Mobile device - Print - Bottom

Previous Lesson -- Next Lesson

3. Àddina si bañ na Yeesu ak ay taalibeem (Yowaana 15:18 – 16:3)

---

YOWAANA 15:18-20
18 Bu leen àddina bañee, xamleen ne, man lañu jëkk a bañ, 19 Ñi bokk ci ñoom lañu bëgg. Bu ngeen bokkoon ci ñoom, dinañu leen bëgg, ni ñu bëgge seeny ñoñ. Waaye bokkuleen ci àddina, ndaxte maa leen tànn, ber leen. Looloo tax ñu bañ leen. 20 Fàttalikuleen li ma leen wax: «jaam gënul a màgg sangam.» Bu ñu ma sonalee, dinañu leen sonal yéen itam. Bu ñu toppee sama wax, dinañu topp seen wax yéen itam.

Ba mu wonee taalibeem ya wóllëre gu mat, gi Mu séq ak Yàlla ba noppi, teg ci ñówug Xel miy Dëfalaate, Yeesu dafa tàggat taalibeem ya ngir ñu dékku mbañu àddina si.

Ba mu wonee taalibeem ya wóllëre gu mat, gi Mu séq ak Yàlla ba noppi, teg ci ñówug Xel miy Dëfalaate, Yeesu dafa tàggat taalibeem ya ngir ñu dékku mbañu àddina si. Boobu yebal du lu yomb, waaye xare baatin la. Ñiy sarwiir, bu ñuy xeexal mbëggeel, dañuy jànkonteek xebat, jikkoy mala ak ay tuuma, te du caagéen ne seen matadi moo ko waral, waaye mbañ gi xel yu bon, yi nanguwul kàddu Yeesu di ñaaxe, ñoo ko waral. Seen Boroom bi matoon sëkk ci mbëggeel ak maandute, dékku na mbañeel googu ba ca deewam sax. Ak li bundxataal ga taroon lépp taxuloon Mu daw xare ba, mbaa Mu génn àddina, waaye dafa dee ci kow bëgg ñi ko bañ.

Dunu ay malaaka; xalaat yu bon dañuy génne ci sunu xol. Waaye ci yiwu Krist,am Xel mu bees sax na ci nun. Tuub dafa laaj coppite xel. Ki juddu ci Xel mi, bokkul ci àddina si, waaye ci Yàlla la bokk. Moom moo nu tànn te génne(ber) nu ci àddina sii. Ci làkku grek,baatu “eglise” (jàngu)mungi tekki mbootaayu ñi ñu tànn te ber leen ci àddina si, maanaam ñiy gàddu wareef. Noonu la àddina si jàppe Jàngu bi ni lu doy waar. Ci ag njaboot, man na am kenn ci ñoom nangu Krist, ña ca des bañ Ko. Lu mel noonu dafay indi féwwaloo gu metti ci kër gi, ni ko Yeesu waxe ci téere Yowaana 7:2-9. Bu loolu amee, ki sax ci Yeesu dafay soxla dolleeku ci maandute ak suufeelu, ngir man a dékku ñaawalaate yi ak coong yi. Su fekkee ne loolu ngay dund, bul fàtte ne Yeesu moo la ci jiitu, te kenn tegu ko fenn. Ndaxte dafa leen bëggoon te doon leen wéral, ñoom ñu daaj Ko ci bant, mel ni ab bóomkat la.

Lii la Yeesu dige: Nit ñi dinañu la sonnal te dóor la, waaye dina ci am ñuy dégg sa seede, ni ñu dégge bosam gi. Ni kàddu gi xiiree ñi ko dégg, ba ñu am ngëm, ak mbëggeel, noonu itam la sa seede di jurale dund gu amul àpp ñi lay may nopp. Bépp kercen ab ndawul Krist la ci dunyaa ju ñagas. Loolu mooy firndeel sa woote bi la asamaan jagleel.

YOWAANA 15:21-23
21 Waaye loolu lépp dinañu leen ko def ndax man, ndaxte xamuleen ki ma yónni. 22 Su ma ñówuloon, ne leen dara, duñu am bàkkaar. Waaye léegi, amuñu lay ngir seeny bàkkaar. 23 Ku ma bañ, bañ nga itam sama Baay.

