Mobile device - Print - Bottom

Previous Lesson -- Next Lesson

2. Ala bɛ baara kɛ ni a Dencɛ ye (Yuhana 5:17-20)

---

YUHANA 5:17-18
17 Yesu ka o jaabi, ko: «Ne Facɛ bɛ baara ra wagati bɛɛ, o kosɔn ne fana ka kan ka baara kɛ.» 18 Yesu ka o kuma fɔ minkɛ, dɔ farara Yahudiyaw kuntigiw ta dimi kan, fɔ o ka kɛ Yesu fagacogo ɲini ye; o ko a ma Nɛnɛkirilon jate minkɛ, ko o dɔrɔn tɛ, nka a ko Ala ye a Fa ye, ka a yɛrɛ kaɲa ni Ala ye.

Sani kɛnɛyari ye kɛ Bɛtisayida, kɔniya tun man ca Yesu kama. Nka o kɛnɛyari kɛra minkɛ, kɔniya bonyara. Yesu juguw k’a latigɛ k’o bɛna a faga. O ra, nin kabako ka lɔyɔrɔba ta Yahudiyaw ni Yesu ta ko ra. O k’a damina ka Yesu tɔɔrɔ, k’a tɔgɔ bla mɔgɔ fagataw ra. Mun le nana ni o yɛlɛmari ye sa?

Kirisita ta kanuya yirako, ani Sariya fanga ta fariya blara ɲɔgɔn na. Layirikɔrɔ ra, mɔgɔw tun bɛ ɲanamanya i ko kasodenw. Kiti caman tigɛra, ka mɔgɔw jagboya ka sariya siraw bɛɛ kelen kelen tagama. Ala ɲasirangaw tun bɛ jija, janko o kana na hali sariya ta ciw fitini dɔ cɛn, janko ka o yɛrɛ ko diya Ala ye. Sariya sira tagama ko kɛra sababu ye ka na ni natabaya ni kanuyantanya ye. I n’a fɔ jamanadenw tun bɛ Ala ta jɛnɲɔgɔnya ra, ka o bɛɛ jɛn ka o kɛ siya kelen ye, damatɛmɛbaga dɔw tun bɛ cogo ɲini ka mɔgɔ bɛɛ jagboya ka o ta cifɔnin caman bɛɛ kelen kelen sira tagama. O ciw bɛɛ ra belebeleba tun ye nɛnɛkirilon ta ko ye, mɔgɔ tun man kan ka baara si kɛ lon min na. I n’a fɔ Ala tun ka dunuɲa dan tere wɔɔrɔ kɔnɔ, ka nɛnɛkiri a tere wolonflanan, o cogo kelen na a tun k’a ta mɔgɔw fana bari baara suguya bɛɛ ma o batorilon na, ni o tɛ a bɛ kɛ saya ye.

O ra, nɛnɛkirilon tun kɛra Yahudiyaw ni o ta Ala ta bɛn tagamasiyɛn le ye, k’a yira ko Ala bɛ o cɛ ra, k’a kɛ i n’a fɔ o ma jurumun si kɛ Ala ɲa kɔrɔ, min bɛ se ka o jɛnɲɔgɔnya ɲuman cɛn.

Farisi minw tun dimina nin sariya cɛnko kosɔn, Yesu ka olugu jaabi ni kuma min ye, o kuma ka surun: «Ala bɛ baaara ra». O kumakunw minw b’a fɔ ko ‹k’a kɛ›, walama ‹ka baara kɛ›, o fɔra siɲagako caman hayan 17 ni 18 ra. Yesu ka o flankafuw jaabi ni min ye, o ye ka Ala ta kanuya ta baara cogo yira o ra. Ala nɛnɛkirira a ta dunuɲa danni baara ra fɔ lon min adamaden nana ben jurumun na. Kabini jurumun donna dunuɲa kɔnɔ, kabini saya ka danfɛn bɛɛ cɛn, kabini dunuɲa faranna ka bɔ a sindiyɔrɔ ra, Ala bɛ jija wagati bɛɛ ka mɔgɔ tununinw kisi, ka mɔgɔ murutininw lasekɔ a ta jɛnɲɔgɔnya kɔnɔ. Ala bɛ min fɛ o ye an ta saninyari ye, janko k’a ta kanuya yira an na saninyari kɔnɔ.

