Mobile device - Print - Bottom

Previous Lesson -- Next Lesson

a) Jiiñ yi ñu taqal Yeesu ci ne buur la teg boppam (Yowaana 18:28-38)

---

YOWAANA 18:28-32
28 Ba loolu wéyee, ñu jële Yeesu ca Kayif, yóbbu Ko ca kër boroom réew ma. Ci waxtu njël la woon. Waaye Yawut ya yéeguñu ca taaxum kow ma. Dañoo a taq sobe, ngir an a lekk ca ñamu màggalu jéggi ba. 29 Looloo tax Pilaat, boroom réew ma génn, dajeek ñoom. Mu laaj leen ne: "Lu tax ngeen di jiiñ waa jii?" 30 Ñu tontu ko ne: "Bu defuloon lu bon, kon dunu la Ko jébbalsi." 31 Pilaat ne leen: "Jëlleen Ko, yéen, te àtte Ko ci seen yoon." Yawut yi ne ko: "Yoon mayu nu, nu àtte nit; teg ko dee." 32 Noonu la Kàddug Yeesu gi ame ci li Mu misaaloon ni Mu war a faatoo.

Am na ay Yawut yu doon mébét a faat Yeesu ba mu fajee laago ba ca Betesda (5 : 18), te fekk itam ña ëpp ca kilifa Yawut ya dogaloon nañu deewam, ba Mu dekkalee Lasaar (11 : 46).

Alxames ca guddi, Kureel ga woote ñaari ndaje yu am solo. Yowaana waxu ci dara (Macë 26 : 57-67 ak 27 : 1) ndaxte yu sew yooyu, Yawut yi lañu soxaloon, waaye du Gerek yi. Yowaana dafa ŋoy ci àtte bu jubadi bi ñu teg Yeesu, te jawrinu àttekati waa Rom ji dogal ko ; moom Pilaat ma këram ga tiimoon Kër-Yàlla ga. Moom kese moo manoon a dogal deewam, mbaa ñu yewwi Ko, goreel Ko.

Yawut ya, ba ñu ràññee seen Musalkat bi, ñu rocceeku ngir bañ a taq sobe, bu ñu duggee ci këru yéeféer. Dañoo bëggoon a sàmm seen cellaayu diine cosaan, ngir man a bokk ak seeny waajur ca màggalu mbotem jéggi ba, fekk nag ñungi fexe rey mbotem Yàlla.

Ca saa su am solo soosu ñuy jàppe Yeesu, ay coppite yu dëgër am nañu ci dundu Pilaat. Kenn ci naataagoom yi, di ab seneraalu waa Rom, Cesaar tekkiwoon na ndombal tànkam ndax la mu doon waajal ab yëngu fippu. Seneraal boobu ànduloon ak Yawut ya, te Yawut ya ñoo feeñal luqnjuur gi. Noonu kilifteefu Pilaat daldi ci wàññeeku lool, ndaxte ku ñàkkoon worma ci yawut yi lawoon. Dafa leen a bañoon te daan leen sonal.

Ba ñu ko indilee Yeesu, gowernóor ba génn ngir xam la Yawut la dogaloon. Yàqu ca jotam sax ngir xam la ñu bëggoon. Pilaat ay reeyi ñaawalaate la teeroo Yeesu. Ab buur bu yorul ngànnaay, yorul gawar, te di dugg ci Yerusalem, amul lu muy war lu dul cumburu mbaam ; koku kay tiitalul nguuru Rom. Waaye mu nangul Yawut ya la ñu bëgoon, ndax lañu ko mayuloon jàmm. Batalewoon na leen ab kilifa soldaar ngir ñu man a jàpp Yeesu. Seen rëbb ba sooyul : Jàpp nañu waa ja. Waaye , terewul Pilaat laajte ne: «Lu ñu Ko jiiñ?»

Magi Yawut ya booloo ne: «Xam nga la nu waxoon ci ay mbiram. Nit kii, ab bóomkatu politik la, te fippukat la. Soxlawunu ko fi. Ñówunu fii ngir seetsi la ci turu askan wi. Rey Ko moo nu tax a jóg, ngir askan wi man a nekk ci jàmm.»

Pilaat xamoon na njuuj-njàccu Yawut yi, ak seeni njoort yu ñaaw, te leeroon na ko ne jiiñ gi, ci seen diine la aju, ak ci Almasi bu am kàttan, bi nuy séentu. Yeesu waxul, deful, dara lu ñaaw bu nu xoolee ci Yoonu Rom. Noonu, mu delloo leen Yeesu, te ne leen nañu Ko àtte ci seen Yoon, ñoom ci seen bopp.

Ca jamono jooja Yawut yi amuñu woon sañ-sañu dóor ay xeer ña daan moy Yoon wa. Dañoo bëggoon a toro Yeesu cib àtte bu siiw, bu jaar ci loxoy waa Rom, yi ñu jàppe ni ñu selladi. Noonu, mu man a am àtte bi gën a tar, maanaam bi ñu jagleel jaam yi, ak bóomkat yi, te ñu daaj ko ci "bant bu araam bi". Li doon tekki ne Yeesu du Doomu Yàlla, ju am kàttan ji te jub, waaye ab néew-doole dooŋ la, te man a sosal Yàlla. Kayif dafa Koo bëggoon a reylu ci kurwaa bi jaare ko ci loxoy waa Rom yi ngir wone ne du Almasi bi, waaye ab naxaatekat la buy yóotu nguur.

