Previous Lesson -- Next Lesson
8. ? AN BU KRIST I NYANMIԐN SU FULԐ’N I WUN AKUNNDAN WAFA SԐ?
? An si kԑ Krist fuli nyanmiԑn su lᴐ ko trannin Nyanmiԑn i fama su? Ͻ mantan Nyanmiԑn wun koko tra Nyanmiԑn wun mantanfuԑ’m be kwlaa, sran fi kwla fԑ-mԑn i wun sunnzun-man krist. Wafa kunngba nga ᴐ fin nyanmiԑn su lᴐ jrali b’ᴐ kacili i wun sran’n, kԑ ᴐ wuli b’ᴐ cԑnnin’n, ᴐ kwlali sa tԑ’n nin mlinlԑ’n nin Satan yԑ ᴐ fuli nyanmiԑn su lᴐ ekun.
Be kwlaa nga be fa be wun mantan Nyanmiԑn i dunman nun’n, ᴐ ti be nin Nyanmiԑn be afiԑn siesiefuԑ afin ᴐ ti nanwlԑfuԑ yԑ ᴐ ti sԑsԑfuԑ. Be kwlaa nga be lafi i afiԑn siesielԑ junman’n su’n, Nyanmiԑn Wawԑ’n yi be awlԑn’n. Be akunndan’n kaci kpԑkun nyanmiԑn i nguan’n ᴐ yi i wun nglo be nun ᴐ man be nanti saun yolԑ’n nun. Sԑ an klo kԑ amun si Krist b’ᴐ o nguan’n nun’n ᴐ nin sran’m bé ti delԑ junman ng’ᴐ dili’n, an tike amun awlԑn’n su man Nyanmiԑn Wawԑ’n i kwlalԑ’n wlu nun. Su lafilԑ nun’n, amun wa wun i kԑ i nuan a yia yԑ amun wa nanti Nyanmiԑn i jajalԑ’n nin i klun sa yolԑ’n i atin’n su.
Be kwlaa nga b’a sᴐ-man Krist nun’n, wuun Nyanmiԑn b’ᴐ fԑli i mannin e kԑ e ti tԑ yilԑ nnԑn b’ᴐ tu mԑn’n i sa tԑ’n, i yԑ be yili i blo-ᴐ. Nyanmiԑn yiali sa nga ᴐ yili i nglo kleli David kԑ ᴐ ‵kan ndԑ ‵kle Krist’n i nuan: "Tran ase mín fama su wa lele man n yi ɔ kpɔfuɛ’m be ase ɔ́ bo nan n `fa be n ‵yo ɔ́ ja siesiewlɛ" (Jue mun 110 : 1). Be kwlaa nga be kpalo Nyanmiԑn i klolԑ b’ᴐ yili i nglo Krist nun’n, be bu be bᴐbᴐ bé wun fᴐ, afin be kwlaa nga b’a sᴐ-man Nyanmiԑn i ye yolԑ’n nun’n, Nyanmiԑn i ya’n wo be su yԑ ᴐ ti i su yԑlԑ kԑ bé nyin fu b’a sᴐ-man ti delԑ atin kunngba lekeleke nga Nyanmiԑn faa mannin be’n nun.
I sin nan Krist ᴐ’a cԑn’n, wuun wie’n ti klᴐ sran’m be kwlaa bé kpᴐfuԑ’n i nun dan’n. Sanngԑ Krist kwlali wie’n, ᴐ cԑnnin, ᴐ o nguan’n nun mandimaan, ᴐ wu-man kun le. Be kwlaa nga be fa bé wun mԑntԑn i’n, be nin i be cԑ kwlalԑ b’ᴐ o i nguan’n nun’n i nun ᴐ man be ′kwla sa tԑ’n. ? Amu’an wun su yralԑ ng’ᴐ o Krist i cԑnlԑ’n nun’n i wlԑ? ? Yԑ amu’an sᴐ su yralԑ sᴐ’n nun? An sᴐ nun ndԑkԑn!