Mobile device - Print - Bottom

Previous Lesson -- Next Lesson

3. Botondi ya Nzambe emonanaki na bomoto (Yoane 1:14-18)

---

YOANE 1:14
14 Mpe Liloba akómaki mosuni, mpe afandaki kati na biso, (mpe tokómi mosuni,) totondi na ngolu mpe na bosolo. Mpe tomoni nkembo ya ye, nkembo lokola ya Mwana se moko uta na Tata.

Yesu Klisto azali nani? Azali Nzambe ya solo mpe moto ya solo. Yoane azali kolakisa biso libombami monene oyo lokola mobeko ya Sango Malamu na ye. Ntango alobeli bomoto ya liloba ya Nzambe, alakisi biso moboko ya Sango na ye. Na molongo ya kotanga 14 ezali fungola ya masolo nyonso oyo elandi. Soki osimbaki bilembweli nyonso ya motuya wana ya Molimo, okozwa boyebi bozindo ya mikapo oyo elandi.

Kozala na Klistu kati na biso ekeseni kobonga na biso na molimo. Biso banso tozali na nzoto, mpe tobotamaki na tata mpe mama. Nsima na yango, liloba ya Sango Malamu esimbaki biso mpe ebotaki bomoi ya seko kati na biso. Nzokande, Klisto abotamaki na tata ya mosuni te. Liloba ya Nzambe eyaki epai ya Malia engebene oyo anzelu ayebisaki ye: “Molimo Mosantu akoyela yo, mpe nguya ya Oyo-Aleki-Likoló ekozipa yo. Yango wana mpe mwana ya bule oyo ekobotama na yo akobengama Mwana ya Nzambe” (Luka 1:35). Na kondimaka Sango oyo ya kokamwa na nzela ya kondima, ngɔndɔ Malia azwaki zemi moko oyo ekokani na mosusu te na libumu na ye, oyo kati na yango Molimo Mosantu asangisaki na makila ya bato. Oyo ndenge Nzambe akomaki moto.

Makanisi na biso ezali na ndelo liboso ya bosolo oyo. Mayele ya mokili ekoki kolimbola libombami yango te. Makambo oyo bato bakutanaka na yango ezali na likoki te ya kososola yango. Bato mosusu oyo bayekoli kelasi na makambo ya Nzambe balukaka kokitisa likambo oyo. Ekoki kosalema te ete Klisto abotama mpo na makanisi ya bato na kolobáká ete abimaki bobele na nzoto kozanga ete azala mpenza na nzoto ya mosuni oyo eyokaka mpasi mpe mawa. Nzokande, toyamboli ete Klisto azalaki moto mobimba mpe Nzambe mobimba na ntango moko.

Kokóma moto ya Klisto ezali ndimbola oyo eleki malamu ya mbotama oyo ya kokamwa. Mwana ya Nzambe ya seko, oyo azalaki elongo na Tata uta seko nyonso, azwaki esika na bomoto na biso ya mosuni oyo ezangi masumu, mpo ete Molimo Mosantu kati na ye alongaki ezaleli nyonso ya masumu. Na yango Yesu azali moto se moko oyo afandaki zanga kosala mabe mpe na bopeto, kozanga litɔnɔ.

Mwana ya Nzambe asanganaki na batomboki, bato ya motema mabe mpe ya mabe, oyo bango nyonso bakufaki. Kasi, azali seko, azali na likoki te ya kokufa soki totaleli bonzambe na ye. Atako atombolamaki, alingaki biso, atikaki nkembo oyo azalaki na yango epai ya Tata mpe afandaki kati na biso na komikitisa. Akómaki moko na biso mpe asosolaki ezalela na biso malamu mpenza. Na mpasi ayekolaki botosi mobimba. Atondaki na mawa. Aboyi biso te, bato mabe. Klisto akomaki moto mpo na kopusana penepene na biso mpe penepene na Nzambe.

Nzoto ya Klisto ekokani na mongombo ya Kondimana ya Kala esika Nzambe akutanaki na bato na ye. Nzambe azalaki kati na Klisto mpe amimonisaki epai na biso na lolenge ya moto. Bonzambe nyonso ezalaki mpenza kati na Klisto. Engebene makomi ya Baela, Yoane alobi mpenza ete “asalaki hema kati na biso.” Yango elingi koloba ete atongaki ndako munene oyo ekoumela te, mpo atikala libela elongo na biso na mabele. Kasi atikalaka mwa ntango moke, lokola ba batamboli mibembo oyo bafandaka mwa ntango na bahema na bango, na nsima bakangi bango mpe balongwe mpo na kokende na esika mosusu. Klisto atikalaki kati na biso mwa ntango moke, na nsima azongaki na likoló.

