Mobile device - Print - Bottom

Previous Lesson -- Next Lesson

b) Tànn bi ci diggante Yeesu ak Barabbas (Yowaana 18:39-40)

---

YOWAANA 18:39-40
39 Seen aada laaj na ma bàyyil leen kenn, saa su ñuy def màggalu bésu jéggi bi. Xanaa ma bàyyil leen buuru Yawut yi? 40 Noonu ñu yuuxuwaat ne: «Waxañu kii, Barabbas lanu wax.» Fekk Barabbas moomu taskatu réew la woon.

Pilaat xamoon na ne Yeesu dëgg lay wax, te dundam indiwul genn ñàkk kaaraange. Noonu mu génn jàkkaarloo ak Yawut ya ko doon xaar ca ëtt ba, mu joxe àtte bi setal ki ñu jiiñ, ci kanamu ñépp. Ñeenti Injiil yépp seede nañu ne Yeesu bàkkaarul ci Yoonu baatin, te it bàkkaarul ci kanamu nguur gi. Ni guwernër, manuloon a taqal Yeesu genn tooñaange. Noonu Ndawul nguur ga daldi nangu ne Yeesu deful dara lu aay.

Pilaat dafa bëggoon a génne loxoom ci Ku doy waar kii, waaye itam bëggoon naa neex Yawut yi. Noonu mu jéem a wéeru ci seen aada ngir bàyyil leen kenn ci ñi ñu tëj, ni ñu ko baaxoo defe ci bésu màggal gi. Mu jéem a dalal xelu Saraxalekat bu mag bi, di ko jaare ci ñaawal Yeesu di Ko woowe «Buuru Yawut yi». Bu Pilaat goreeloon Yeesu, kon Yeesu dootuloon am genn faayda ci kanamu mbooloo mi, ndaxte kon du leen manati yewwi ci nguuru Rom.

Waaye nag xudbakat ya ak askawa wépp dalda mer ba futt, ba ñu déggee ñuy woowe Yeesu «Buuru Yawut yi». Ab jambaaru xarekat, bu am kàttan te dëgër lañu doon séentu. Looloo tax ñu tànn Barabbas. Maanaam dañoo tànn bàkkaarkat bi, weddi Ku Sell ki Yàlla yebal.

Du woon Kureelu Yawut ya rekk moo weddi woon Yeesu, waaye it mbooloo ma Ko bañoo. Foo féete yów? Ci booru dëgg, gi lewet te yorul ngàannaay? Walla dangaa far ci ñi jàpp Yoon, ba di jëfe jaay-doole ak naxaate, te duñu sóoraale yërmande ak dëgg gi.

c) Yer ya ñu dóor Yeesu ca kanamu jiiñkatam ya (Yowaana 19:1-5)

---

YOWAANA 19:1-3
1 Noonu Pilaat joxe ndigal, ñu dóor Yeesu ay yar. 2 Xarekat ya ràbb kaalag dëg, teg ko ci boppu Yeesu, solal Ko mbubbum xarekat mu xonq curr. 3 Ñu di Ko jegeñsi, di ko pes naan Ko: «Nuyu nanu la yów buuru Yawut yi!»

Li waroon Pilaat mooy mu bàyyi Yeesu, te jàpp jiiñkatam ya. Waaye defu ko. Xanaa kay dafa jéem a labaj mbir mi te di wut maslaa? Mu joxe ndigal ne nañu dóor Yeesu ay yar. Mbugal gu mel noonu metti woon na lool, te naqaree dékku, ndaxte kàcciri ya dañu leen daan fasaale ak ay yax yu daan xotti yaram, wu ñu dal. Soldaar ya metital Yeesu; ñu takk Ko ca ab puj, summi mbubbam, di ko dóory kàcciri ci gannaawam gépp. Deram gi ak suuxam gépp naan tàppit ci metit gu kenn manul a nettali. Ñu bare ñu mos a jaar ci mbugal mu ni mel, fa lañu ñàkke seen bakkan. Sunu Boroom bi deful dara lu bon, daj na coono yu bare ci yaramam ak ci ruuwam.

