Mobile device - Print - Bottom

Previous Lesson -- Next Lesson

a) Yesu ka jɛnɛyakɛbaga bla nimisa sira kan (Yuhana 4:1-26)

---

YUHANA 4:1-6
1 Ayiwa, Farisiw tun k’a mɛn ko Yesu bɛ karamɔgɔden caman sɔrɔra ka o batize ka tɛmɛ Yuhana kan; Yesu tun bɔra o ko kala ma. 2 K’a sɔrɔ Yesu yɛrɛ tun tɛ mɔgɔw batizera, a ta karamɔgɔdenw le tun bɛ mɔgɔw batize. 3 O kosɔn, Yesu bɔra Zude mara ra ka kɔsegi Galile mara ra. 4 Nka jagboya lo ko a tun ye Samari mara cɛtigɛ. 5 Ayiwa, a tagara se Samari dugu dɔ ra, o tɔgɔ ye ko Sikari; Yakuba tun ka foro min di a dencɛ Yusufu ma fɔlɔfɔlɔ, Sikari bɛ o foro le kɛrɛ fɛa. 6 Yakuba ta kɔlɔn tun bɛ o yɔrɔ ra. Ayiwa, Yesu tun sɛgɛra tagama ra minkɛ, a nana sigi kɔlɔnda ra. O tuma ra tere tun sera kuncɛ.

Kibarodiman sɛbɛbaga bɛ Yesu wele ko ‹Matigi›, min sigira i ko Masacɛ dunuɲa ko bɛɛ kunna wagati bɛɛ. A bɛ kojugu sara, nka a bɛ nɛɛma kɛ. A bɛ sira yira, a bɛ kiti tigɛ fana. Yuhana k’a ta nɔɔrɔ ye, o kosɔn a b’a bonya ni nin tɔgɔba ye.

Farisiw tun k’a damina ka o yɛrɛ cɛsiri, ka labɛn kɛrɛ kama. Kirisita ta waajuri tun ka mɔgɔ caman kun mina Zuda mara ra. A tun bɛ mɔgɔw wele i ko Batizerikɛbaga, ko o ye nimisa, ka lɔ o ta jurumunw na. A kɛra i n’a fɔ a tun blara Yuhana nɔ ra le (k’a sɔrɔ ale yɛrɛ tun tɛ mɔgɔw batize, a tun ka o baara di a ta karamɔgɔdenw le ma, minw tun bɛ ni Yuhana ye kakɔrɔ, sabu ale yɛrɛ ta wagati tun ma se fɔlɔ). Yesu ka mɔgɔw karan ko batɛmu ji tɛ foyi ye ni Nin ta batɛmu tagamasiyɛn tɛ.

Farisiw ta sɔsɔri nana kɛ bonya ye ka taga ɲa minkɛ, Yesu k’a latigɛ ka taga sahiliyanfan fɛ. A Fa ka min latigɛ a ye a tun bɛ o sira le kan. K’a yɛrɛ ɲagami kɛrɛ dɔ ra ni nin tɔgɔɲinibagaw ye, Yesu k’a ye ko o wagati ma se fɔlɔ. A k’a ye ko a ka fisa ale ye tɛmɛ kuruw cɛ ma, ka Samari mara cɛtigɛ, ka se Galile.

Samarikaw tun tɛ siya ye min ta ko lɔnna Layirikɔrɔ ra, sabu olugu tɛ yahudiya yɛrɛworow ye. Wagati min Asirikaw nana ben Samari mara kan san 722 wagati ra Yesu nawagati ɲa, ka Iburahima ta durujaw mina ka taga ni o ye Mezopotami, o ka siya wɛrɛw sigi o nɔ ra Samari. Yahudiya minw tun tora Samari o siya wɛrɛ mɔgɔw ɲagamina olugu ra, ka Ala bato kɛ batori ɲagaminin ye, Ala ni batofɛn wɛrɛw cɛ.

