Mobile device - Print - Bottom

Previous Lesson -- Next Lesson

3. Karamɔgɔden wɔɔrɔ minw kɛra fɔlɔw ye (Yuhana 1:35-51)

---

YUHANA 1:35-39
35 O dugusagbɛ, Yuhana tun bɛ ni a ta karamɔgɔden fla ye tuun. 36 A ka Yesu tɛmɛtɔ ye minkɛ, a k’a fɔ ko: «Ala ta Sagaden ye nin ye.» 37 Karamɔgɔden fla ka o mɛn minkɛ, olugu ka tugu Yesu kɔ. 38 Yesu ka a ɲa munu ka o ye a yɛrɛ kɔ; a ko o ma ko: «Aw bɛ mun le ɲini?» O ko Yesu ma ko: «Rabi*, i ta so bɛ min?» (Rabi kɔrɔ ye ko Karamɔgɔ). 39 Yesu ko o ma ko: «Aw ye na ka na a flɛ.» O tagara ni a ye ka taga a ta so ye. A tun kɛra wulada wagati le ra. O tora ni a ye o lon tere tɔ bɛɛ ra.

Kirisita ye Ala ta Kuma ye, min kɛra adamaden ye, alaya dafanin yɛrɛ lo, ɲanamanya ani yeelen sɔrɔyɔrɔ. Kibarodiman sɛbɛbaga bɛ o kow le fɔ an ye Yesu ta cogo ta fan fɛ. A ka Yesu ta baara ni a ta kokɛninw ɲafɔ an ye. Ale le ye Danbaga ye, ani fɛn bɛɛ marabaga. A ka Ala ta lɔnniya kura di an ma, ko Ala ye hinatigi Fa ye. Ni a ko «Ala ta Sagaden flɛ nin ye», o bɛ Yesu ta cogoyaw bɛɛ yira an ma. Hayan 14 na, a ka Kirisita cogo ni a bɔyɔrɔ yira an na, nka hayan 29 ni 33 ra, a bɛ Kirisita ta baara kɛkun le ɲafɔ an ye.

Kirisita kɛra adamaden ye k’a yɛrɛ di saraka ye Ala ma; Ala k’a Dencɛ di ka na an ta jurumunw doni ta, ani ka an bɔsi Ala ta kiti ma. Ala tun bɛ o saraka le fɛ, o kosɔn a ka o saraka bɔ, k’a kɛ saraka barakaman ye, Ala bɛ sɔn min ma. Pɔli ko: «Sabu Kirisita le baraka ra Ala ka bɛn don a yɛrɛ ni dunuɲamɔgɔw cɛ; o le sababu ra a ma o ta hakɛw jate tuun. A ka o bɛn kuma karifa anw ma.» (2 Korɛntikaw 5:19).

Ni a fɔra ko «Ala ta Sagaden», o kuma kɔrɔ faamu ma nɔgɔn, sabu sisan an tɛ bɛgan fagara tuun ka an ta jurumun kafari. Mɔgɔ min ka Layirikɔrɔ ta sarakakow kow lɔn kosɛbɛ, o bɛ Ala ta cogo faamu, k’a lɔn ko ni jori ma bɔn, jurumun yafa tɛ sɔrɔ. Nin ye kabako dɔ ye, ko Ala tɛ an yɛrɛ ta jori bɔn ka an ta jurumunw juru sara ni o ye, nka a k’a Dencɛ le di ka o bla an nɔ ra. Mɔgɔ Saninman sara anw mɔgɔ murutiniw kosɔn. Mɔgɔw ka Ala Dencɛ faga kojugukɛbagaw ta jurumunw kosɔn, janko ka olugu kɛ Sankolo Fa ta den terenninw ye. An y’a bato, k’a bonya, Dencɛ ni Nin Saninman ta jɛnɲɔgɔnya ra, ale min ka an kunmabɔ.

