SOBBHUNDU 1 - Piiji arani dhin ka golle Almasiihu on (Matta 1:1 - 4:25)
A - Fii jibineede annabi Iisaa e paykunyaagal makko ngal (Matta 1:1-2:23)

2. Fii jibineede Iisaa nden e fennyineede innde makko nden (Matta 1:18-25)


MATTA 1:18
18 E hino no Iisaa Almasiihu on jibiniraa. Tawi ko Yuusufu yhami Mariyama yumma makko. Ado bhe yiidude, tawi kanko jiwo on ko o sowiidho e dow bawgal Ruuhu Seniidho on.

Yumma Mariyama debbo mo andaali gorko on luttii wonude humiidho e ko Alla daali kon gila e cukaaku makko. No o yaltinirta non mantooje dhen no holli wonde himo andunoo fota ko windii kon e ko hiitaa kon ka defte Ahadi Hindi ndin. Ruuhu-Seniidho on wahayinii mo seeditoore labaande fii mangu e faamu e kuudhe tiidhudhe hawniidhe dhe Alla huuwata dhen. Yumma Mariyama wano yogaabhe e sukaabhe jiwbhe bhen fewndo on saa’i no habbinoo pellet hebhugol dewgal yaadungal e faale bhernde mabbhe nden. Hari himo weltii fii ko minisiyeejo on yhami mo kon. Hari yhamal ngal no yhettiraa ka jamaa mo Ahadi Hindi ndin wa anniye laabhudho. Ko dhun wadhi si Yuusufu no noddireede «moodi makko» (v. 19) kanko yumma Mariyama hino noddireede «bheyngu makko» (v. 20).

Ko debbo mo andaa gorko jibini Almasiihu on, kono on debbo ko yhamaadho:

  • Fii no dewgal ngal labbhiniree e no «mo kala teddinira dewgal ngal» (Yahuudiyankeebhe 13:4), fii wota bhe wattan yili e jandeeji jinna yamiroyaydhi dhin wonde «wota dewgal wadhu» (1 Timotee 4:3).
  • Fii wota teddungal ngal Jiwo barkinaadho mo andaaa gorko on ngal tuunine. Hari hino haani ka reedu ndu o yhetti ndun rentiree gorko yhamudho mo on. Haray dhun hisinii mo sikkitaare e toonye yimbhe bhen.
  • Fii no yhamudho mo on wonirana mo ardotoodho ka cukaaku makko, e wondiddho fii ittangol mo wulaa, o dhowta mo e nder yaadu makko ndun, o wonana mo yaadeteedho fii ko ayna mo e ko tambitoo mo.
  • Tun nde wootere, o hendii nelal immorde malaa’ikaajo wi’eteedho on Saydinaa Jibiriilu, on wi’i mo wonde Alla subhike mo fii jibingol bhiddho immorde e Ruuhu makko Seniidho on. Kon ko o humpitaa dimbi mo kanko yumma Mariyama, kono himo gomdhi ko Alla daali koo, ko o yankiniidho. Yhettugol makko ngol reedu hinaa e faale neddhanke iwri, sabu Ruuhu-Seniidho on no wonani hoore mun seniidho. Kala yewtere wi’ude wonde Allaahu on yhettii yumma Mariyama ko wonana mo debbo, on jiidoo bhiddho, haray ootigi tiwii tiwande nde yaafetaake. Sikke woo alaa wonde gandal fewndiingal ngal hande yeddaali wonde debbo mo andaa gorko no waawi jibinde, hara baabiraawo iwrudho ka aduna tawaaka. Nden huunde ko clonage humain noddirtee hande. Kono dendaangal bhen jibinaabhe kesun immorde Ruuhu Seniidho no anditi fii on gundoo, hibhe jabhi fii ko annabi Iisaa jibiniraa kon rewrude e yumma Mariyama Jiwo mo andaa gorko on.

Mariyama no mantude Alla fii ebbhoore makko labaande nden. Kono nden huunde ko nhaldhinde no woniri woo. O sikkaano wondema Yuusufu faamayno kon ko o sifantoo mo. O fanki fii dhin piiji, o hoolii Alla. O tampi, o torii Alla, himo andi wonde o jogorte wa cagaajo, hino weebhi ka o fidhee kaayhe tippude e ko sariya annabi Muusaa on yamiri kon. O fawi hoolaare makko nden e Dandudho mo on, rewrude e gomdhinal ngal, o wadhi ko laatotaako kon no laatora: yo Bhiddho Alla on wontu neddho rewrude e bhandu makko ndun. Tippude e gomdhinal makko mawnugal ngal, yimbhe aduna on fow no teddini fii makko. Gomdhinal yumma Mariyama ngal ebbhaniino mo no o laatora sakkitiidho on humidirde nantubhe bhen innde ka gomdhinal e nder taariika fii iwdi annabi Iisaa ndin.

TORAARE: Mi sujjanii ma yaa an Alla poomayankeejo sabu a huutorii Ruuhu maa on no yumma Mariyama Debbo mo andaa gorko on wonira sowiidho. Hakkile an dhen gaynataa faamude on kaawake hawniidho, kono mi yettii ma fii ko jibinirdhaa mi kon immorde ruuhu on. Wano non mi waaway faamude ma, mi faama Bhiddho maa on e Ruuhu-Seniidho on wondude e kuugal maa ngal.

LANDAL:

  1. Ko honno faamirdhon fii no yumma Mariyama sowori non bhiddho on immorde e Ruuhu-Seniidho on?

www.Waters-of-Life.net

Page last modified on May 18, 2012, at 08:56 AM | powered by PmWiki (pmwiki-2.3.3)