Ayiwa, Yesu nana se Sikari, min bɛ Sikɛmu kɛrɛ fɛ, yɔrɔ min nafa ka bon Yahudiyaw ta bɛmaw fɛ. Yosuwe ka Ala ta jɛnɲɔgɔnya sigi kokura ni Izirayɛlimɔgɔw ye o yɔrɔ le ra (Damina 12:6 ani Yosuwe 8:30-35). Kɔlɔn dɔ bɛ o yɔrɔ kɛrɛ fɛ, a fɔra ko o tun ye Yakuba ta ye (Damina 33:19). Yusufu sanin korow donna o yɔrɔ le ra fana (Yosuwe 24:32). O yɔrɔ kɛra hakirijigiyɔrɔba ye Layirikɔrɔ ra.

Yesu tun sigira kɔlɔnda ra, a sɛgɛra nin tagamajan ni tere funteni kosɔn. Adamaden tun lo, a sɛgɛra, minlɔgɔ b’a ra; danfɛn yebari tun tɛ, walama Ala yiracogo dɔ – Adamaden tun lo, adamadenya ta dɛsɛcogo bɛɛ tun bɛ a ra.

YUHANA 4:7-15
7 Ayiwa, Samarikamuso dɔ nana jibiyɔrɔ ra. Yesu ko a ma ko: «Ji dɔ di ne ma, ne bɛ min.» 8 O y’a sɔrɔ a ta karamɔgɔdenw tun tagara dugu kɔnɔ ka taga domuni san. 9 Samarikamuso ko Yesu ma ko: «E! Ele min ye Yahudiya ye, mun na ele bɛ sɔn ka ne daari ji minta ra, k’a sɔrɔ ne ye Samarika ye?» Muso ka o fɔ, sabu Yahudiyaw tɛ sɔn jɛnɲɔgɔnya si ma ni Samarikaw ye. 10 Yesu k’a jaabi ko: «Ala bɛ fɛn min di gbansan, ni i tun ka o lɔn, ani mɔgɔ min ko i ma ko: ‹Ji di ne ma, ne bɛ min›, ni i tun ka o tigi lɔn, ele yɛrɛ le tun bɛna ale daari ji ra, a tun bɛna ji ɲanaman di i ma.» 11 Muso ko Yesu ma ko: «An karamɔgɔ, jurufiyɛ tɛ ele boro, kɔlɔn fana ka dun, ele bɛna o ji sɔrɔ yɔrɔ juman sa, ka o di ne ma? 12 An bɛmacɛ Yakuba le ka nin kɔlɔn di anw ma; ale yɛrɛ ka nin ji min, ani a ta denw ni a ta bɛganw. O tuma ele ka bon ni an bɛmacɛ Yakuba ye wa?» 13 Yesu ka muso jaabi, ko: «Ni mɔgɔ o mɔgɔ ka nin ji min, jiminlɔgɔ bɛna o tigi sɔrɔ tuun. 14 Nka ne bɛ ji min di, ni mɔgɔ o mɔgɔ ka o ji min, jiminlɔgɔ tɛna o tigi sɔrɔ tuun, sabu ne bɛ ji min di, o bɛna kɛ bununji ye o tigi kɔnɔ ka woyo fɔ ka ɲanamanya banbari di o tigi ma.» 15 Muso ko a ma ko: «An karamɔgɔ, o ji di ne ma kɛ, janko jiminlɔgɔ kana ne sɔrɔ tuun, ani ne kana na ji bi yan tuun.»