O karamɔgɔden fla ma «Ala ta Sagaden» ko kɔrɔ faamu ka se yɔrɔjan o yɔrɔnin kelen bɛɛ ra. Nka o ka Yesu ye ka kaɲa ni Batizerikɛbaga ta kuma ye minkɛ, olugu fana tun b’a fɛ ka Yesu lɔn, ale min tun bɛna kɛ Matigi ye, ani dunuɲa ta Kititigɛbaga, ani fana adamadenw ta jurumun Saraka. O miiriyaw le tun bɛ o hakiri ra, o kosɔn o tun ka o toro malɔ ka to ka lamɛnni kɛ. Yesu le ma Yuhana Batizerikɛbaga ta karamɔgɔdenw kunnacɛn ka o tugu a yɛrɛ kɔ, nka Batizerikɛbaga yɛrɛ le ka a ta karamɔgɔdenw lataga Yesu fɛ. Karamɔgɔdenw fana sɔnna o Matigi kura ma.

O tun bɛ min fɛ, ani o nakun tun ye min ye, Yesu tun ka o lɔn. O tun ka kanuya ni nɛɛma ye Yesu fɛ, ka Yesu ta kuma fɔlɔw mɛn, ko: «Aw bɛ mun le ɲini ?» Matigi ma karan gbɛlɛn dɔw kɛ doni ye ka o sigi o kunna, nka a ka o to o yɛrɛ ma, janko miiriya min bɛ o kɔnɔ, o ye o fɔ. Ele don, ne balema, i bɛ mun le ɲini ? I ta ɲanamanya kun ye mun ye ? Yala i bɛ Yesu le fɛ wa ? Yala i bɛna sɔn ka ka tugu Sagaden kɔ wa ? I ka kan ka nin can gbɛlɛnw ko sɛgɛsɛgɛ kosɛbɛ.

O karamɔgɔden fla k’a fɔ Yesu ye ko o b’a fɛ ka taga ni a ye a ta so. Ɲininkari minw tun bɛ o jusukun na, o ɲininkariw nafa tun ka bon cogo min na, o tun tɛ se ka o fɔ jama ta mankanw cɛma. Yesu ka o jaabi, ko : «Aw ye na ka na a flɛ.» A m’a fɔ ko : «Aw ye na karan kɛ ni ne ye», nka a k’a fɔ le, ko : «Aw ye aw ɲaw yɛlɛ, ni o kɛra aw bɛna ne ta cogo yɛrɛ faamu, ne ta kɛwalew ani ne ta sebagaya, aw bɛna cogo kura faamu Ala ta ko ra.» Ni mɔgɔ min ka gbara Kirisita ra, o tigi bɛ cogo kura faamu dunuɲa ta kow ra, ka Ala ko faamu ka kaɲa ni a cogo yɛrɛ ye. Yesu ta yerikɛcogo bɛ an ta hakirinankow yɛlɛma. Yesu ta ko le bɛna kɛ an ta miiriyaw bɛɛ cɛmancɛ ra, a bɛ kɛ an jigilayɔrɔ ye. Aw ye na ka na a flɛ, i n’a fɔ nin karamɔgɔden fla k’a kɛ cogo min na. O k’a fɔ i ko Yesu ta ciradenw, ko : «An fana ka a nɔɔrɔ ye. Den kelenpe min bɔra Fa Ala ra, ale ta nɔɔrɔ lo. Nɛɛma ni can dafanin tun b’a fɛ.»

Karamɔgɔdenw tora ni Yesu ye o lon bɛɛ. O nɛɛma wagatiw ɲɔgɔn ye koɲumanba ye dɛ! Kibarodiman sɛbɛbaga k’a lakari ko o dugawulon ka koba le ɲa ale ye. O kɔ fɛ, a ka Yesu ta ko can faamu, Nin Saninman sababu ra, sabu a Matigi tun sɔnna a ta lanaya ma, k’a jate mɔgɔ terennin ye, k’a gbɛya a ye ko Yesu le Masiya ye, min tun layiri tara. Yala Kirisita ta yeelen manamanana i jusukun dibi ra wa ? Yala i bɛ tugu a kɔ lon bɛɛ wa?

DAARIKAN: Ala ta Sagaden saninman, an b’i tɔgɔ bonya ka i tando. I ka dunuɲamɔgɔw ta jurumunw bɔ o kunna, ka an ni Ala cɛ bɛn. I kana ban an na, nka a to an ye tugu i kɔ. An ta kojuguw yafa an ma; i ta masaya bonya yira an na, janko an ye se ka baara kɛ i ye ni an jusukun bɛɛ ye.

ƝININKARI:

20. Mun kosɔn karamɔgɔden fla tugura Yesu kɔ?

Mobile device - Print - Top