Previous Lesson -- Next Lesson
5. Ðo to wò dziɖuɖumegãwo (Romatɔwo 13:1-6)
ROMATƆWO 13:1-6
1 Ele be ame sia ame naɖo to dziɖulawo, elabe dziɖuɖu aɖeke meli, si menye Mawue ɖoe anyi o. Dziɖuɖu siwo li la, Mawu ŋutɔe ɖo wo anyi. 2 Eya ta ne ame aɖe tsi tre ɖe dziɖuɖu ŋu la, etsi tre ɖe nu si Mawu ɖo anyi la ŋu. Ame siwo awɔ esia la, woawo ŋutɔ ana be woadrɔ̃ ʋɔnu wo. 3 Ame siwo wɔa nu nyui la, mevɔ̃a dziɖulawo o; nuvɔ̃ɖi wɔlawoe vɔ̃a wo. Èdi be ame si le dzi ɖum la, megado ŋɔdzi na ye oa? Ekema wɔ nu nyui, ne wòakafu wò. 4 Dziɖula nye Mawu ƒe dɔla hena wò nyui, ke ne èwɔa nuvɔ̃ɖi la, vɔ̃ eyama, elabe wona ŋusẽe be wòawɔ eŋudɔ ale si dze. Mawu ƒe dɔtsɔla wònye be wòahe to na nuvɔ̃ɖi wɔlawo, atsɔ aɖe Mawu ƒe dziku afia. 5 Le esia ta la, ehiã be ame nabɔbɔ eɖokui na dziɖuɖu, menye esi Mawu magado dziku ɖe eŋu ta ɖeɖe ko o, ke boŋ esi amea ƒe dzitsinya na wònya nu si dze be wòawɔ la hã ta. 6 Susu sia ta ke hãe miedzɔa duga ɖo, elabe dziɖulawo nye Mawu ƒe subɔla, siwo kpɔa nya siawo gbɔ.
Ame geɖe kpea fu le nyaʋiʋli siwo le akpa vovovowo dome, subɔsubɔhakplɔlawo ƒe amebeble, dziɖuɖu madzɔmadzɔ, kple zitɔtɔ si me susu mele o ta. Dziɖuɖu deblibo aɖeke mele xexe sia me o, elabena ame aɖeke mele xexe sia me si me nuvɔ̃ mele o. Eyata gbɔ dzi ɖi na wò dziɖuɖua, abe alesi Mawu gbɔa dzi ɖi na wò kple wò ƒomea ene.
Apostoloa kpɔe be dziɖuɖu aɖeke meli si ɖua eƒe amewo dzi ne Mawu meɖoe o. Dziɖuɖu sia abu akɔnta le ʋɔnudrɔ̃la mavɔ la ŋkume, eye ɖewohĩ dukɔ nufitifitiwɔla dze na dziɖuɖu nufitifitiwɔwɔ.
Ne èku nu me yi ŋgɔe le nya siwo apostolo la gblɔ na Trɔ̃subɔlawo me la, àkpɔ nyagbɔgblɔ wɔnuku aɖewo:
Apostolo Paulo yɔ dziɖuɖua zi eve be “Mawu ƒe dɔlawo.” Ne wotsɔ nunya kple ŋusẽ ɖo se kple dzɔdzɔenyenye ƒe ŋusẽwo anyi la, Mawu ayra woawo kple eƒe amewo. Gake ne womewɔa nu dzɔdzɔe eye woda le nyateƒea dzi to zãnu xɔxɔ me o la, Mawu ahe to na wo. Eye le woƒe yɔyɔ nu la, dziɖuɖua teƒenɔlawo nye Mawu subɔlawo, eye wole eƒe ametakpɔkpɔ te alo le eƒe fɔbubu te.
Yesu ƒo nu tso nya sia ŋu, eye wòbu amegbetɔ ƒe agbanɔamedziwo ŋu ku ɖe adzɔxexe ŋu, hegblɔ be, "Eyata mitsɔ nusiwo nye Kaisaro tɔ na Kaisaro, eye mitsɔ nusiwo nye Mawu tɔ na Mawu" (Mateo 22:21). Kristo, le nya sia gbɔgblɔ me la, ena amegbetɔ ƒe agbanɔamedzie wònye be wòawɔ eƒe dɔwo kple ɖokuitsɔtsɔna dziɖuɖua eye wòahe ɖe megbe o. Le ɣeyiɣi ma ke me la, eɖo seɖoƒe na dziɖuɖua ƒe ŋusẽ. Ne ŋusẽtɔ aɖe tsi tre ɖe Mawu kple Eƒe sededewo ŋu, alo bia be wòabɔbɔ ɖe mawu bubu ŋkume la, ele be ame natsi tre ɖe ŋusẽ ma ŋu, elabena ele be wòaɖo to Mawu tsɔ wu be wòaɖo to amewo (Dɔwɔwɔwo 5:29), ne tsitretsiɖeŋu sia, le ame ƒe xɔse ta, hea ame nyanya, funyafunyawɔwɔ, alo ku vɛ gɔ̃ hã. Eye xɔsetakukula siwo do gbe ɖa ɖe woƒe dziɖuɖuwo ta, gake wometsi tre ɖe woƒe sedede siwo tsi tre ɖe Kristo ƒe Gbɔgbɔ ŋu o la ƒe ʋu de tsi dukɔ siwo ƒo xlã Mediterranea-ƒua la me.
Biblia gblɔ na mí be le ŋkeke mamlɛawo me la, Kristo ƒe Futɔ la atso abe dziɖula si aɖu fia ɖe xexeame ƒe dukɔwo katã dzi, abia be woabɔbɔ ɖe ye ŋkume ɖe Fofo la, Vi la, kple Gbɔgbɔ Kɔkɔe la teƒe. Wobua amesiame si doa gbe ɖa ɖe eta be etsi tre ɖe eƒe didi siwo tsi tre ɖe Mawu ŋu, eye wòle ku veve aɖe lalam. Enyo na wò be nàkpe fu ɣeyiɣi kpui aɖe tsɔ wu be nàtsrɔ̃ tegbee.
Enye míaƒe gbɔgbɔmedɔ hã be míado gbe ɖa ɖe míaƒe dziɖuɖu kple míaƒe Dukplɔsea kple gomenɔamesiwo ƒe emevava ta, elabena Mawu ƒe amenuveve koe ame siwo le ŋusẽnɔƒewo ate ŋu awɔ nyui.
GBEDODOƉA: Aƒetɔ Yesu, èɖo to Mawu Fofowò wu amewo, eye esia tae woklã wò ɖe ati ŋu ɖo. Kpe ɖe mía ŋu míado gbe ɖa abia míaƒe dziɖuɖuwo ƒe nyonyo, eye nàna dzi nanɔ mía ƒo míatsi tre ɖe wo ŋu ne wozi mía dzi be míagawɔ nuteƒe o eye míawɔ vɔ̃.
NYABIASE:
- Seɖoƒe kawoe dziɖuɖu ɖesiaɖe ƒe ŋusẽ se ɖo? Nu ka tae wòle be míaɖo to Mawu tsɔ wu be míaɖo to amewo?