Mobile device - Print - Bottom

Home -- Wolof -- John - 058 (Sin is bondage)

Previous Lesson -- Next Lesson

e) Bàkkaar jaam la (Yowaana 8:30-36)

---

YOWAANA 8:30-32
30 Bi ñuy dégg Yeesu di wax loolu, ñu bare dayldi Koy gëm. 31 Yeesu ne Yawut ya Ko gëmoon: »Bu ngeen saxee ci li ma wax, nekk ngeen samay taalibe ci lu wóor. 32 Te it dingeen xam dëgg gi, te dëgg gi dina leen goreel. »

Seede bu suufeelu te daw yaram bi Krist def, laal na xolu ñu bare ñi Ko doon déglu. Ñu mujje nangu ne ci Yàlla la jóge; Yeesu yëg ne wóolu nañu Ko, noonu Mu dalal seen ubbite xel. Ndax Xelam man a tuuru ci seen xol ak seeni xel te du am benn gàllankoor; te noonu Mu man leen a matalloo coobareem. Képp ku topp kàdduy Krist dinga gis dëgg gi. Ndaxte dëgg gi du xalaati neen, waaye lu am la, te nu koy dund.

Dëggu Yàlla kàddu gu gore la te maandu; teg ci, mooy xam Yàlla ni Baay, Doom ak Xel mu Sell mi ci biir jokkoo mbëggeel. Bu nu saxee ci Krist, danuy xam rafetaayu (jekkaayu) Kenneefu Ñett bu Sell bi.

Xam Yàlla dafay soppi sunu dund.Dafa nuy xiir ci bëgg ñeneen ñi, yewwi nu ci Bopp-sa bopp. Ku amul mbëggeel, xamuloo Yàlla. Di waxtaan ci rëccu te tuub say bàkkaar walla ci wareefi Yoon wi, du tax nu génn ci buumu njaamu bàkkaar. Li nuy goreel mooy mbëggeelu Yàlla, nangu mbaalu Doom ji ak ñówu Xel mu Sell mi ci sunug dund. Mbëggeelu Yàlla man na itam dagg jéngi « bopp-sa bopp » yi.

YOWAANA 8:33-36
33 Ñu tontu Ko ne: »Nun ci Ibraayma lanu soqikoo te mosunoo nekk jaamu kenn. Nan nga nu man a waxe ne, dinañu leen goreel? » 34 Yeesu ne leen: » Ci dëgg-dëgg maa ngi leen koy wax, képp kuy bàkkaar, jaamu bàkkaar la. 35 Te jaam du bokk ci kër gi ba fàww, waaye doom, moom, ci kër gi la bokk ba fàww. 36 Kon nag, bu leen Doom ji defee gor, dingeen doon ay gor tigi.

Yawut ya dañu ne woon xojj di xoole; seeni maam nekkoon nañu ci buumu njaam ca nguuru Firawna ca Misira lu tollook ñeeti téeméeri at, te dañoo jàppoon ne Kàttanu Yàlla moo leen yewwi woon ca buumu njaam googa (Gàddaay 20 :2). Kon niYeesu weddee seen goreel gi, dafa jeexal seen xol.

Yeesu dafa waroon a toj tiitaru ña Ko tàmbale woon a gëm. Dafa leen won ne ay jaami bàkkaar lañu te ñungi ci kaso Seytaane. Bu nu manul a natt diisaayu li nu tënk te di nu sànk, sunu xel du nekk ci wutum mucc gi. Ku yég ne manuloo daan bàkkaar, na ñaan Yàlla Mu musal ko. Gis nanu fii li tax ba ñu bare duñu wut Yeesu; dañuy xalaat ne soxlawuñu muccam gi.

Yeesu dafa biral ak doole ne: »Képp ku bàkkaar, jaamu bokkaar nga. »Ñu bare li ñuy tàmbalee seen bés mooy fen, dunde tàyyeel, ak ay caaxaan. Dañuy neexoo ak bàkkaar, te di dunde ay génti kese; dañuy mujje topp seen yoonu bopp. Dañuy jéem a toppandoo yenn doxalin yu bon ba, miin leen. Bu ñu demee nag ba tàmbali yég ne nekkuñu ci yoon, te di yëg li seen xel di leen di jiiñ, dafay fekk bey wey na buus; Ay jaami bàkkaar lañuy doon. Yenn saa yi sax ñu bóom nit te duñu ko tey. Nit ñi dañu soxor, buñuy nëbb sax dëgg gu ñagas gi, ci mbubboo diine ak laabiir. Ku àndul ak Krist, sa jaamu bëgg-bëggu yaram nga. Seytaane dafay fowe say cër ni ngelaw di def xobu garab bu wow.

