Mobile device - Print - Bottom

Previous Lesson -- Next Lesson

YUUHANNA - Ndaygu ngun jalbi ka nder nibhe
Jandeeji ka Linjiila no Yuhanna seedorii nonn

f) Fii ko Ibuliisa woni kon waroowo on e fenoowo on (Yuuhanna 8:37-47)

---

YUUHANNA 8:37-39
37 Miɗo andi wonde ko on jurriya Ibraahiima, kono hiɗon ɗaɓɓude no wariron mi, ko fii kongol an ngol heɓaali werde e mon. 38 Min non miɗo wowlude ko mi yi’i ka Ben an kon. Kono onon hiɗon waɗude ko nanirɗon baaba mon kon. 39 Onsay ɓen jaabii mo, ɓe wi’i: Ko Ibraahiima woni ben amen. Iisaa kadi wi’i ɓe: Si tawii ko on iwdi Ibraahiima, haray waɗee kuuɗe Ibraahiima ɗen.

Hari Yahuudiyankeeɓe ɓen no ƴettiri hoore mun wa zurriya annabi Ibraahiima on, hiɓe miijinoo wondema tippude e ko ɓe jeyidi kon e Baabiraawo gomɗinal ngal, ɓe ronay fodaariiji ɗi Alla waɗannoo ɗin jiyaaɗo makko ɗoftiiɗo on.

Annabi Iisaa bugitaaki nafa ko ngal naɓidal wondi kon e mun, kono himo aani fii ko o yi’i kon wonde ɓiɓɓe Ibraahiima ɓen jogaaki ruuhu mo maamiraawo maɓɓe on joginoo on. Ko on ruuhu wallunoo mo heɗagol hawa Alla kan, o huutora daaluyee makko on. Awa ɓe jentanooki few konguɗi annabi Iisaa ɗin. Ɗin konguɗi waawaano naatude ka nder ɓerɗe maɓɓe, maa ɗi hentinana ɓe. Ɓe lutti e nder niwre e angal gomɗinal.

Maakuuji Almasiihu on ɗin rimaali fus hakkunde maɓɓe, ko salaare e ngayngu tun ɗi findini e maɓɓe. E-hinle non, ɓurɓe ɓen e maɓɓe miijanooki fii warugol Iisaa. Annabi Iisaa feɲɲini non anniyeeji suuɗiɗi ɗin ka ɓerɗe maɓɓe; himo andi wonde ngayngu e ittu hoore ko piiji hiɓɓodirɗi non. Neeɓataa, ɓe sonkoyay ɓe wi’a: «Fempee mo, fempee mo!» (Matta 27:21-23; Yuuhanna 19:15).

Annabi Ibraahiima nani hawa Alla kan o ɗoftii mo kisan. Fii makko non kanko Iisaa, himo heɗotonoo soono kala hawa Ben makko kan, himo sutii kuuɗe e mangu Alla mawngu ngun.

Ko o feɲɲini kon ko timmi, immorde e humodiral hiɓɓiingal woodungal ngal hakkunde makko e Alla. Ko Iisaa woni Ruuhu Ruuhu makko on e giggol giggol makko ngol.

Kono Yahuudiyankeeɓe ɓen no aɲi on mo Baabaajo on woodini. Ɗun no ɓangini wondema wonaa ka Alla tigi-tigiijo on ɓe iwi. Ɓundu miijooji maɓɓe ɗin no seedi few e ko iwi kon ka kammu. Ka yewtere maɓɓe ɗon, Iisaa no ardaade ɓe e miijo no ɓe miijitora no innɗe «baabiraaɓe» maɓɓe ɓen sifori non. Hinaa annabi Ibraahiima wonunoo ɓen.

YUUHANNA 8:40-41
40 Kono jooni non, hiɗon ɗaɓɓude no wariron mi, min oo neɗɗo wowlanɗo on goonga on mo mi naniri Alla, kono Ibraahiima kan waɗaali ko nandi e ɗun. 41 Ko kuuɗe baaba mon ɗen wonɗon waɗude. Ɓen kadi wi’i mo: Menen hinaa men ɓiɓɓe heɓɓiraaɓe nii, ko gooto men mari baaba, on-le ko Alla.

Hari Yahuudiyankeeɓe ɓen no aɲi fota konguɗi Almasiihu on, sabu himo felaynoo ɓe wi’a hinaa ka ruuhu annabi Ibraahiima on fokkitiri ton ɓe wontiri. Ko sabu hoolagol wondema ko e zurriya annabi Ibraahiima on ɓe yalti woni daƴƴere gomɗinal maɓɓe ngal, e tama’u maɓɓe on e mawnintinaare maɓɓe nden. Ko honno Iisaa suusirta yewtugol goɗɗun e ko ɓe jeyidi kon e annabi Ibraahima, o bonnita fii ɗun.

