Previous Lesson -- Next Lesson
3. Ang Balaan nga Kahayag Nidan-ag
Ang mensahe sa pag-abot sa Balaan nga Kahayag dili usa ka misteryoso nga diosnon nga konsepto. Hinonoa, kini, ang saad sa Dios nga gihatag Niya sa mga amahan sa pagtuo. Basaha ang mga tudling sa Ebanghelyo aron ikaw mismo makahukom sa imong kaugalingon nga ang Dios mao gayod ang nagtusok sa kangitngit sa atong kalibutan, nagpadangat kanato sa Iyang kahayag.
Minahal nga Magbabasa, naamgohan ba nimo nga ang Balaan nga Kahayag nagsidlak sa lawom nga kangitngit sa atong kalibutan? Ang kagabhion nahulog sa Herusalem ug sa mga utlanan niini. Ang tanang buhing binuhat nahikatulog gawas sa usa ka grupo sa mga magbalantay nga nagpadayon sa ilang gabiing pagbantay sa uma.
Sa kalit lang, ang mga langit naabli ug ang usa ka masiga nga kahayag nagsidlak libut kanila ug nagdan-ag sa kagabhion ug maoy nakapahadlok sa mga magbalantay. Ang nakapadako sa ilang kahadlok mao ang hitsura sa Anghel sa Ginoo sa ilang atubangan sa masidlak nga kasanag. Ug ang himaya sa Ginoo nagsidlak libot kanila. Nangatumba sila, nakugang ug ang ilang mga mata nabuta. Mao na kini ang Adlaw sa Pagkabanhaw ug Adlaw sa Paghukom, maoy ilang nahunahunaan! Nahigmata ang ilang mga sala, nag-akusar kanila atubangan sa ilang natulog nga mga konsensya. Ang ilang bug-os nga kinabuhi nabuksan sa pagkahubo sa ilang atubangan. Sila nangahadlok sa hilabihan ug nangurog sa kalisang. Apan ang Anghel sa Ginoo nagsulti kanila nga dili mahadlok, nagpahibalo kanila sa hinay: “Ayaw kahadlok!” Mianhi ako uban ang mensahe kaninyo nga karon natawo ang usa ka Manluluwas nga mao ang gisaad nga Kristo, gisaad sa Dios pinaagi sa Iyang mga propeta. Siya ang kaluoy gikan sa katawhan sa maluluy-on nga Dios, ang Usa nga nagaluwas gikan sa Adlaw sa Paghukom sa tanan nga magasalig Kaniya.” Makit-an usab nimo niining mensahe ang sekreto sa kalamdagan: Si bisan kinsa man ang maghinulsol sa iyang kasal-anan sa atubangan sa Dios, mapuno sa kalipay sa langit. Ug si bisan kinsa nga makadawat sa pulong sa Ginoo sa iyang konsensya maamgohan ang kalipay sa gihatag nga libreng gihatag kaluwasan.
Sa ingon, ang mahigugmaong Dios nag-andam alang kanimo sa usa ka dakong kaluoy. Ikaw mismo ang iyang gipamulongan; dili ka Niya isalikway ni gub-on ka apan ipadayag kanimo ang Iyang katuyoan sa pagluwas.
Nasabtan mob a ang sikreto sa kinabuhing dayon? Si Kristo natawo sa kuwadra sa usa ka kabos nga pasungan. Siya nagsul-ob sa dagway sa tawo sa usa ka ubos nga dapit aron ang tawo dili moingon: “Gisalikway ako tungod sa akong pagkadautan kaayo ug gamay ra ako kaayo alang sa gugma sa Dios kanako.” Dili! Kay si Kristo mismo natawo sama sa usa ka kagiw, gisalikway sa katilingban aron mahatagan ang matag usa nga nawad-an sa paglaum ug usa ka pagkaamgo nga ang Dios muduol kaniya, ug suod kaniya ug nahigugma kaniya sa personal.
Sa usa ka palasyo sa Ottoman Sultan sa Istanbul makita nimo ang naggilakgilak nga duyan alang sa mga masuso sa magmamando nga gihimo sa lunsayng bulawan. Gidekorasyonan kini sa naggilakgilak nga mga mutya. Ang mga ngalan sa mga prinsipe nga nag-okupar niining duyan wala mailhi sa kalibutan, ug kining walay sulod nga duyan nga bulawan nahimutang sa suok sa usa sa mga museyo.