Ba noppi, soldaar ya di ñaawal yaramu Yeesu wa ñu teppi. Dañoo ragaloon boroom fitna Yawut yi ba génn guddi jafe leen. Léegi nag man nañoo bàkkoo metîtal «buuru Yawut yi» ngir fayu. Yeesu daj na bépp coxorte ci mbooloom fippukat yooyu. Kenn ci ñoom sax dem na wuti caru dëg, laxas ni kaala ñu teg ko ci boppu Yeesu. Jam-jamu kaalag dëg googu, ñàkkloo Ko deret ju bare. Ñeneen muur Ko mbubb mu màggat mu kilifa soldaar moomoon.. Yeesu di nàcc ba tooy xepp. Rax ci dolli, dañu Koo dóor ni ku koy yóbbu laaxira. Mu am ca sax ñu Ko doon sujjóotal, mel ni ñu àndoon ca kaala buur ga ñu Ko tagaloon te ñu defare ko ak ay dëg. Li soldaari buur yooyu waroon a bokk ci askani tugal, man nanu njoortloo ne xeeti àddina yu bare bokkoon nañu ca ñaawal yooyu ak sosal yooyu yépp ñu teg ci kow mbotem Yàlla mi.

YOWAANA 19:4-5
4 Pilaat génnaat ne leen: «Gis ngeen, maa ngi leen koy indil ci bitti, ngir ngeen xam ne, waa jii, gisuma ci moom genn tooñ.» 5 Yeesu nag génn, tegoo mbubbum xarekat mu xonq mi, ak kaalag dég gi. Pilaat it ne leen: «Waa jaa ngii.»

Pilaat dafa mujj nangu ne Yeesu deful dara lu aay. Bii mooy ñetteelu yoon muy génn te di xamal xamal kilifa Yawut yi ne: «Gisuma genn tooñ ci moom.» Dafa leen koo indil ci seen kanam ngir feeñal seen njublang gi, ba dëgg gi man a feeñ.

Mu génneel leen Yeesu mu sonn lool, ak kaalag dégam. Mu tegoo mbubb mu xonq ma, te taq ripp ak deret.

Ndax man nga xalaat portale Mbotem Yàlla miy gàddu bàkkaaru àddina si? Suufeeloom, ab yékkatiku la, ndaxte mbëggeelam gi amul moroom mungi doon feeñe cig man a muñam. Dafa taxawoon ci kanamu ñépp ñi teewaloon Peŋku ak sowu jant, ñu di Ko saaga, di Ko toroxal, kaala Ko ak dég. Kaala àddina sépp, ak seeny xeer yu am solo yiy melax, yemuñu fenn kaalag dégam gi, ak deretam jiy baale bépp bàkkaar.

Ak li Pilaat di nekk ki gën a yées ci nit ñi, terewul yeramam daw ci nataal bii. Benn màndarga mbañ feeñuloon ci xarkanamu Yeesu, walla ay móolu ciy tuñam. Mungi newoon tekk, di ñaan Baay ji, di barkeel noonam yi, te di gàddu bàkkaari ñi Ko doon saaga. Guwernër ba teŋal baat, ne leen: «Waajaa ngi nii!» Moom dafa yégoon màqaama ak daraja ji waa ji am. Xëy na xalaat bii moo nekkon ci boppam: «Nit ku jéggi dayoo kii, melokaanu Yàlla la làmboo.» Yërmandeem sax mungi doon ray-rayi ca waxtu deewam; sellaayam di feeñe ci ñàkk-kàttanam, ak ci yaramam ji sàngoo deret. Du woon ay tooñam ñoo taxoon Muy daj coono jooju, waaye ngir samay bàkkaar, say yos, ak tooñi bépp doomu Aadama, moo taxoon.