Iisaa holli ɓe kadi wondema annabi Ibraahiima ko rewrude e ko o gomɗini kon Alla o huuwiri kuuɗe makko ɗen, e misal ko o yalti ka leydi makko o woni tunharankeejo. Ko o hoolii kon sella-findeyaagal Alla ngal no yaltiti e nder ko o okkitiri kon ɓiɗɗo makko on sadaka, maa wano yankinaare nde o holli nden Luutu, ɓiɗɗo kotoo makko on. Kono Yahuudiyankeeɓe ɓen holli sattere fii yaagal maɓɓe ngal, e murtaldu maɓɓe ndun e angal gomɗinal maɓɓe ngal. Hari ruuhu maɓɓe on e mo Almasiihu on no lurri few. Ko non ɓe yeddiri goonga wontuɗo neɗɗo dariiɗo on hakkunde maɓɓe; ɓe heɗanooki hawa Alla wonuka kan yewtude rewrude e makko. Iisaa ariraali wa Ɓiɗɗo Alla hara malaa’ikaaɓe e mangural mun no hunditi mo, kono ko wa neɗɗo woo neɗɗo o ariri, yawti ko konguɗi makko ɗin accata kon batte. O karhaali yimɓe ɓen no ɓe jaɓira Linjiila makko on. O fenɲini giggol ngol e moyƴere nɗen e innɗe Alla nɗen. Ɓe salii on kibaaru moyƴo e dow yawitaare. Ɓe fuɗini miijo warugol mo ngol. Ɗun no yeddodiri e moƴƴere e kuuɗe labaaɗe ɗe annabi Ibraahiima ɗen, on nanoowo ɗoftoo wuura huuwira e nder nanodiral e ko Alla feɲɲini kon.

YUUHANNA 8:42-43
42 Onsay Iisaa wi’i ɓe: Si tawii ko Alla wonnoo Ben mon, on yiɗayno lan, ko fii ko ka Alla mi iwri, mi ari. Mi aranaa hoore an, kono ko kanko nulimmi. 43 E ko fii honɗun on alaa faamude ko mi woni on wowlande kon? Ko ɓay on waawataa heɗaade konguɗi an ɗin.

Iisaa seeditanii Yahuudiyankeeɓe ɓen wondema wonaa annabi Ibraahiima woni ben maɓɓe, o addi ɓe no ɓe yi’ira tigi innde tigi-tigiire nde ɓe woni nden e jokkude.

Yahuudiyankeebɓe ɓen faami wonde Iisaa hollii ko sendi mo few e maɓɓe. Ɓe jaabori wi’ugol wonde wonaa ɓe ɓiɓɓe heɓiraaɓe nii, wano Mohaabiyankeeɓe ɓen e Amooniyankeeɓe ɓen iwuɓe e jiidi harminaandi ndin (Fuɗɗoode 19:36-38). Ɓe wonaa leɲol jilliingol kadi wano Samariyankeeɓe ɓen, sabu hiɓe holli wonde ko Alla woni Ben maɓɓe, tippude e ko windii kon ka deftere Eggudu 4:22 e ka Sariya Ɗimmo on 32:6 wa ko windii kon kadi ka deftere Isaaya 63:16. Ɓay Iisaa tentinii wondema ko Alla woni Ben makko, ɓe jaabori wi’ugol ko kanko woni Ben maɓɓe kamɓe kadi wano Bindi ɗin wi’iri non. Hari ɗun ko jande iwude ka gomɗinal maɓɓe non, ɓe cippirno ɓe tampi kadi fii ɗun. Kono seeditoore maɓɓe nden ko fenaande.

Iisaa yaltintini e nder ko raɓɓiɗi wondema ko hoore maɓɓe ɓe faljini. Ɓe wi’i: «Si tawno ko Alla woni Ben mon, on yiɗayno lan, sabu Alla ko giggol, hinaa mo ngayngu. Himo yiɗi Ɓiɗɗo makko iwuɗo e makko on, Ɓiɗɗo on no heewi wonande makko nden.» Haa-hande Iisaa wontaali feere, hay ko ɓuri e fanɗude, kono himo ɗoftii mo wano nulaaɗo ɗoftorta non.

Iisaa landii jamaa on: «Ko waɗi si on alaa faamude yewtere an nden? Hinaa haala janana mi haalata, kono miɗo yeɗude on Ruuhu an on wondude e kalfe weluɗe faamude ɗe tawata hay paykoy tosokoy koy faamay.» Iisaa jaabanii hoore mun landal ngal o landii ngal: «On waawataa heɗaade; hinaa on hettiiɓe, ko on maccuɓe; ngurndan mon ruuhuyankejan ɗan ko majjuɗan. Hiɗon nandi e pahooɓe ɓe nanata si noddaama.»

Musiɗɗo tedduɗo, kono ko honno heɗortoɗon ka bannhe ruuhu, hiɗon heɗaade daalol Alla ngol ka nder ɓerɗe mon? Hiɗon heɗaade hawa makko kan hara hiɗon faalaa laɓɓinde nder nder on, e no fow moƴƴitira nder ton? Kaa hiɗon mawnintinii hiɗon uddi noppi, sabu ruuhu janano no jogitii on? Hara hiɗon gollande Alla e nder bawgal Linjiila on kaa ruuhu bonɗo no tabiti e mon e hiɗon jokkude tiddinooje makko ɗen?

LANDAL:

63. Ko honno Iisaa jonniri Yahuudiyankeeɓe ɓen seedee holluɗo wondema wonaa ɓe fayɓe Ibraahiima?

Mobile device - Print - Top