Apan ang mapaubsanon nga si Kristo nga natawo sa usa ka kabus nga pasungan nailhan latas sa mga gatusan ka tuig tungod kay siya ang tinuod nga ilhanan sa Dios, ang naghimo og milagro sa karon nga panahon. Andam siya nga kuhaon ka sa imong pagkahisalaag; pagawason ka gikan sa mga gapos sa sala ug tubson ka gikan sa kadautan sa kalibutan. Siya maghatag kanimo sa kinabuhing dayon.
Ang mga anghel sa Dios nalipay sa dihang natawo si Kristo. Ang ilang kahayag misanag diin ang mga nahadlok nga mga magbalantay sa karnero naglingkod. Ang diosnon nga kahayag nagkulit sa kailadman sa ilang mga binuhat ang talagsaong kahibalo nga ang gisaad nga si Kristo miabot, ug nga ang propeta miabot nga labaw pa kang Moises, natawo ang hari nga walay katapusan nga labaw pa kang David. Wala siya mianhi uban ang mga hinagiban sa kalaglagan, apan uban ang gugma aron mabuntog ang kamatayon, ang sala ug si Satanas. Gidala niya ang tanan nga awtoridad sa Dios, tungod kay natawo Siya sa Iyang Espiritu ug Siya ang Pulong sa Dios nga nahimong tawo.
Ang panon sa magtutuo karon nagsugid sa tumang kalipay nga si Hesukristo ang ilang kaugalingong Manluluwas, ang nag-inusara nga epektibo. Ang ilang mga mapasalamaton nga kanta sa pagdayeg mipataas matag adlaw gikan sa atong kalibutan ug gibag-o ang halapad nga kawanangan nga bisan ang mga bituon ug mga planeta nagsulti sa himaya sa Dios ug gimantala ang Iyang presensya ug gahum sa pagluwas, nagdayeg ug nag-ingon:
Sa dihang ang mga anghel mibiya sa mga magbalantay sa karnero, ang kangitngit sa makausa pa mikanaog. Apan nanindog sila dayon ug nangadto sa Betlehem aron pagtan-aw sa nahitabo. Sila nagdali sap ag-adto ug nangapandol sa kangitngit sa kagabhion, apan sa ilang kahiladman misulaw kining bag-ong katingalahang kahayag. Nakit-an sa mga magbalantay ang dapit, diin si Hesus natawo ug ang ilang mga kasingkasing napuno sa kalipay. Nakita nila ang bata nga naghigda sa usa ka pasungan ug sila miluhod ug misimba Kaniya. Sa pagkahuman nila, sila mipauli luyo sa kangitngit sa kagabhion nga nanag-awit ug sa pag-abot nila sa balangay ilang gisulti sa mga katawhan ang pagpakita sa anghel kanila, ug nga sila nakakita sa bata sa kwadra sa Betlehem. Ang mga tawo naglingo-lingo sa ilang mga ulo ug naghunahuna bahin sa ilang nadunggan. Sama kini sa usa ka tinumotumo nga sugilananon. Walay usa kanila nga mituo sa ilang nadunggan bahin sa pagpakatawo sa Pulong sa Dios. Wala sila magdali pag-adto sa bata sa pasungan aron moyukbo sa atubangan Niya. Nianang higayuna, ang mga magbalantay sa karnero nakaamgo nga ang kaluwasan giandam alang sa tanang mga tawo. Apan, dili tanan midawat sa mensahe sa Dios. Kadto rang nagtuman sa tawag ang nalamdagan niini. Sa walay pagduha-duha ang mga magbalantay sa karnero nahibulong nga wala silay makita nga bisan unsang bahandi o himaya o kahalangdon nga naglibot sa bata. Apan mituo sila sa Pulong sa Dios nga nahimong tawo, ang usa nga Gisaad, nga naghigda sa usa ka mapaubsanong pasungan.
Ang tibuok kalibutan dili na pareho kaniadto sukad sa pagkatawo ni Kristo. Ang tanan nga misunod Kaniya nagsugod pagmatyag sa usa ka bag-ong kalendaryo pinasikad niining talagsaong panghitabo nga nagbag-o ang kasaysayan sa tawo.