Kɛnɛyari min kɛra nɛnɛkirilon na, o ye Ala ta baara tagamasiyɛn dɔ ye, ka Ala cogo yira an na. Yesu ka nɛɛma waajuri kɛ, ka kɛwale dɔw kɛ, minw bɛ a ta kanuya yira, hali ni a bɛ i n’a fɔ a ta kow bɛ Sariya sɔsɔ. Ni i bɛ tɔw kanu, i ka Ala ta Sariya bɛɛ le dafa. Minw bɛ Ala ɲini faniɲa kan, k’a sɔrɔ kanuya tɛ o fɛ, nin kɛnɛyari ko nana olugu le jaraki.

Yahudiyaw pɛrɛnna ko: «Yesu bɛ sariya cɛnna; Aw ye na! An ni Ala Jɛnɲɔgɔnya bɛ bɔra a nɔ ra. Nin cɛ ye sariya jugu le ye, a bɛ Ala tɔgɔ cɛnna, k’a yɛrɛ kɛ sariya kura kuntigi ye; a bɛna kojugu le lase an ta jamana ma!»

Mɔgɔ si m’a janto Kirisita ta kanuya ra ɲanibagatɔw ta fan fɛ, mɔgɔ si m’a faamu ko a ka se sɔrɔ saya kan. O tora o ta fiyentɔya ra, o tora diina ko flankafuya ra. Bi, ni mɔgɔw tɛ se k’a faamu ko Yesu ye Kisibaga ye, o ta Ala ko flankafuya kosɔn, o man kan ka bara aw ra.

Yahudiyaw jusu tun bɔra Yesu kɔrɔ kosɛbɛ fana, ko a bɛ «Alatɔgɔcɛnkuma» le fɔra, ka Ala wele ko a Fa. O tun ye kuma jugu le ye min tun man kan ka fɔ. O ra, o pɛrɛnna k’a fɔ ko «Ala ye kelen le ye; Dencɛ t’a fɛ.» Cogo di Yesu bɛna a fɔ Ala ma ko a Fa?

Nin miiriya bɛ Yahudiyaw ta kolɔnbariya le yira; O tun tɛ tagama ka kaɲa ni Nin Saninman ta miiriya ye, o fana tun tɛ Ala ta Kuma lɔn kosɛbɛ. Sabu cirayakuma dɔw bɛ Ala ta Kuma ra, minw b’a yira ko Ala ye Fa ye. Ala ka jɛnɲɔgɔnya don ni siya min ye, a bɛ olugu wele ko ‹ne dencɛ› (Bɔri 4:22; Oze 11:1). O siya fana bɛ Ala wele ko ‹Fa› (Sariya 32:6; Zaburu 103:13; Ezayi 63:16; Yeremi 3:4, 19 ani 31:9). Ala k’a ta jamana ta masacɛ Ala ɲasiranbaga wele ko ‹ne dencɛ› (2 Samawilu 7:14). Nka o jɛnɲɔgɔnyakɔrɔ ra, mɔgɔ si tun tɛ se ka Ala wele ko ‹Fa›. Yahudiyaw ta miiriya ra o tun tɛ se ka kɛ, sabu o tun bɛ jate wasoya le ye. Ala tun ka layiri min ta ko Yesu Masiya bɛna na ka bɔ Ala le ra, ani ko a bɛna ɲanamanya banbari di mɔgɔw ma, Yahudiyaw tun ka o layiri lɔn. Kɔniya min tun bɛ o kɔnɔ Yesu ta fan fɛ, o tun bɛ o ta lanabariya le yira Masiya ta fan fɛ.

Yahudiyaw tun dimina kosɛbɛ Yesu ta kumaw kosɔn; Yesu fana ka o jaabi, k’a fɔ k’a gbɛya ko ale Fa bɛ fɛn o fɛn kɛ, ko ale fana bɛ o kɛ ni hakiritigiya ye ani kanuya. Yesu k’a fɔ o ye ko ale bɛ se ka fɛn bɛɛ kɛ, ko ale ni Ala bɛɛ ka kan. Yahudiyaw jusu wurira, o ka kuma gbɛlɛnw fɔ. Ni mɔgɔ o mɔgɔ k’a yɛrɛ kaɲa ni Ala ye, o tigi ka kan ka faga. Yahudiyaw tun bɛ Yesu kɔniya yɛrɛ le, ko Ala tɔgɔcɛnbaga lo.