Ka Yesu siginin to kɔlɔnda ra, Samarikamuso dɔ nana ji bi. Ale tun tɛ na sɔgɔmada fɛ, walama wulada fɛ i ko muso tɔw, nka a tun bɛ na teregban le fɛ. A tun t’a fɛ a ni mɔgɔ si ye bɛn; ni a tun ka taga yɔrɔ o yɔrɔ, bɛɛ tun b’a dɔgɔya a ta kɛwalejuguw kosɔn. Yesu k’a jusukun cogo lɔn, k’a lɔn ko saninyari lɔgɔ tun b’a ra. Yesu tun b’a fɛ k’a dɛmɛ; Yesu ma sariya kumakan tan yira a ra, a m’a mafiyɛnya, nka a ka ji minta le ɲini a fɛ dɔrɔn; a k’a miiri ko muso bɛ se ka ji kɔni di ale ma. Nka wagati min muso k’a lɔn Yesu ye yahudiya ye, a sigiyara, sabu dinga ba le tun bɛ o siya fla cɛ. Yahudiya dɔ tun tɛ sɔn ka maga hali samarika dɔ ta minan na, janko a kana a yɛrɛ lanɔgɔ. Samarikaw fana ta tun bɛ ten. Nka o bɛɛ n’a ta Yesu k’a kɛ i n’a fɔ foyi tun tɛ ale ni muso cɛ, min bɛ se ka o fla dɔ lanɔgɔ; a ka ji daari a fɛ ka bonya le la a kan.

Yesu tun bɛ min ɲini o tun ye ka Ala ko lɔgɔ don min muso jurumuntɔ ra. Ni mɔgɔ bɛ kɔlɔnda ra ra, ji ko le ka kan ka fɔ. O ko ka Ala ta ninfɛn ko lana muso hakiri ra. Yesu ka Ala ta kanuya ko yira a ra, ka o kɛ a ta kuma kun ye. Ala ta kiti le tun tɛ a makɔnɔna k’a halaki, nka Ala ta ninfɛn min labɛnna a ye nɛɛma baraka ra. O ye kabako ye dɛ!

Ala ta nɛɛma tɛ na a yɛrɛ ma ten, a bɛ na Yesu le baraka ra. Ale le ye Ala ta ninfɛnw ni a ta nɛɛmaw dibaga ye. O bɛɛ n’a ta muso tun b’a jatera i ko mɔgɔ gbansan. Kirisita ta nɛɛma tun dogonin lo a ma fɔlɔ, nka min ye kanuya ye, o ko tun gbɛyara a ɲa kɔrɔ. A k’a fɔ a ye ko ɲanamanya ji bɛ ale fɛ. Sankolo ta ji, o bɛ mɔgɔ ta nin ta minlɔgɔ ban. Mɔgɔ bɛɛ bɛ sama kanuya ni can nɔ fɛ, bɛɛ b’a fɛ ka kɔsegi Ala ma. Ni mɔgɔ min ka na Yesu fɛ, o bɛ ji sɔrɔ k’a ta minlɔgɔ ban.

Minw bɛ Ala ta ninfɛn daari, Yesu bɛ o di olugu ma. An mako bɛ min na, an ka kan ka o fɔ, i n’a Yesu k’a fɔ cogo min na, ko a mako bɛ ji ra. Ni mɔgɔ min m’a yɛrɛ majigi, ka daari kɛ, o tigi tɛna sankolo ta ji sɔrɔ, ji min bɛ di gbansan.

Muso ma Yesu faamu. Ale ta miirira tagara ji yɛrɛ le fɛ, o kosɔn a ko: «jurufiyɛ tɛ ele boro, kɔlɔn fana ka dun, ele bɛna o ji sɔrɔ yɔrɔ juman sa, ka o di ne ma?» O bɛɛ n’a ta a hakiri tun ɲagamina, sabu a tun bɛ Yesu ta ɲumanya ni a ta kanuya yera. Yesu tun m’a dɔgɔya i ko mɔgɔ tɔw. Yesu ta nɔɔrɔ kosɔn, a ni nin muso tun tɛ kelen ye, nka Yesu ta saninmanya kosɔn a tun b’a kanu. A tun ma bɛn ni cɛ si ye fɔlɔ, min jusukun tun gbɛnin lo i ko Yesu. A ka Yesu ɲininka ko: «Yala ele ka bon ni an bɛmacɛ Yakuba ye wa? Yala ele b’a fɛ ka kabako dɔ kɛ ka kɔlɔn kura di an ma?»