Yeesu xamal na taalibeem yi ne bu delloo asamaan, dinañu leen sonal lool ndax turam wi. Yawut yi, du Almasi bu lewet lañu doon séentu, waaye ab jàmbaar bu leen teggil seen nooteel gi leen wàlliyaan ya tegoon. Seen gëlëmu muccug politik googu mungi jóge ci seen ñàkk a xam màggaayu Yàlla. Manuñu woon ràññee diine ak nguur; seen yàlla soldaar lawoon. Xamuñu woon sunu Baayu Sang bi Yeesu, miy Yàllay bépp dëfal, ak bépp jàmm. Waaw, dinay bàyyi xare yi di am, ni mbugal, waaye xare yooyu, ak mbugal yooyu, duñu taxawal Nguur gi. Xelam mi moo koy taxawal ci dëgg ak ci sellaay.

Krist dafa teewalsi bu leer sarti Baayam yi,w aaye Yawut yi dañoo xalab Xelum mbëggeel gi ak juboo gi. Dañoo wéy ci coxorte ak xare. Réew yépp yi nanguwul Krist, miy boroom jàmm ji, dañuy tàbbi ci bàkkaaru Yawut yi. Seen bàkkaar niroowul ak seeny matadi teggin, waaye seen ñàkk a yëg Yàlla la, ak seen xebatu Xelum Jàmm ji.

Nit ki dafay weddi Yeesu, Nguuram, ak jàmmam ndax li Mu tuutal diine ci kanamu Yàlla ju dëggu ji. Nit ñi dañuy jàppe Yàlla ni leen ko seen xel maye, ak ni ñu ko bëgge. Waaye Yeesu dafa nu feeñal Yàlla jiy mbëggeel. Képp ku bañ googu mbëggeel, yaangi banneexoo yoonu coxorte ak ger, te ku bañ Yeesu, bañ nga Yàlla ju dëggu ji.

YOWAANA 15:24-25
24 Su ma defuloon ci seen biir jëf yu kenn deful, kon duñu am bàkkaar. Waaye léegi nag gis nañu samay jëf, te teewul ñu bañ nu, man ak sama Baay. 25 Waaye loolu am na ngir kàddu gi am, kàddu gii ñu bind ci seen yoon: «Bañ nañu ma ci dara»

Yeesu yégle na ne baayoo gi dox ci digganteem ak Yàlla dina doon ab àtte buy dal ci kow ñiy xataraayu ak Xelam mi, ak y kéemaanam yi. Yeesu def na ay mbir yu doy waar yu mel ni faj ñu wéradi, dàq ay rab, dalal tow bu metti, dundal ay junniy nit, rax ci dolli dekkal ñu dee. Yàlla dafa doon jaare ci Moom ngir wone ay firnde ak ay birali càkkite gu bees. Yawut ya gisuñu woon genn solo ci firnde yooyu, ndaxte ëmbaluñu woon réew ma benn ngañaay bu jëm ci politik, walla Koom-Koom. Waaye nag ba ñu gisee sañ-sañu mbëggeelu Yeesu, ay jëfam sax dañoo mujj nekk doj wu leen di fakkastal, ndaxte gëmuñu woon Baay ji. Ni Yawut ya tëje woon seen xol ci Xel mu Sell mi, noonu la ay milliyoŋi nit di dunde tey jii, ci kasob xel miy noot Yàlla. Ñi nanguwul ne Krist mooy Doomu Yàlla ji, dañuy bañ ay taalibeem, te xamuñu Yàlla bu baax, ba tax dañuy des ci seeny bàkkaar, te di tuumaal Kenneefu Ñett ñi. Waaye nag, Yeesu mbugalu leen, dafay matal liggéeyam, jaarale ko ci ay surgaam. Mbokk mi, nanga jekk ngir dugg ci xare baatin boobu. Ñaanal Yàlla Mu dooleel la, te may la muñ, te nanga pare ngir dékku metit.

ÑAAN: Sang bi Yeesu, nungi lay sant ci li nga matal say tëralin, donte mbaññeelu nit ñi. Jàngal nu ni nuy bëgge sunuy noon, te dugal leen ci mucc gi. Ubbil xoli ñi nga fal, ba ñu dégg sa baat, def sa coobare, te nangu sa Xelum dëfal gi. Wommat nu, te may nu kàttan ak muñ.

LAAJ:

97. Lu tax àddina si bañ Yeesu ak soppeem yi?

Mobile device - Print - Top