Mobile device - Print - Bottom

Previous Lesson -- Next Lesson

4. Seereya naani minw bɛ Kirisita ta alaya yira (Yuhana 5:31-40)

---

YUHANA 5:31-40
31 Ni ne yɛrɛ le tun bɛ ne yɛrɛ ta ko fɔra, ne ta kuma tun tɛ se ka kɛ can ye; 32 nka mɔgɔ wɛrɛ le bɛ ne seere ye; ne k’a lɔn fana ko a bɛ min fɔ ne ta ko ra, o ye can ye. 33 Aw ka mɔgɔ dɔw ci Yuhana Batizerikɛbaga fɛ. A ka min fɔ aw ye ne ta ko ra, o ye can le ye. 34 Ne tɛ o fɔra, sabu ne mako bɛ adamadenw ta seereya ra dɛ! Ne mako tɛ o ra. Nka ne bɛ o fɔra, janko aw le ye kisi. 35 Yuhana tun kɛra i n’a fɔ fitinamana min bɛ yeelen bɔ aw cɛ ra; aw kɔni sɔnna ka ɲagari a ta yeelen na wagati dɔɔnin. 36 Nka ne kɔni, fɛn wɛrɛ bɛ ne seere ye min ka bon ni Yuhana ta seereya ye; sabu Fa Ala ka baara minw di ne ma, ne bɛ o baara minw kɛra, o kɛwalew le bɛ ne seere ye. O le b’a yira ko Fa Ala ka ne ci. 37 Fa Ala min ka ne ci, ale yɛrɛ bɛ seereya kɛ ne ta ko ra. Nka aw ma sɔn ka a kan lamɛn, aw ɲa fana ma la a kan ka ye. 38 A ta kuma tɛ to aw kɔnɔ, sabu a ka mɔgɔ min ci, aw ma la o ra. 39 Aw bɛ aw timinadiya Ala ta Kitabuw karan na kosɛbɛ, sabu aw bɛ miiri ko aw bɛna ɲanamanya banbari sɔrɔ o le ra, k’a sɔrɔ o Kitabu kelenw le bɛ seereya kɛ ne ta ko ra. 40 O bɛɛ n’a ta, aw t’a fɛ ka na ne fɛ janko aw ye ɲanamanya sɔrɔ.

Yesu k’a fɔ a juguw ye ko Masiya min layiri tara, ko se dira ale ma ka o Masiya ta kɛwalew kɛ. Mɔgɔw tun bɛ nin cɛ kɔniya, ko a bɛ olugu ta jɛnkuru ni o ta cifɔninw ko ɲagamina. O ko o bɛ seereya dɔw fɛ, minw bɛ se k’a yira ko Yesu ta kumaw ye can ye. Yesu sɔnna o ta ɲininkari ma; a ka ko dɔw fɔ minw bɛ a ta kuma can yira. Anw fana, an bɛɛ b’a miiri ko an bɛ cogo min na, ko can ra an ka ɲi ka tɛmɛ o kan. Yesu ka kuma dɔ fɔ a yɛrɛ ta ko ra min ye can ye, faninya si tun tɛ o kuma ra. A ta seereya ye can ye, hali ni a kɛra ko ka kaɲa ni sariya ye, mɔgɔ yɛrɛ bɛ seereya min kɛ a yɛrɛ ta ko ra, sariya tɛ sɔn o seereya ma. Kirisita sɔnna o ma, k’a fɔ ko: «Ni ne bɛ seereya kɛ ne yɛrɛ ta ko ra, o tuma ne ta seereya tɛ can ye.» Yesu mako tun t’a ra k’a fɔ ko a bɛ jo ɲini a yɛrɛ ye, sabu mɔgɔ wɛrɛ tun ka seereya kɛ a ta ko ra ka ban, min ye a Fa ye sankolo ra; ale tun bɛ fanga di a ta kumaw ma ni seereya naani ye, sigiya tɛ minw na.

Ala ka Batizerikɛbaga ci ka na Kirisita ko fɔ o ye. O cɛ min blara a ɲa, o ka seereya kɛ Kirisita ta ko ra, k’a ta sarakalasebagaya baara fɔ, ani kititigɛri baara. Nka o bɛɛ n’a ta Yahudiyaw ta kuntigiw ma la Yuhana ra, o banna a ta seereya ra Yesu ta ko ra (Yuhana 1:19-28). Yuhana ta seereyaw, walama a ta karan, o le tun tɛ Yesu ta kow jusiginan ye, sabu Yesu tun ye min ye wagati bɛɛ ani tuma bɛɛ, a bɛ o kelen le ye. Mɔgɔw ta kolɔnbariya le kosɔn Yesu sɔnna Batizerikɛbaga ta seereya ma, janko k’a yira ko a ta kumaw ye can ye. Batizerikɛbaga k’a yira minkɛ ko Yesu ye Ala ta sagaden ye, ani Nin Saninman dibaga, a ta kuma tun ma tɛmɛ a dan kan.