Yesu k’a jaabi k’a fɔ a ye ko ale tɛ kumana nin dugukolo ta ji ko le ra, sabu ni mɔgɔ min ka ji gbansan min ka i ta minlɔgɔ ban, minlɔgɔ bɛna o sɔrɔ tuun kɔ fɛ. Farisogo bɛ ji sɔrɔ dɔrɔn, o kɔ fɛ o ji bɛ ban.

Yesu bɛ ɲanamanya ta ji le di an ma, ka an nin ta minlɔgɔ ban. Lanabagaw bɛ Ala ɲini, ani o b’a sɔrɔ. O tɛ i n’a fɔ dunuɲa hakiritigi minw bɛ can ko miiri o yɛrɛ kɔnɔ, k’a ɲini, nka o t’a sɔrɔ. Ala ka lanabagaw sɔrɔ; olugu ka Ala cogo lɔn. Ala ta kanuya bɛ an wasa tuma bɛɛ. A bɛ ko minw yira an na o tɛ kɛ fɛn kɔrɔ ye, fɔ ka na lɔgɔbɔ an na; lon o lon a bɛ fɛn kura le yira an na. Ala ta lɔnniya bɛ an hakiri dayɛlɛ, ka an wasa; miiriya gbansan tɛ, nka Ala ta sebagaya lo, ani a ta ɲanamanya, ani a ta yeelen, ani a ta hɛra. Ala bɛ ji min di an ma ka bɔ sankolo ra, o ye Nin Saninman le ye.

Yesu bɛ segi a kan fɔ siɲaga saba ko ale kelenpe le bɛ se ka ɲanamanya ta ji di mɔgɔ ma. Diina si, walama fangatigi si, walama bangebaga si, walama teri si tɛ se ka nin ta minlɔgɔ ban adamaden na, ni an Kisibaga Yesu kelenpe tɛ.

Ni mɔgɔ o mɔgɔ ka Ala ta ninfɛn sɔrɔ, o tigi cogo bɛ yɛlɛma. Minlɔgɔtɔ bɛ yɛlɛma ka kɛ bununji ye, ka woyo ka nɛɛma lase tɔw ma, janko o ye se ka Ala ta nɛɛma sɔrɔ ani a ta ɲagari ani a ta kanuya, ani Nin Saninman ta kɛwale wɛrɛw. Ni o tigi tora Kirisita ra, a bɛ nɛɛma dɔ sɔrɔ ka fara dɔ kan, ka ale yɛrɛ kɛ Ala ta ninfɛn dɔ ye min bɛ mɔgɔ caman nafa.

Muso k’a ye ko Yesu jusukun tun gbɛnin lo, ko jinamori tun tɛ. A ka Yesu daari o ji ɲanaman na. A mako bɛ min na a ka o fɔ, nka hali bi a tun b’a miiri ko Yesu bɛ ji minta yɛrɛ le ma. A tun b’a miiri ko ni ale ka o ji sɔrɔ, ale tɛna a ta daga ɲu a kun na tuun ka na a yɛrɛ ɲagami mɔgɔw wɛrɛw ra, minw b’a kɔniya.

DAARIKAN: An Matigi Yesu, ele min ye ɲanamanya ji dibaga ye, Ala lɔnniya ani kanuya minlɔgɔ min bɛ an na, o ji di an ma ka o minlɔgɔ ban. An ta kɛwalejuguw yafa an ma; an saninya ka jurumun ta nɔgɔ bɛɛ bɔ an na, janko Nin Saninman ye jigi an kan, ka to an kɔnɔ wagati bɛɛ. A to an ye kɛ bununjiw ye, janko Nin Saninman bɛ an jusukun fa fɔ ka an wasa cogo min na, mɔgɔ caman ye se ka min an na o sababu ra. An karan sabari ra, ani daariri, ani kanuya ani lanaya.

ƝININKARI:

32. Yesu bɛ ninfɛn juman le di an ma? O ninfɛn ɲaci ye mun ye?

Mobile device - Print - Top