Mobile device - Print - Bottom

Previous Lesson -- Next Lesson

3. Karamɔgɔden wɔɔrɔ minw kɛra fɔlɔw ye (Yuhana 1:35-51)

---

YUHANA 1:40-42
40 Karamɔgɔden fla minw tun ka Yuhana ta kuma mɛn ka tugu Yesu kɔ, o ra kelen tɔgɔ tun ye ko Andere, Simɔn Piyɛri balemacɛ tun lo. 41 Andere le kɔnna ka taga a balemacɛ Simɔn fɛ, ka taga a fɔ a ye ko: «An ka Masiya ye.» (Masiya, o kɔrɔ ye ko Kirisita.) 42 Andere tagara ni Simɔn ye Yesu fɛ. Yesu ka Simɔn flɛ, k’a fɔ ko: «Ele le ye Yuhana dencɛ Simɔn ye! Nka i tɔgɔ bɛna la ko Sefasi.» (Sefasi, o kɔrɔ ye ko farakuru.)

Andere min tun ye Piyɛri kɔrɔcɛ ye, ale tun ye jɛgɛminabaga ye Bɛtisayida, Tiberiyadi ba kɛrɛfɛyɔrɔw ra. A tun nana Batizerikɛbaga fɛ ka na a ta jurumunw yafa sɔrɔ, ani ka Masiya nawagati makɔnɔ. Andere tun sɔnna Batizerikɛbaga ta seereya kuma ma, ka tugu Yesu kɔ. Ɲagari tun bɛ a jusukun na; a ka min sɔrɔ, a tun tɛ se ka o mara ka o kɛ a yɛrɛ kelen ta ye, o kosɔn a tagara o fɔ a dɔgɔcɛ le ye, sani a ye taga a fɔ mɔgɔ wɛrɛw ye. Andere tagara kibarodiman fɔ a dɔgɔcɛ ye nin cogo le ra, ko: «Kirisita min layiri tun tara, an ka o ye, min ye Kisibaga ani Matigi ye, Ala ta Sagaden.» I b’a sɔrɔ ko Piyɛri tun sigiyara o ko ra. Nka Andere ka sigiya bɛɛ bɔ a jusukun na. A laban, Piyɛri tagara ni a ye Yesu fɛ, nka a hakiri belen tun ma sigi kosɛbɛ.

Piyɛri donna bon kɔnɔ minkɛ, Yesu k’a wele a tɔgɔ ma. Yesu tun k’a ta miiriya lɔn. Yesu ka tɔgɔ kura di a ma ko «Piyɛri». Yesu tun ka Piyɛri ta ko tɛmɛninw bɛɛ lɔn, a ta sisan ta kow, ani a ta ko nataw bɛɛ, ani a ta jagbɛlɛyaba. Ni mɔgɔ k’a jusukun dayɛlɛ Yesu ye, Yesu bɛ o lɔn. Piyɛri ka Matigi ye minkɛ, Piyɛri ka o faamu, ka sɔn Matigi ma o yɔrɔnin kelen bɛɛ ra. Yesu k’a damina ka to ka nin jɛgɛminabaga jusubatigi yɛlɛma dɔɔni dɔɔni, janko k’a kɛ i ko farakuru gbɛlɛn. Kirisita baraka ra, a kɛra Egilisi jusiginan dɔ ye. An bɛ se k’a fɔ ko Andere le kɛra karamɔgɔden sira dayɛlɛbaga ye.

Karamɔgɔden wɛrɛ fana kɛra sababu ye k’a balemacɛ lana Yesu fɛ : Yuhana k’a balemacɛ Yakuba lana Yesu fɛ, nka a ma sɔn ka o tɔgɔ fla fɔ a ta Kibaridiman Kitabu kɔnɔ, yɛrɛmajigiya kosɔn. Can ra, Andere ni Yuhana, olugu mɔgɔ fla le kɛra karamɔgɔden fɔlɔw ye, minw kɔnna ka tugu Yesu.

Nin hayan minw ye daminakumaw ye, o bonya bɛ se ka suma ni teresun wuritɔ ye – kokura dɔ damina wagati. O lanabagaw tun tɛ natabaw ye minw bɛ ko kɛ o kelen ta ye, nka o tagara ni o balemaw ye Kirisita fɛ. O wagati ra o tun tɛ sira jan tagama, ani ka tɛmɛ yɔrɔ caman na janko ka kibaro diman fɔ mɔgɔw ye ; o tun bɛ o ta baraka dan o ta somɔgɔw le ma, ka olugu lana Kirisita fɛ. O tun tɛ tugu sɔsɔtikɛbagaw kɔ, walama fangatigiw, nka Ala ta ko lɔgɔ bɛ minw na i ko kɔngɔ, mɔgɔ jusukasinin minw bɛ nimisa o ta kɛwalejuguw ra, o tun bɛ olugu le yɔrɔɲini.

An bɛ se ka nɛɛma ta kibarodiman fɔcogo dɔ karan nin kow fɛ, min ttɛ kɛ ka kaɲa ni baraka damatɛmɛnin ye, nka a bɛ kɛ ni ɲagari le ye, min bɛ sɔrɔ an ni Yesu ta jɛnɲɔgɔnya ra. O karamɔgɔden fɔlɔw ma karanbaw kɛ Ala ko ta fan fɛ, walama ka o yɛrɛ ta ɲanamanya sɛbɛ, nka o kumana ka Yesu ta ko seereya kɛ ka kaɲa ni o ta lɔnta ye. O tun Yesu ye, k’a lamɛn, ka maga a ra, ka o jigi la a kan. O jɛnɲɔgɔnya gbɛlɛn min tun bɛ o ni Yesu cɛ, o ta fanga bɔra o le ra. Yala aw ka Yesu sɔrɔ kibarodiman sababu ra wa? Yala aw ka aw teriw lana Yesu fɛ ni jususuma ni jijari ye wa ?

DAARIKAN: Matigi Yesu, an b’i fɔ i ta ɲagari kosɔn, i ka ɲagari min don an jusukunw na. An dɛmɛ janko an fana ye dɔw lana i ma ni jususuma ye. Kibarodiman fɔri lɔgɔ don an na, an y’a fɔ ni kanuya ye. Siranya ni maroya min bɛ an sɔrɔ, yafa an ma o ra, k’a to an ye se ka i tɔgɔ seereya kɛ ni jagbɛlɛya ye.

ƝININKARI:

21. Karamɔgɔden fɔlɔw ka Yesu tɔgɔ lase mɔgɔw ma cogo juman?

Mobile device - Print - Top