Mobile device - Print - Bottom

Previous Lesson -- Next Lesson

YUUHANNA - Ndaygu ngun jalbi ka nder nibhe
Jandeeji ka Linjiila no Yuhanna seedorii nonn

f) Fii ko Ibuliisa woni kon waroowo on e fenoowo on (Yuuhanna 8:37-47)

---

YUUHANNA 8:44
44 Ko fii, ko Ibuliisa woni baaba mon, e hin-le hiɗon faalaa waɗude faaleeji baaba mon ɗin. On-le o woniino waroowo gila ka fuɗɗoode, o jaɓaali daraade e goonga, ɓay goonga on alaa e makko. Nde o wowli fenaade nden woo, haray ɗun ko e jikku makko on iwri, ko fii ko o fenoowo, awa kadi ko o baaba penaale.

Iisaa wi’i dendaangal ɓen ɓe yiɗaa mo wonde ko Ibuliisa woni ben maɓɓe. O holli kadi Yahuudiyankeeɓe ɓen no ɓe woniri non tigi, hay si tawii hiɓe wi’ude hiɓe andi Alla. Sariyankeeɓe ɓen no woɗɗitii Alla. Ko bonɗo on woni ben maɓɓe.

Ibuliisa no imminde jiiɓoldu ka o hammiri woo. Ko o faalaa ko waɗugol no tagoore Alla nden bonira. Himo ɗaɓɓude nokkeeli men lo’uɗi ɗin, o huutora ƴoyre no o laamora en, o ɗaɓɓa no o waɗinira en junuubu. Ontuma, o doga ka jullere laamu Alla fii tooɲugol yimɓe yurmuɓe foolaaɓe ɓen no o jonnira on dalil no no o ɲaawira en; ɗayne makko ɗen ko kaanuɗe!

Iisaa ɓangini wonde ko Ibuliisa woni mottodiral miijooji bonɗi ɗin awa kadi ko ɗin miijooji bonɗi bonnitata anniye moƴƴo on. O wontiri hoore makko maccuɗo, o aɲi yimɓe ɓen fow. Ko rewrude e on ruuhu gooto ayɓe Almasiihu on fow wuuriri, ɓe bonna fii yimɓe ɓen, ɓe bonna fii maɓɓe, hara ko himmeeji maɓɓe ɗin woni ɓe e ardaade. Kala ɓen wuuruɓe hara hiɓe sendaa e Joomi on ko bone on pooɗata ɓe e ley njaggu Ibuliisa ngun.

E ko honɗun woni faaleeji Ibuliisa ɗin? Iisaa no wi’ude en wonde Ibuliisa ko waroowo gila ka fuɗɗooɗe; ko ɓay himo aɲi mbaadi Alla wondi ndin e neɗɗanke. O seedi e Alla, okkoowo on ngurndan ɗan. Ko e juuɗe Ibuliisa mayde poomayankeere nden woni. Ko kanko laamii mayde nden. Faale makko ko mulugol yimɓe ɓen fow.

Ko woni sabu ndin huɲeendi ko ɗayne ɗen. Ibuliisa ɗaynuno aɗiiɓe ɓen jombidirɗe ɗun ko Aadama e Hawaa ko o fenani ɓe yo ɓe sikkito ɓe yedda yamiroore Alla nden. O ɗayni kadi hoore makko ko o faalanoo lontaade Alla. O sikki himo mawni, himo labaa e himo dolni ɓuri Alla.

Nden niwre ko golle Ibuliisa ɗen non, on mo andaano keerol ngol o waɗanaa ngol e nder faaleeji makko ɗin, o yani no hulɓinori. Almasiihu on ko liddu ɗun woniri. Himo newii e himo yankinii. Hino yurmi non ko tawi kon neɗɗo no yiɗi ɗayne e mawnintinaare ɓuri yankinaare e hayfintinaare Almasiihu on nden. Wano non, ɗaynoowo on no mottidirde konu fenooɓe, yewtooɓe penaale wa ko mboddi addata kon tooke ka nder ngurndan. Hoolaare woo alaa hakkunde maɓɓe.

