Waters of Life

Biblical Studies in Multiple Languages

Search in "Peul":
Home -- Peul -- Matthew - 058 (Overcoming Revenge)
This page in: -- Arabic -- Armenian -- Azeri -- Bulgarian -- Chinese -- English -- French -- Georgian -- Hausa -- Hebrew -- Hungarian? -- Igbo -- Indonesian -- Javanese -- Latin? -- PEUL -- Polish -- Russian -- Somali -- Spanish? -- Telugu -- Uzbek -- Yiddish -- Yoruba

Previous Lesson -- Next Lesson

MATTA - Tuubee ko fii laamu Almasiihu on ngun bhadike!
Jandeeji suutaadhi ka Linjiila Almasiihu on no Matta yottiniri mo non
SOBBHUNDU 2 - Fii waaju e golle Almasiihu on Jaliilu (Matta 5:1 - 18:35)
A - Fii waaju ngun ka hoore fello: Fii sariya teddudho on ka laamu kammu ngun (Matta 5:1 - 7:27) -- Fii no maakuuji Almasiihu on dhin mottindiriraa non ka aranun
1. Fii ko waddhii en kon telenma yimbhe bhen (Matta 5:21-48)

d) Fii ko mewaare nden foolata kon yagginannde nden (Matta 5:38-42)


MATTA 5:40-42
40 On mo faala-maa nabhude ka nyaawoore fii yhettugol ma fokiya on, accidu mo e waramba on kadi. 41 On mo karhu-maa kadi rondanagol mo dongal, nabhaa yeru sagara gooto, nabhan mo yeru sagara dhidhi. 42 Okkor on toriidho ma, wota a huccu kadi on faalaadho ma nyawlaade.

Almasiihu on jattinay en e nder miile bhayru o wuuri hakkunde men, ko o baaso e newiidho e weltiidho. Hande, himo wattita e mbaadi makko ndin. E hino dhoo misal yaadungal e ngon firo: nyannde goo musibbhe Iisayankoobhe mottondiri, seekoowo leddhe hooti ka makko. O tawi wujjoobhe leddhe dhidho no yhettude leddhe makko dhen. Seekoowo leddhe on waawi hoore makko. O wallitii bhe, o bheydita bhe e ko bhe ari e yhettugol ngol kon. O dhowti bhe haa ko bhe yhawata ka nder otowal, dhun wadhi yo wuybhe bhen yhettir mo wa goddho e tawdaadho e bonki mabbhe kin. Bhe wojji hersa fewndo ko o wi’i bhe wondema ko kanko woni jooma seekirde leddhe dhen. O yewtiri wuybhe bhen giggol e newaare. Hakkee ko goddho e mabbhe hersi o tuubi, o okkitiri ngurndan makko dhan Almasiihu on, onsay o qirritii junuubaaji makko dhin. Hita on yejjita wonde Almasiihu on no hebulii jattingol bhernde mon nden e ko catidhon kon e keyeeji mon dhin fii sadaka giggol ngol e kurkorgol gundoo.

Ka rabbindhingol, Iisayankoobhe bhen haanaa wonude yeddoobhe. Hita en wattana yili e barmehoy tosokoy koy. Si ko barminadhen kon addii yo en dhabbhu no yottoren, ko fii nafa moyyho wadhirten dhun, hara hinaa wondugol e miijo yottagol. Hita en weebhitoo e barmeejii dhin. Kono non, si en bonnanaa-ma, hidhen haani fewtirde dhun bhernde moyyhere. Ko farlii en kon ko dhabbhugol no yaltiren e nder satteede nden e no mawniren e nder ndarndande nden. Si goddho wi’ii wonde: «Bhandu ndun e yhiiyhan dhan waawataa ronditaade sugu nden yennoore», andintinee mo wonde «bhandu ndun e yhiiyhan waawataa hebhude gebhal ka laamu Alla» (Korenti 1.15:50).

Ruuhu-Seniidho on ardoto en no sendonden nyaametee men on e kaalisiiji men dhin e yimbhe bhen rewrude e faamu e moyyhere fii wota bhe laato anyanbhe. Muudo on e korka kan e julde nden yeddhataa en kisiyee men on. Allaahu on landaaki en dhun bhayru himo yidhi en giggol laabhungol, o yedhay en hara huunde en yobhaali. O barkinay en o hisina en wondude e dendaangal bhen jabhubhe moyyhere makko yaajunde nden. Ko o faalaa ko yo en hebbine haa heewa moyyhere makko nden. Wano non, en nyawlay tampubhe bhen hara en landaaki tono, hara bhe jabhataa giggol lontiniraangol kaalisi, bhe mawnina innde makko nden.

Jabhen nyawlugol (nyawlugol ko kuugal wondungal e giggol non wano dokkal ngal woniri dhun non), ko fii dhun ittanay goddho soxola fewndiidho on, kono dhun kadi adday yo aaden nyawlaadho on wattu yili no o ebbhindora yeeso, no o gollira e no o wonira nundhudho. Battane mun, hita on hucca on faalaadho nyawlaade on ko haanani kon ngurndan makko dhan maa fii ko o wadhira ngeyngu. Hita on doga bhen faalaabhe fewtinande on sugu ndun muraadu, hita on moyyhina tappale, maa dhabbhon lamitorgal fii no seediron e ootigi. Jabhee nyawlotoodho on on. Si tawii himo bhutti, o suusaa hollugol on faale makko on, huntiranee mo soxola makko on e faale makko on faamu.

TORAARE: Baaba an wondho ka kammu, hidha heewi munyal e giggol. Bhiddho maa on ko newaare nden e yankinaare nden wonti neddho. Yaafano men geddi amen dhin e gacce amen feyyhitudhe keerol dhen. Waru e amen nganyaneendi ndin e bherdhe amen yoorudhe dhen, wattaa men yankiniibhe. Feenyu e junuubankeebhe bhen, addaa bhe e tuubuubuyee sabu giggol ngol fii no bhe nandira e faybhe jibiniraabhe bhen Ruuhu-Seniidho maa on.

LANDAL:

  1. Ko honno haanudhen huuwirde nde goddho bonnani en?

www.Waters-of-Life.net

Page last modified on May 18, 2012, at 09:46 AM | powered by PmWiki (pmwiki-2.3.3)