Mobile device - Print - Bottom

Previous Lesson -- Next Lesson

4. Xel mu Sell mi dafay feeñal yàkkute yi gën a am solo ci li nu jot a dund démb (Yowaana 16:4-15)

---

YOWAANA 16:12-13
12 Li ma leen war a wax bare na, waaye dungeen ko man a dékku léegi. 13 Bu Xelum Yàlla mi yor dëgg gi dikkee nag, dina leen gindi ci lépp li jë; ci yoonu dëgg gi, ndaxte du xax ci coobarey boppam, waaye lu ko Baay ji wax, mu jottali leen ko. Dina leen yégal mbir yu ñówagul.

Krist moo xam lépp. Dafa bëggoon a xamal taalibeem yi mu sopp yi, ay mbóoti asamaan, ak li nar a ñów ëllëg, waaye seen xam-xam ci yooyu dëgg, dafa tuuti woon lool. Dëgg la ne jafe nanu lool ngir nu xam ne Yeesu mungi ca asamaan, toog ca ndeyjooru Yàlla, te itam mungi dëkk ci sunu xol. Xel mu Sell mi doŋŋ moo nu ko man a xamal. Noonu it la jafee ngir nànd ni Yàlla nekkee kenn ci ñetti jëmm. Mbir la , mu xelu nit ki manul a takk, waaye Xel mu Sell mi dafa nuy dimbali ba nu man a jëli mbir moomu, te dafa nuy xelal itam. Man nanu feeñalal kumpa ëllëg yi, ak mbóoti xol yi, ndaxte xam na xóotaayu Kenneefu ñett gu sell gi.

Krist waxoon na ne Xel mu Sell mi dina ñów, te dina leen xamal dëgg gépp. Lan mooy dëgg gi ? Yeesu waxul « dëgg yi » mel ni kuy wax ci mbiri àddina, waaye dafa ne « dëgg gi », mu mel ni dafa naan : « Man maay Dëgg gi ». Peeñu gi aju ci ñówug Xel mi mungi tekki ne dina nu dugal ci mataayu Krist ci jëf ak ci nekkin. Yeesu du nitu neen, waaye Baay jaa ngi ci Moom, te Moom it mungi ci Baay ji. Noonu bu nu dugalee ci dëgg gépp, Xel mi dafa nuy dimbali ngir nu xam Baay ji , te sax ci mbëggeelam ak dundam ba fàww. Ci Injiil li, baatu « Dëgg » tekkiwul rekk dëgg gu jaar yoon, lu jaadu, lu ànd ak màndute, waaye tekki-tekki yooyu dañoo yaatu te ëmb ay mbir yu bare. Noonu Xel mi dafa nuy xamal dëggi asamaan, ngir nu man a xam Yàlla ci biir Kenneefu ñett gi, te dund kàttanam gu kéemaane gi.

Xel mu Sell mi nitu boppam la itam, kuy wax, di déglu, te am coobare boppam. Moone de du def lu dul déggal coobare Baayam. Du joxe ay xalaati boppam, waaye li Baay ji wax la nuy jottali. Ci Kenneefu ñett gu Sell gi déggalante ci biir mbëggeel moo ci nekk. Xel mi dafa gore ci seedee bi muy defal Doomu Yàlla ji. Looloo tax mu bëgg Jàngu bi nekk yaramu Krist, ngir man a mat bés bu Krist , Jëkkëram ji , di delluusi.

YOWAANA 16:14-15
14 Dina ma màggal, ndaxte lu mu leen wax, ci man la ko jële. 15 Lépp lu Baay ji am, maa ko moom. Looloo tax ma ne leen, lu mu leen jottali, ci man la ko jële.

Mébétu Xel mu Sell mi mooy màggal Krist. Ni Yeesu bàyyee boppam te delloo bépp sargal Baay ji, noonu itam Xel mu Sell mi wutul ndamu boppam, waaye dafay màggal Yeesu ci bépp jëfam. Loolu dafa nuy jàngal ne warunu bàkku ci li nu dund, ci sunuy ndam, ak sunuy jëf , waaye nanu màggal Yeesu Musalkat bi. Sunu mbaalu bàkkaar moo ëpp solo sunu tuub. Liggéeyu Xel mi, kàttanam et ay mébétam, lenn doŋŋ lañuy xënte, te mooy ndamul Yeesu mi nu rammu. Xel mu Sell mi dafay liggéey ak doole jaarale ko ci seede ndawi Krist yi, ñiy xamal nit ñi Krist mi ñu daaj ci bant temu dekki.

Xel mu Sell mi dafay wéy ci liggéey bi Yeesu tàmbali , ci kàddu ak ci jëf. Dafay fàttali taalibe yi Kàdduy Yeesu, te di leen jottali dundu baatin gi. Dafa leen di ñaax ngir ñu dégg ndigalam, saxal ko ci Musalkat bi. Gis nanu ne wóllëre gi am ci biir Kenneefu Ñett gu Sell amul genn dog-dog. Nit du wut ndamu boppam, waaye dafa war di sargal ak di yékkati moroomam.

Bi Mu nekkee ci kow suuf, Yeesu dafa nangu ak suufeelu gu mat ne : « Baay ji moo ma ëpp màqaama. » Waaye ci xutba tàggoom nee na : « Bépp séñ-sañ jox nañu ma ko ci kow ak ci suuf. » Yeesu moo sàkk lépp ànd ci ak Baay ji. Moo moom Baay ji, ni bépp doom moome baayam, te baayam moom ko itam .

ÑAAN: Sang bi Yeesu, rammu nga nu ca kurwaa ba , te yennil nga nu sunu sayu bàkkaar. Nungi lay sant ci sa mbëggeel gu rëy gi. Sol nu sa Xel mu Sell mi, banu fees dell, ndax sunu dund gépp màggal sa sarax si ak sa ndekkite li. teggil nu ñàkk-faale gi, naaféq, ak rëy-rëylu, ndax nu man a dunde dëggu say jikko yu rafet yi.

LAAJ:

101. Nan la Xel mu Sell mi di jëfe ci ni àddina si war a jëme kanam?

Mobile device - Print - Top