Debbo goo yewti yumma makko, o wi’i: «Ɓe fow ko ɓe fenooɓe; hiɓe mantidira hara hiɓe jala. Mo bee no teddina hoore mun, jangooɓe ɓen no kansa fewndo ka ndartetee ɗon, yeeyooɓe ɓen no janfo soodanayɓe ɓen. Hay ka suudu, ɗayne no woodi hakkunde jombidirɓe ɓen. Hay gooto holnaaki, e hin-le mo bee no ƴettiri hoore mun wa feewuɗo e nunɗuɗo.»

Tindinooje Seytaane ɗen ko penaale! Ɗen penaale ko ɓuri kon ko feccere goonga. Seytaane waɗiray no fenaande kala nanditira e goonga. Ko kanko woni ɗaynoowo e baaba penaale.

YUUHANNA 8:45-47
45 Min non, ɓay miɗo wowlude goonga, on hoolotaako lan. 46 Ko hombo e mon waawi wowlude wonde mi waɗii junuubu? Si mi wowlii goonga, ko honɗun haɗata hooloɗon mi? 47 Ko fii, mo Alla on heɗoto ɗaaluyeeji Alla ɗin. Kono onon, on heɗotaako, ɓay hinaa on ɓe Alla.

Ko Iisaa tun yewtata goonga, ko kanko feɲɲinta goonga Alla on. Barki wonaanii ɓen gomɗinɓe konguɗi makko ɗin. Himo andi goonga wonɗo ka aduna on, kono ko o yankiniiɗo e selluɗo finde e nder ko o huuwata kon fow.

Yimɓe heewuɓe jaɓataa kibaaruuji moƴƴi wonɗi ɗin e nder on goonga, ɓayru ko Iisaa woni ko feɲɲini ɗi. Si hooreejo laamiiɗo maa sincuɗo diina yewti ko Iisaa yewti kon, yimɓe ɓen hooloto mo. Kono si Iisaa yewtirii wano aaden woo aaden, yimɓe ɓen bugitoto mo ɓayru ko towneede e laamagol ɓurani ɓe okkitirgol hoore maɓɓe.

Iisaa landii Yahuudiyankeeɓe ɓen: «Ko honɗun haɗata hooloɗon mi? Hara on yi’ii ko aalii e an maa mawnintinaare maa jikku bonɗo? O’o woye, ko goonga on tun mi yewtata, ko kanko kadi mi wuuriri. Ko min woni goonga wontuɗo on neɗɗo, mo bonnaali hay huunde, feewuɗo on e mo aldaa e ɗayne e ƴoyre.»

Ka sakkitorun, Iisaa feɲɲinani jamaa makko murtuɗo on, o wi’i: «Mo Alla on heɗoto ɗaaluyeeji Alla ɗin, o anditay hawa makko kan. Paykun no sendindiri hawa mawɓe makkun kan e hawa woɓɓe goo kan. Nde neeneejo nani ɓiɗɗo mun on no wulla, o dogiray ka on woniri ɗon. Wano non, ɓe Alla noddi ɓen nanay hawa Baaba wonɗo on ka kammu, kono ɓen ɓe waawataa faamude Linjiila on, hinaa ɓe Alla. Neɗɗo no waawi wonude jokkuɗo diina, juuloowo e hooroowo, kono le hara ko Ibuliisa woni ben makko. Hinaa sabu dewal mon ngal hisirton, kono ko e fee jibinande heyre nden rewrude e ƴiiƴan Almasiihu on ɗan no Ruuhu on jippora o tabita e mon. ko hombo woni ben mon, ko Alla kaa ko Ibuliisa? Hita on hawju jaabagol, kono eɓɓidiree faaleeji mon ɗin e ɗi Ibuliisaa ɗin, onsay warron non kadi e fee kuuɗe Almasiihu on ɗen. Tuubon non ontuma.»

TORAARE: Yaa an Baaba wonɗo ka kammu, miɗo weltani maa fii ko jannuɗaa-mi kon no junuubaaji an ɗin woniri non e no giggol maa ngol sifori non. Yaafano lan penaale an ɗen, njattinan e nder ngayngu e mawnintinaare. Irtan e nder bawgal Ibuliisa ngal no mi wonira e juuɗe maa, hara mi luttaali e nder bunɗoyaagal. Udditanan noppi an ɗin e ɓernde an nden e Linjiila maa on, wattaa lan aaden yankiniiɗo e selluɗo finde.

LANDAL:

64. Ko piiji Ibuliisa honɗi annabi Iisaa holli en e kene?

Mobile device - Print - Top