Mobile device - Print - Bottom

Home -- Wolof -- John - 105 (Jesus intercedes for the church's unity)

Previous Lesson -- Next Lesson

4. Yeesoo ngi ñaan ngir Jàngu bi nekk benn (Yowaana 17:20-26)

---

YOWAANA 17:24
24 Baay, bëgg naa, ñi nga ma dénk nekk ak man fa ma jëm, ngir ñu gis sama ndam, li nga ma sol, ndaxte bg nga ma laata àddina di sosu.

Ci ñaan gi muy bere taalibeem yi, Yeesu woowe na ci Yàlla «Baay» joróom-benni yoon, te it tudde na Ko ci «Yàlla ju dëggu ji» benn yoon. Ak benn tur bàjjo boobu, wone na ci kóoluteem ak cofeelam ci Yàlla. Ndaxte benn la woon ak Baay ji, la ko dale ca njalbéen ga, waaye Moom moo nangu wàcce boppam, te jébbalewu ngir sunu mucc. Wutuloon a siiw, walla am alal. Wax na ay yooni-yoon: «May nga ma». Doom ji dafa jàppe woon doom-Aadama yi, rax ci taalibeem yi, ay jëfam ak sañ-sañ bi, ni mayu Yàlla, mel ni moomu leen. Dafa nangoo woon ñàkk lépp te jébbal ko Aji Kowe ji, te terale ci Baayaam ji. Suufeelu googu moo leen rënk ci jokkoo gu amul dog, ndax Doom ji matal xalaati Baay ji ak ngirteem yépp.

Dégg ndigalam gu mat sëkk moo manoon a tax. Mu ne ci ñaanam «damaa bëgg». Lan la Doom ji bëggoon ci Baay ji? Na bépp taalibéem, ci jamono ji, ak jaww ji, nekk ak Moom fa mu nekk. Noonu Póol daldi ne, daajandoo nañu ma ak Krist ca bant ba, te suulaale ko ak Moom ngir mu séddoo ak Moom ndekkiteem, te noonu dina toogandook Moom ca asamaan, ngir feeñal ni yiwam gi tollu ci màggaay ak rëyaay (Rom 6 :1-11 ; Efes 2 :4-7).

Sunu jokkoo ak Krist raw na li nuy séddook Moom ay metitam ak mbëggeelam, rax ci dolli ndamam. Dafa bëgg nu gis ndamam te sax ci mbëggeelam ba fàww. Apotar ya (Ndaw yu njëkk ya ñu tànnoon ya), jotoon nañoo xam ba noppi sunu yaakaar. Dinanu am mbég mu deesul man a natt bu nu Ko gisee. Dananu jollil ndamam itam, ndax ni nuy soppeekoo ni Moom, ndaxte leeraay googu, feesaayu mbëggeelu Yàlla ci sunu xol moo nu ko may (Rom 5 :5 ak 8 :29). Dafa séddoo ndamam, ndaxte sax ba Mu yoree jëmmu nit mungi àndoon ak ndam. Apotar ya ràññee ca teewaayam ne ndamam li mungi sosoo ci mbëggeel gu laajul dara ci digganteem ak Baay ji, laata ñuy sos àddina si. Ngëm googu aju ci Kenneefu Ñett gu Sell googu, mooy reenu sunu dund ak sunu payooru rammu.

YOWAANA 17:25
25 Baay, yow Ku jub ki, waa àddina xamuñu la, waaye man xam naa la, te ñii xam nañu ne, yaa ma yónni.

Yàlla du wàcc njubte, bu àddina si sax ñàkkee xam loolu. Ku Sell la ba ci njalbéenam, te amul genn lëndëm ci Moom. Ku wone mbëggeelam ci Yeesu, dina xam ne du moom moo tax ba nit ñi gëmuñu Doom ji walla amuñu mucc gi.

Waaye Krist xamoon na Baayam, ndaxte nee na Ko jàkk. Ay melokaanam, ay jikkoom, ak ay turam, amul lu ko ci ump. Li gën a xóot ci ay mbiram xam na ko. Doomam yi. Yeesu xamal na leen seen baayoo ak Yàlla. Ñi ñu yeesal xam nañu ne Yeesu Krist ci Yàlla la génne; du ab yonent kese, walla as ndaw.

Mataayu Yàlla gépp a ngi woon ci jëmmam. Xel mi moo nuy may nu xam baatinu Yeesu ci ni mu nekke nit. Dafa nuy lëkkale ak Doom ji ak Baay,ji Ko yónni. Noonu, mooy buum biy dox ci diggante Yàlla ak nit ki.

YOWAANA 17:26
26 Xamal naa leen sa tur te dinaa ko gën a xamle ngir mbëggeel gi nga am ci man, nekk ci ñoom, te man it ma nekk ci ñoom.»”

Ci gàttal, Krist feeñal na nu turu Baay ji. Firnde bi ci gën a leer nag mooy kurwaa ba, fa Baay ji saraxee Doomam ngir may nu yelleefu séddoo ak moom geño gi. Bi Xel mu Sell mi wàccee ci nun, danoo xaacu ne: «Abba Baay!» Ñaanu Boroom bi moo xàdd ñaan yépp, ndaxte dafay màggal Baay ji, Nguuram ak coobareem.

Li tax nu xam sunu Baayu sang bi Yeesu Krist, mooy mbëggeel gi dox ci diggante Baay ji ak Doom ji, gi ñu nu xëpp. Yeesu dafa ñaan Baayam mu sol nu mbëggeel, Baay ji du ñów Moom kese ci nun, Yeesu it dafa bëgg a dëkk moom ci boppam ci nun. Kon book dafa ñaan ngir Yàlla solu nu ba nu fees dell, ni ko Yowaana seedee ci bataaxalam: «Yàlla mbëggeel la, te képp ku sax ci mbëggeel, sax ci Yàlla, te Yàlla sax ci yów.»

LAAJ:

109. Lan moo tënk ñaanug rammu Yeesu gi?

Mobile device - Print - Top