YOWAANA 18:33-36
33 Gannaaw loolu, Pilaat duggaat ca taaxum kow ma, woo Yeesu ne Ko: "Ndax yaa di buuru Yawut yi?" 34 Yeesu tontu ko ne: "Ndax yaa ko xalaat, wax ko, walla dañu la ko xelal ci man?" 35 Pilaat ne ko: "Mbaa xalaatoo ne man Yawut la? Sa xeet ak sa saraxalekat yu mag yi ñoo ma la jébbal. Lan nga def?" 36 Yeesu tontu: "Bu sama kilifteef nekkoon àddina, sama surga yi dinañu xeex, ngir bañ ñu jébbal ma Yawut yi. Waaye sama killifteef nekkul àddina."

Soldaar yi dugal Yeesu ca dalukaayu jawrin ja. Ba Pilaat dégloo jiiñi Yawut ya ba noppi, mu bëgg a dégg nag léegi lan la ci Yeesu di teg. Pilaat wóoluwul oon waxi Yawut ya. Noonu mu laaj Yeesu ne Ko: «Ndax yaa di Buuru Yawut yi?» Gis naa yeneeni Almasi yu geetaru ba dëgër, te am sikkim yu ñuul kukk, boole ci bët yu xonk joy. Dunga xarekat wala terrorist. Danga melni ku tiis, woyof, te woyof; naka ngay mëna am yaakaar nekk buur? Buur dafay jaay doole, am doole te amul yërmaande.

Yeesu yëg ne Pilaat a ngi tambali di am xel-ñaar ci nguuram, noonu mu laaj ko ne: «Ndax sa xarekat ya nee nañu la ne dañoo xeex ak samay taalibe ca tool ba? Say jottalikati xibaar, ndax dégg nañu ma, may wax lu jëm ci politik? Ab Gowernër warul di déglu ay jiiñ yu teguwul fenn.»

Pilaat daldi mer ne: «Ndax man ab Yawut laa?» Mu mel ni ku naan «du ma mos a suufeel sama bopp ba, mel ni way-gëm diine yii nga xam ne subaak ngoon waxu diine rekk lañuy yendoo.»

Noonu Pilaat nangu ne du moom moom moo jàpp Yeesu, waaye askanu Yawut yi la, seeny njiit ak seeny boroom réew. Ba noppi mu laaj Ko ne: «Loo def? Damaa bëgg tontu bu may man a may ma jànkonteek ñi lay jiiñ. Waxal, mbaa ñu dóor la ay yar; waxal dëgg gépp.»

Yeesu tontu ci kow, wone dëgg gi nu ñu ko dul faral, „a dégge: «Nguuru Yàlla gi, moom kese moo ko moom, kenn sañcewu ko ak ay sarax, ay liggéey, walla ay ngànnaay, ngir noot ñeneen.» Nguuru Krist du seey ni yeneen nguur yi. Yeesu dafa jàngal ay taalibeem ne bu ñu xeex ak jaasi, walla ay ndell. Nguuram dafa wuute ak nguuri àddina sépp."

YOWAANA 18:37-38
37 Pilaat ne ko: «Kon, yów buur nga?» Yeesu tontu ko: «Wax nga ko, buur laa. Lii moo tax ma juddu, ñëw àddina, ngir wax dëgg gi. Ku bokk ci dëgg dina nangu li ma wax.» 38 Pilaat laaj ko ne: «Luy dëgg?» Bi mu waxee loolu ba noppi, Pilaat daldi génnaat jëm ca Yawut ya ne leen: «Gisuma ci moom gann tooñ.»

Pilaat xamuloon li Yeesu di wax, waaye gis na ne ki ñuy joxoñ baaraam mungi jàppe boppam nib buur, te waxul lan la nguurgoogu di tekki. Yeesu tontu ne: «Xelmati nga sama kumpa, te xam li may wax. Ab buur moo moom nguuram, te nekk njaatige bi; Sama nguur nekkul ci àddina su bare fen sii aky naxaate, ndaxte maay Buuru Dëgg gi.»

Yeesu teg ci ne juddóom ci Mariyaama nekkul tàmbalig dundam, waaye ca àllaaxira la jóge ngir ganesi, nu ci àddina. Ci Baay ji la jóge fekk dara xewagul. Xam na dëggu Yàlla gi. Yeesu dafay seedeel Dëggu Yàlla gi. Mooy seede bu dëggu bi. Waaye Pilaat ree, ne Ko: «Lan mooy dëgg?» Guwernër bi dafa yàgg a gis ay jëfi naaféq ak njublang, ba gëmatul luy dëgg. Yeesu mooy seedeb dëggi asamaan bu dëggu bi, te moo nu xamal turu Baayam ji.

ÑAAN: Boroom bi Yeesu yaay sama buur: «Yaa, ma moom. Def ma sa jaamu baaxaay, aar ma ak sa dëgg gi.»

LAAJ:

112. Nan, ak ci ban fànna la Yeesu nekke Buur?

Mobile device - Print - Top