Doomu Yàlla ji joxe nag Kàddu Buuram: »Ba léegi Maa ngi nekkagum ak yéen te xam naa li leen tënk. Pare naa ngir jekkal leen te goreel leen, far seen bàkkaar yépp ba ñu set-wecc. Ñówuma ngir soppi (yeesal) àddina si ci anam yu woyof, walla di leen di jubbantee Yoon wu bees wu gën a xadar. Déet, dama leen a bëgg a goreel ci doole bàkkaar ak dee ak yelleef yi Seytaane di ñaxtu. Dama leen a bëgg a sàkkaat, may leen dund gu bees, ndax kàttanu Yàlla gi nekk ci yéen man a nasaxal tooke bàkkaar. Leer na ne Seytaane dina leen fiir ci junniy fànna yu nekk. Dingeen fakkastalu waaye du niy jaam, ni doom yu ŋoy bu dëgër ci seen yelleef lay doon. »

« Dañu leen a jëndaat ba fàww,goreel leen ci bàkkaar ci sama njëgu deret. Ku nekk ci yéen am nga solo ci bëtu Yàlla. May na la ngor ngir nga man a nekk doom ju ñu goreel. Dama lay may ngir nga man a dunde jokkoo ak Yàlla di ko surgawu te di Ko màggal. Maay mennum goreelkat bi lay génnee ci kaso tooñ, yóbbu la ca nguuru Yàlla. Maay Doomu Yàlla ji, te maa fees ak sañ-sañu yewwi ñépp ñiy déglu sama baat. »

ÑAAN: Sang bi Yeesu nungi lay sant te di la màggal, ndaxte yów yaay musalkat bi man lépp, te goreel nu ca bant ba ci coongi Seytaane. Baal nga nu sunu ñaawteef yépp. Sellal nga nu ngir nu bañ a dëkk ci mbañ ak naqar. Dimbali nu ba nu man a surgawu Yàlla, niy doom yu ñu goreel te ànd ak mbég.

LAAJ:

62. Nan la nu man a nekke ñu ñu goreel dëgg?

AY LAAJ-3

Mbokk mi,
yónnee nu 17 tontu yu jaar yoon, ci 19 yi nu la tegal.S u ko defe dinanu la yónnee njàng mi toftalu ci mii.

44. Lan mooy kumpa gi nekk ci bareel mburu ya?
45. Lu tax Yeesu bañ mbooloo ma fal Ko buur?
46. Nan la yeesu xiire ñi bëggoon mburu ba ñu gëm Ko?
47. Lu « Mburu dund gi » di tekki?
48. Nan la Yeesu def ba ña Ko doon déglu doon ñurumtu?
49. Lu tax Yeesu ne ña Ko doon déglu, ñu lekk yaramam te naan deretam?
50. Nan la Xelum dund gi bokke ak yaramu Krist?
51. Lu ci seede Piyeer indi?
52. La tax àddina si bañ Yeesu?
53. Lan mooy dëggal ne Injiil ci Yàlla la jóge?
54. Lu tax Yeesu rekk moo xam dëggantaan Yàlla?
55. Kan moo wax ëllëgu Yeesu?
56. Lu tax Yeesu am sañ-sañu wax: » Su amee ku mar, na ñów ci man te naan?
57. Lu tax Xudbakat ya ak Farisen ya xeeboon baadoolo ya?
58. Lu tax ña doon jiiñaate njaaloo daldi rocceeku ca kanamu Yeesu?
59. Nan la seede bi Yeesu defal boppam, bi Mu nee mooy leeru àddina si di nu yóbboo ci xam Baay bi ci asamaan?
60. Lan la ngëm lu aju ci Ki ne: »Maay ki nekk »di tekki?
61. Nan la Yeesu siiwalee jokkoom gu mosul a am dog-dog ak Kenneefu Ñett ñi?
62. Nan lanu man a def ba yewweeku dëgg?

Yónneel say tontu,te bañ a fàttee bind sa dëkkuwaay ba mu leer-nañ fii:

Waters of Life
P.O.Box 600 513
70305 Stuttgart
Germany

Internet: www.waters-of-life.net
Internet: www.waters-of-life.org
e-mail: info@waters-of-life.net

Mobile device - Print - Top