Batizerikɛbaga tun ye fitina le ye min bɛ yeelen bɔ dibi ra. A tun ka karamɔgɔden dɔw lajɛn ka olugu karan ka o bɔ dibi ra. Nka tuma min na Tere yɛrɛ nana bɔ, o min ye Yesu ye, a mako ma kɛ fitina na tuun. Yesu kelen le ye dunuɲa ta yeelen ye, yeelen min baraka tɛ ban ka ye. Tere bɛ ɲanamanya ni baraka di danfɛnw ma dugukolo kan cogo min na, Yesu fana bɛ Ala ta ɲanamanya ni kanuya di an ma o cogo kelen na. Yesu ka mɔgɔw kɛnɛya, ka o ta jinaw gbɛn minkɛ, o b’a yira ko a ta yeelen fanga bɛ sɛ sɔrɔ dibi fanga kan. A ka fɔɲɔba mala, ka suw lakunu minkɛ, o b’a ta alaya yira. A ta kow bɛɛ tun bɛ kɛ ka kaɲa ni Fa Ala sago ye. A k’a ta baara laban gbengbenyiri kan. A kununin kɔ, a ka Nin Saninman ci ka na ciradenw kan; minw bɛ a daari a bɛ a ci olugu fana ma hali bi. Ala ta baaraw bɛɛ bɛna dafa Kirisita ta nako flanan wagati ra, o baara minw bɛna kɛ suw kunuko ye ani dunuɲa a kiti. Faranfasi foyi tɛ Fa ni Dencɛ cɛ o ta baaraw ta fan fɛ: Fa bɛ fɛn o fɛn kɛ fɔ ka na se sisan ma, Dencɛ fana bɛɛ o kɛ.

Ala yɛrɛ k’a kan kɔrɔta janko an ye se k’a ta kumafɔta barakaman lamɛn, ko: « Nin le ye ne Dencɛ kanunin ye; a ko ka di ne ye haali» (Matiyu 3:17). Yesu min k’a ta ko bɛɛ kɛ ka kaɲa ni Ala sago ye wagati bɛɛ, ni ale kelen tɛ, mɔgɔ si ma nin seereya ɲɔgɔn sɔrɔ ka bɔ Ala fɛ ka ye. Dencɛ kanunin tun fara kanuya sɔbɛ le ra ani saninmanya.

Yesu ka Yahudiyaw jaraki o ta Ala lɔnbariya kosɔn. O ma se ka Ala kumakan lamɛn sariya ra, walama ciraw ta kumaw sababu ra. O ma se ka Ala lɔn a ta fɛn yirataw fɛ, walama sikow fɛ. Ala ta yirariko fɔlɔ tun ma dafa, sabu mɔgɔw ta jurumun tun ka o faran ka bɔ Ala saninman na. Wagati min Ezayi ka Matigi ta masaderege senkɔrɔyɔrɔ ye Ala batoso kɔnɔ, a kulera k’a fɔ ko: « E, bɔnɔ ka ne sɔrɔ, ne tora a ra, sabu ne ye mɔgɔ dɔ ye min darakan saninyanin tɛ» (Ezayi 6:5). Min bɛ o ta torogberenya ani o ta faamubariya yira Ala ko ta fan fɛ, o ye ko o banna Kirisita ra, Ala ta kuma min kɛra adamaden ye. Ni mɔgɔ min b’a miiri ko a ka Ala ta Kuma lɔn, k’a sɔrɔ a bɛ ban Yesu ra, min ye Ala ta Kuma ye, o tigi ta cogo b’a yira ko min yirara a ra o tɛ can ye, walama ko a m’a faamu.

Layirikɔrɔ ta mɔgɔw tun bɛ Ala ta Kuma karan k’a sɛgɛsɛgɛ, ka miiri ko o bɛna ɲanamanya banbari sɔrɔ o sababu ra. O ka Sariya ta kumaw le sɔrɔ, minw bɛ na ni saya ye, nka layiri minw tun bɛ Masiya ta ko yira o ra o tɛmɛna o kɔrɔ, k’a sɔrɔ o cirayakumaw ɲɔgɔn ka ca Layirikɔrɔ kɔnɔ. O yɛrɛ ta miiriyaw le diyara o ye, ani o yɛrɛ ta faamuricogo, ani o ta landaw; o ma se k’a faamu ko Kirisita le tun ye Ala ta Kuma bɛɛ ra belebeleba ye o cɛ ra.

Yesu ka o bankun yira o ye – o tun tɛ sɔn Ala ma i n’a fɔ a bɛ cogo min na. O tun bɛ Kirisita kɔniya, o bɔnɔra ɲanamanya banbari ra, lanaya ni nɛɛma kun ye min ye o fɔnna o kɔ.

DAARIKAN: An Matigi Yesu, an b’i fo, sabu i sɔnna ka i juguw kanu. I tɔrɔra o ta lanabariya kosɔn. Seereya naani min bɛ i ta alaya yira i ka o yira o ra. An dɛmɛ k’a to an ye se ka kibarodiman kitabuw karan ka o sɛgɛsɛgɛ, ani Ala ta kitabu wɛrɛw, janko an ye i ye, ka i ta alaya ye, ka la i ta kɛwalew ra, ani ka ɲanamanya banbari sɔrɔ. mɔgɔ miliyɔn camanba minw toro gberennin lo, ni o tɛ i kumakan mɛnna hali bi, olugu torow dayɛlɛ.

ƝININKARI:

42. Seereya naani minw fɔra Yesu ta ko ra, o ye juman ye, ani o kow bɛ seereya kɛ Yesu ta ko ra cogo di?

Mobile device - Print - Top