YUHANA 5:19-20
19 Yesu ko o mɔgɔw ma tuun ko: «Can ra, ne b’a fɔ aw ye ko Dencɛ tɛ se ka foyi si kɛ a yɛrɛ ma, ni a ma a Fa ye a bɛ min kɛra. Fa bɛ min kɛ, Dencɛ fana bɛ o ɲɔgɔn kɛ; 20 sabu Fa bɛ Dencɛ kanu, o kosɔn a bɛ ko o ko kɛ, a bɛ o bɛɛ yira a ra. A yɛrɛ bɛna fɛn caman yira a ra tuun min ka bon ka tɛmɛ nin kan, janko aw ye kabakoya.

Yesu ka Yahudiyaw ta kuma cɛjuguw jaabi ni kanuya ye, ka o ta kɔniya kunbɛn, ka Ala ta kanuya ta baara yira o ra. Can lo, Fa bɛ baara kɛ cogo min na, Dencɛ fana bɛ baara kɛ o cogo le ra. Yesu bɛ min kɛ, a tɛ o kɛ a yɛrɛ ma. Kelenya min bɛ Yesu ni Ala cɛ, o bɛ i n’a fɔ den ni a Fa yɔrɔ ka surun ɲɔgɔn na cogo min na. Den bɛ a facɛ flɛ kosɛbɛ; a bɛ a borow kɔrɔsi, k’a lɔn a borow bɛ baara kɛ cogo min na. A facɛ bɛ min kɛ, a fana bɛ o kelen le kɛ k’a kaɲa ni a facɛ ta ye. Yesu k’a yɛrɛ majigi, ka nɔɔrɔ la a Fa kan, k’a bonya. Anw tɛ foyi ye, fɔ baaraden ɲacitanw, an welera ka an Fa tɔgɔ saninya, i n’a fɔ Yesu k’a kɛ cogo min na.

Yesu banna a yɛrɛ ra, k’a yɛrɛ kɛ saraka ye, k’a yɛrɛ majigi minkɛ, o le sababu ra a ka fangatigiya sɔrɔ k’a Fa ta kɛwalew ɲɔgɔn kɛ. Jogow, ani tɔgɔw, ani kɛwale minw bɛɛ bɛ Fa Ala fɛ, o bɛɛ bɛ ale fana fɛ. Ale le ye Ala ɲanaman ye, ani Ala banbari, ani sebagaya bɛɛ tigi, ani kanuya tigi, ani nɔɔrɔ tigi. Kelenya min bɛ a ni Ala cɛ o dafanin lo.

Fa Ala bɛ Kirisita kanu, sabu Kirisita k’a yɛrɛ kɛ saraka ye; a tɛ foyi dogo a ma. A bɛ a ta kotigiya ni a ta kokɛtaw ni a ta kɛwalew bɛɛ kɛ ale ni Dencɛ ta ye. Nin yɔrɔ karanta ra, an b’a ye ko Ala ta yiracogo saba ta kelenya ko lakarira k’a gbɛya kosɛbɛ – kanuya ta kelenya, kanuya min bɛ ye kɛwalew fɛ. I n’a fɔ Fa, ani Dencɛ, ni Nin Saninman bɛ baara kɛ ɲɔgɔn fɛ fɛn bɛɛ ra, o ka kan ka an jusu saro, k’a lɔn ko Ala ta Yiracogo saninman saba bɛ baara kɛ wagati bɛɛ ani tuma bɛɛ – janko ka kɛrɛkow bɛɛ ban, ani kɔniya, ani faranni minw bɛɛ bɛ sɔrɔ dunuɲa kɔnɔ bi. Kanuya ta kelenya ta baara, ani sariya ko ta flankafuya gbansan, o fla cɛ ka jan ɲɔgɔn na dɛ!

DAARIKAN: An Fa min bɛ sankolo ra, an b’i fo sabu i ka i Dencɛ ci an fɛ. Ale ta kɛwalew fɛ, i ka i ta baara cogow yira an na, ka i yɛrɛ cogo fana yira an na. Sariya ko flankafuya min bɛ an na, an bɔsi ka bɔ o bɛɛ ra, janko an ye kanuya ta kɛwalew sira le ɲanawoloma ka o sira tagama. Ala ko yɛrɛbonya min bɛ an na, an bɛ nimisa o ra, ka i daari tɔw ye, minw bɛɛ bɛ i n’a fɔ fiyentɔw Ala ko ta fan fɛ, janko olugu ye se ka kɛ o yɛrɛ ta ye, i ta kanuya baraka ra, ka o yɛrɛ majigi i ye, ani ka i kan mina.

ƝININKARI:

39. Ala bɛ baara kɛ ni a Dencɛ ye cogo di, ani mun kosɔn a bɛ o kɛ?

Mobile device - Print - Top