d) Pilaat yéemu na ci baatinu Krist (Yowaana 19:6-11)

---

YOWAANA 19:6-7
6 Waaye bi ñu Ko gisee, Saraxalekat yu mag ya ak alkaati ya di yuuxoo naan: «Daaj Ko ci bant, ba mu dee!» Pilaat ne leen: «Jël-leen Ko yéen, daaj Ko ci bant, ndaxte gisuma ci moom genn tooñ.» 7 Yawut yi tontu ko ne: «Am nañu aw Yoon, te ci Yoon woowu, war na dee, ndaxte teg na boppam «Doomu Yàlla».»

Waxtu yi ñu Ko doon metital yàgg lool. Mbooloo mu takku dajaloo ca buntu këru guwernër ba. Kilifa Yawut ya nanguwuñu woon a deltu gannaaw ci lenn li ñu fasoon yéene, waaye ñoom ñépp a àndoon ci dogal ñu rey Yeesu, boole ca di xumbal ñaxtu ga ci ay yuuxu yu tar. Ña amoon xel ñaar, seen yaakaar tas, ba ñu xalaat sax ne Yàlla dafa dëddu Yeesu. Defuloon genn kéemaan ngir musal boppam. Noonu ñu fekksi mbooloo ma, di yéene ñu rey Yeesu. Pilaat dafa waroon a jël dogal bi gën a metti yeneen yépp. Noonu ñu fuñ Ko, jébbal Ko lëndëm gi.

Ca jamono jooju, Pilaat dafa doon moytu bépp yëngu-yëngu, waaye nag bëgguloon a rey kenn ci kow lu jaarul yoon. Noonu mu ne Yawut ya: «Jël-leen Ko, ngeen daaj Ko ci bant, bu fekkee ne sax man xam naa ne deful genn tooñ.» - Bii mooy ñatteelu yoon muy nangu loolu. Bi Pilaat defee loolu, dafa tooñ boppam, ndaxte amul woon sañ-sañu dóor ku deful dara.

Yawut ya xamoon nañu ne Yoonu waa Rom mayuleen ñuy rey nit, te Pilaat manoon naa wëlbatiku dal ci seen kow, bu ñu ko defee, donte kàddoom ya mu doon dalale seeny xol. Yoonu Yawut diglewuloon daaj ci bant, waaye sànni xeer ba nit ka dee rekk. Yeesu dafa «sosal Yàlla», kon ñu sànni Ko ay xeer mooy àtteem.

Kilifa Yawut ya xamoon nañu ne buñu nangoo baayoo gi Krist di cëroo, kon war nañu Koo sujjóotal. Daaj Ko bant nag dafa doon wone ne nitu neen doŋŋ la. Deewam mooy firnde àtteem, waaye du doon deretam jiy baale; bu ko defee, mu mel ni Yàlla ànd na ci rey bi ñu Ko teg.

ÑAAN: Boroom bi Yeesu, nungi lay sant ci coono yi nga daj ak kàcciri yi ñu la dóor ndax sunuy tooñ. Nungi lay màggal ndax sa muñ, sa mbëggeel, ak sa màggaay. Yaay sunu Buur. Dimbali nu, ba nu déggal la. Jàngal nu ni nuy barkeelee sunuy noon, te di won yërmande ñi fees ak mbañ. Nungi lay sant ndax sa deret ji nuy laabal ci bépp bàkkaar. Céy yow Doomu Yàlla ji, sag moomeel lanu. Saxal nu ci sa sellaay gi, te dimbali nu nuy doxeek yërmande ak ngërëmal lépp li nga nu defal.

LAAJ:

113. Lan lanuy jàng bu nu gisee ñuy dóor Yeesu, ñu solal ko mbubb mu yànj te tegal Ko kaala dég?

Mobile device - Print - Top