Bantoma bandimaki ete bazalaki batatoli ya nkembo ya Klisto. Litatoli na bango ezali esengo munene mpe ntina ya esengo na biso. Bazalaki batatoli ya miso liboso ya Mwana ya Nzambe awa na nse. Kondima na bango epesaki bango nzela ya kososola bolingo, motema molai, komikitisa, bosembo mpe bonzambe ya Yesu. Bamonaki Nzambe ye moko, na bulé na ye nyonso. Na Kondimana ya Kala, maloba “nkembo na ye” elobeli na mokuse bizaleli nyonso ya bonzambe. Ntoma Yoane amonisi na mpiko nyonso bizaleli nyonso ya Yesu kati na litatoli na ye. Asosolaki nkembo na yango oyo ebombamaki mpe lisusu kitoko mpe bonene na yango.

Na lisungi ya Molimo Msantu, Yoane abengaki Nzambe Tata, mpe Yesu Mwana. Nzila ya kokima maloba oyo ezali te. Na lisungi ya ya Molimo Mosantu, elamba oyo ebombi nkombo ya Nzambe apaswanaki. Kondimisaka biso ete Mozalisi Mosantu, ya Seko, ya Nguya azali Tata, mpe ete azali na Mwana ya Mosantu, ya nkembo, ya seko, mpe ya bolingo ndenge moko. Nzambe azali kaka te mosambisi ya elonga, ya kobebisa mpe ya kozongisa mabe. Azali na mawa, na boboto mpe na motema molai, mpe bongo Mwana na ye. Na kososolaka Tata mpe Mwana, tokomi na motema ya Kondimana ya Sika. Ye oyo azali komona Mwana azali komona Tata. Emoniseli oyo ebongolaki elilingi ya Nzambe oyo tozali kokuta na mangomba mosusu mpe efungolaki miso na biso na eleko ya bolingo.

Olingi koyeba Nzambe? Na yango, yekola bomoi ya Klisto! Bayekoli bamonaki nini epai ya Yesu? Bokuse ya litatoli na bango ezali nini? Bamonaki bolingo ya Nzambe elongo na ngolu mpe bosolo. Kanisa maloba misato oyo ntango ozali kobondela mpe okososola litondi ya nkembo ya Nzambe oyo ezali kati na Klisto. Na ngolu na Ye, Yesu ayaka epai na biso tango tokokaki na yango te mpo tozali kobeba. Biso nyonso tozali na esambiseli; moko te kati na biso azali moyengebene. Koya na ye elimboli ngolu na ye malamu. Lokola ayokaki nsɔni te ya kobenga biso bandeko na ye, apɛtoli biso, abulisi biso, azongisaki biso sika mpe atondisi biso na Molimo na ye. Misala oyo ya kobikisa ezali te “ngolu mpo na ngolu”? Mpe kutu koleka yango: tozwi nzila ya sika, mpo ete Klisto apesi biso ngolu ya kozala na nzila ya kokoma bana ya Nzambe. Nsango ya ngolu ezali lokuta to makanisi ya bato te. Kasi lotomo ya sika. Nzambe kati na moto ya ezali etaliseli ya solo ya mosala ya Nzambe. Yango ezali kokomisa biso bato ya kokoka na lobiko na ye. Ngolu ezali moboko ya kondima na biso.

KOBONDELA: Tofukami liboso na yo, mwana muke na elyelo ya bibwɛlɛ. Ndenge moko na babateli ya mpate mpe bato ya mayele na Beteleme. Ozali Nzambe oyo akoma moto, soni ezali te kobenga biso bandeko. Pole na yo engɛngaka na molili. Petolá motema na ngai ya mbindo, mpo ekóma elyelo ya libela mpo na bino. Na bandimi nyonso nazali kokumisa yo, mpo nkembo na yo ekómi nzoto ya komikitisa. Tobondeli yo omimonisa epai ya bato oyo bazali zingazinga na biso mpo bákanga lotomo na bango ya sika mpe báyamba yo.

MOTUNA:

12. Kokóma moto ya Klisto elingi koloba nini?

Mobile device - Print - Top