Waters of Life

Biblical Studies in Multiple Languages

Search in "Cebuano":
Home -- Cebuano -- Romans - 049 (Paul’s Anxiety for his Lost People)
This page in: -- Afrikaans -- Arabic -- Armenian-- Azeri-- Bengali -- Bulgarian -- CEBUANO -- Chinese -- English -- French -- Georgian -- Hausa -- Hebrew -- Hindi -- Igbo -- Indonesian -- Malayalam -- Polish -- Portuguese -- Russian -- Serbian -- Somali -- Spanish? -- Telugu -- Turkish -- Urdu? -- Yiddish -- Yoruba

Previous Lesson -- Next Lesson

ROMA - Ang Ginoo maoy atong Pagkamatarong
Mga pagtuon sa Sulat ni Pablo sa Roma
PARTE 2 - ANG PAGKAMATARONG SA DIOS WALAY PAGKA-BALHIN BISAN PA SA PAGKATIG-A SA MGA ANAK NI JACOB, ANG IYANG MGA PINILI (Roma 9:1-11:36)

1. Ang kabalaka ni Pablo sa iyang mga katawhang nahisalaag (Roma 9:1-3)


ROMA 9:1-3
1 Matuod ang giingon ko nga iya ako ni Kristo ug wala ako mamakak. Ang akong konsensya nga gilamdagan sa Espiritu Santo maoy akong saksi nga wala ako magbakak. 2 Gibati ko ang hilabihang kasubo ug kaguol nga walay hunong alang sa akong isigka-Judio—mga kabantay ug mga kadugo ko. 3 Tungod kanila palabihon ko nga tunglohon ako sa Dios ug mahimulag kang Kristo.

Si apostol Pablo nagsugod sa iyang pagpasabot sa situwasyon sa pagmagahi sa mga Judio, nga iyang mga katawhan, gamit ang dili kasagarang mga pulong: “Akong isulti ang kamatuoran kang Kristo”.

Wala siya maghatag ug pilosopiya, o kaugalingong panlataw, apan nagpahayag sa pait nga kahibalo ug kasiguruhan human misinati ug mga pag-antos, nga wala naggikan sa iyaha, apan sa iyang pagpabilin ni Kristo.

Wala siya mipa-ambit sa iyang kaugalingong tinuohan kanato, kondili si Hesus ang nagsulti pinaagi kaniya, tungod kay ang Ginoo mao ang espirituhanong pangulo, ug ang iyang mga sumusunod mao ang iyang espirituhanong lawas ug iyang naglihok nga mga membro.

Si Pablo nagkonpirma sa mga magbabasa sa iyang sulat nga ang iyang sincerong pagsugid matuod, pinaagi sa mga pulong, “Ako nagsulat uban sa akong konsensyang saksi diha sa Balaang Espiritu”. Ang akong Kristo ang manluluwas, kinsa ang Espiritu sa kamatuoran nagapanglihok.

Ang espiritu wala magtugot sa pagpamakak, pagtuis, paglikay, o imahinasyon, apan andam ug mogiya sa mga sumusunod ni Kristo aron mahimong saksi sa kamatuoran aron ang ilang mga pamahayag mahisubay sa balaud ug hamtong.

Ang konsensya sa apostol mao ang iyang espirituhanong kompas. Wala siya nagpanglihok nga nag-inusara uban sa iyang emosyon kay ang iyang kasingkasing gibag-o na ug gitugyan na ubos sa direksyon sa Balaang Espiritu.

Kining balaang Espirito nagpamatuod sa kalinaw sa iyang konsensya ug sa iyang mga pulong nga matin-aw sama sa crystal. Mao nga ang iyang testimonya matuod gayod.

Unsa man dayon ang pagtestigo ni Pablo human niining maong konsiderasyon? Gipamatud-an niyang aduna siyay dakung kaguol alang sa iyang mga masinupakong katawhan. Ang apostol makanunayon gayong mibati ug labihang kaguol alang sa iyang hinigugmang kaigsoonan ug mga higala.

Kini nga tumang kaguol, tungod sa nagpadayong espirituhanong pagmagahi sa iyang nasud, padayon niyang gidaladala sa iyang kasingkasing.

Nahasol ang iyang kasingkasing nga daghan sa iyang mga katawhan ang espirituhanong buta ug dili makaila sa espirituhanong kamatuoran nga gipadayag na kanila.

Mao nga, ang apostol nagtinguha gayud sa pagluwas kanila, apan sila ang dili gustong maluwas, tungod kay nagtuo na sila nga matarong na sila, ug mao nga dili na sila nagkinahanglan sa kaluwasang gihisgutan ni Pablo.

Ang kaguol ni Pablo misangko sa iyang pagtinguhang malaglag ug pas-anon ang silot alang sa iyang katawhan, kon kini lamang ang paagi aron sila maluwas. Ang iyang gugma sa iyang katawhan daku kaayo nga gusto na niyang isalikway siya ni Hesus, iyang manluluwas, kon kini lamang ang makatabang sa ilang kaluwasan.

Gilantaw ni Pablo ang iyang nahisalaag nga katawhan isip iyang pamilya ug tribu. Iyang giila sila nga mga kaliwat ug igsoon, kay managsama lamang ang ilang gigikanan. Andam siyang motugyan sa tanan aron lang sila maluwas sa kasuko sa Dios.

PAG-AMPO: O Ginoong HesuKristo, mihilak ka tungod sa Jerusalem (Lukas 19:41), ug nag-antos tungod sa pagkamasupilon ug pagkatig-a sa imong mga katawhan, apan imong gipasaylo sila sa ilang mga kasal-anan ibabaw sa Krus sa dihang mi-ampo ikaw, “Amahan, pasayloa sila, kay wala sila masayod sa ilang gibuhat” (Lukas 23:34). Tabangi kami, O Ginoo, sa paghigugma sa among mga katawhan, andam mo-antos sa ilang padayong walay pagtuo, ug mag-ampo alang kanila, ingon man usab alang sa mga anak ni Jacob, nga sila magmatinud-anon sa pagbasol, moila kanimo, ug modawat kanimo. Amen.

MGA PANGUTANA:

  1. Unsa ang rason sa lawom nga kasubo ni Pablo?
  2. Unsa ang giandam ni Pablo aron isakripisyo alang sa kaluwasan sa iyang katawhan?

www.Waters-of-Life.net

Page last modified on June 21, 2013, at 11:17 AM | powered by PmWiki (pmwiki-2.2.109)