Mobile device - Print - Bottom

Previous Lesson -- Next Lesson

YUUHANNA - Ndaygu ngun jalbi ka nder nibhe
Jandeeji ka Linjiila no Yuhanna seedorii nonn

a) Fii fempegol ngol ka leggal altindiraangal e ko windaa kon ka dow maggal (Yuuhanna 19:16b-22)

---

YUUHANNA 19:16b-18
16 … Kambhe kadi bhe yhetti Iisaa, bhe nabhi. 17 Iisaa yalti e nden saare, himo rondanii hoore makko leggal altidiraangal ngal. O sutanii nokkuure wi’eteende Golgotaa e haala Yahuudiyanke, ko woni firo dhun ko Nokkuure Laalagal Hoore. 18 Ko dhon bhe fempi mo wondude e yimbhe dhidho goo, mo bee e mabbhe sengo goo, kanko Iisaa o woni ka hakkunde.

Hari suufaabhe bhen no fokkitani fempugol bombhe dhidho ka leggal altidiraangal, ko fewndo dhon Pilaatu jonni bhe «bondho» tammo goo, on no maakee annabi Iisaa. Bhe tatoo kala non bhe ronditanino hoore mabbhe leggal mabbhe ngal, e maanaa aala waroowo on. Almasiihu on bugitaaki leggal altindiraangal ngal, o accaali leggal ngal yana ka hoore laawol. Bhe tatoo non bhe tayhiti saare mawde Yerusalaam nden, hibhe ronki bhe yaltiri ka baafal sengo nano hirnaange. Bhe yhawiri ka pellun tosokun wi’eteekun Golgotaa bhay hari dhon no nandi e laalagal hoore. Immorde ka saare, yimbhe bhen no waawi yi’ude ka yimbhe nyaawaabhe bhen wengaa ka hoore leggal altindiraangal ngal.

Yuuhanna sifaaki no laabhiri fii leggal altindiraangal ngal, bindol makko ngol jabhaali sifaade dhin piiji sattudhi e hulbhiniidhi haa feyyhiti keerol. Yimbhe bhen bugitinoke giggol Alla ngol, ngayngu jahannamawu ngun no e hoore mabbhe. Hari ko e nder hunyeendi bhe woni e seedirde e jibiniraadho Ruuhu on e ittoowo on junuubaaji mabbhe dhin e fee okkitirgol hoore makko sadaka. Hari meetelol woo yaltitaa ka dow leggal hersiniingal ngal, kono e nder yankinaare makko nden, o fennyinii mangu makko mawgu ngun rewrude e munyal makko ngal e sadaka makko on.

Emba dhun ko hersa honno wengidegol e bonbhe dhidho wonunoobhe yawitaade mo kadi!

Yurmeteedho on e laabhudho on no feenyirde ka saa’iiji sakkitiidhi ngurndan makko dhan wa wondoowo on e junuubankeebhe bhen. Ko dhun addi yo Bhiddho Alla on jibine, o wonta Bhii-Aaden on. O newnanii faybhe mettubhe fii bhen enen banii-aadama’en no wontiren faybhe fewniraabhe immorde Alla. O hewtii luggeendi jiibhaare nden fii wota gooto wi’u wonde annabi Iisaa andaali ittiri bonki ootigi kin. No junuubu mon on fotata woo, Almasiihu on no waawi yaafanaade on, o loota on, o labbhina.

YUUHANNA 19:19-20
19 Pilaatu windi, wadhi ka dow leggal altidiraangal: Iisaa oo jeyaadho Naasirata, Landho Yahuudiyanke’en. 20 Buy e Yahuudiyankeebhe bhen jangi kon ko windii, ko fii nden nokkuure nde Iisaa fempaa e mun no bhattinoo saare nden, tawi dhin bindi ko e haala Yahuudiyanke e haala Roomiyanke e haala Gereekiyanke windii.

Suufaabhe bhen wengi annabi Iisaa hakkunde bonbhe dhidho fii yawitagol ko o wi’i kon ko o landho. Kanko Pilaatu non himo jala tun dental fewjoobhe bhen wonunoobhe bhen sabu yo o happan annabi Iisaa fii kala o faalanooka dhun ka wonkii makko. Ka dow Fempaadho on, bhe windi e leggal toonye dhe Yahuudiyankeebhe bhen toonyi dhen annabi Iisaa.

Alla huutori kon ko windaa fii nyaawugol Yahuudiyankeebhe bhen bhayru annabi Iisaa ko landho mabbhe tigi. Ko annabi Iisaa woni landho tigi-tigiijo ardudho on e peewal e giggol e newaare e yankinaare. O didii kammuuli dhin ka leydi. Yahuudiyankeebhe bhen ko jahannama on subhii, bhe bugitii Landho iwudho on ka Alla, bhe yaltini mo e nder jamaa mabbhe on. O wonti non Landho bhe wonaa Yahuudiyanke bhen, e hara non bhe wonaa Yahuudiyanke bhen hande no jabhi Landho fempaadho on ka leggal altidiraangal kaa hibhe bugitii Jom giggoljo on?

YUUHANNA 19:21-22
21 Onsay hooreebhe diina Yahuudiyankeebhe bhen wi’i Pilaatu: Wota a windu ko o landho Yahuudiyankeebhe bhen, kono windu: O wi’ii wonde ko kanko woni landho Yahuudiyankeebhe bhen. 22 Kono Pilaatu jaabii bhe, wi’i: Ko mi windi kon mi windii.

Julnoobhe bhen faami fii yawitaare nden e fii kambande nde Pilaatu kambani bhe nden e gundoo. Hari bhe bugitike Landho mabbhe on bhe yi’ii ka lo’ere makko ko woopodiri e yewtere Pilaatu nden. Dhun bhurtini bhe kadi anyude Fempaadho on.

Hari Pilaatu no faami wonde landho mawdho roomu on no jabhi fii kon ko windaa, o windi dhun e haalaaji tati fii no jamaa on e yimbhe leydi ndin e hobbhe bhen faamira, bhe anda wondema kala murtandho Roomu ko sugu dhun habbii mo. E hitaande 70 bhawto. I.-A. Yahuudiyankeebhe bhen no murtande landho roomu on, guluuje e mabbhe wengaa e leddhe altidiraadhe haa hunditi saare nden fow.

b) Fii no bhe sendiri non conci annabi Iisaa dhin e ko bhe wadhi kon fokiya makko on urbha (Yuuhanna 19:23-24)

---

YUUHANNA 19:23-24
23 Bhay wonii suufaabhe bhen fempii Iisaa, bhe yhetti conci makko dhin, bhe wadhi dhi pecce nay, suufaajo kala hebhi feccere. Bhe yhetti kadi fokiya makko on, tawi on hinaa nyo’aadho, ko o alluwal gootal gila dow haa ley. 24 Onsay bhe wi’indiri: Wota on seeku mo. Wadhen urbha, dhun hollay ko hombo o wonanta. Tawi dhun ko fii ko bindi dhin hiitinoo kon no laatora, dhun ko: Bhe senditii conci an dhin, bhe wadhii fokiaya an on urbha. Ko dhun suufaabhe bhen wadhi.

Suufaabhe nayo fempunoobhe bhen annabi Iisaa no newnanaa sendugol conci makko dhin. Hooreejo suufaabhe bhen jippinaali hoore makko haa e ngal sendigal jaasungal. Suufaabhe bhen yhettani annabi Iisaa piiji makko sakkitori dhin, bhe sendi mo e dimankaaku makko ngun. Hari bonbhe bhen bhooreteno fii bhurtugol jaasingol bhe.

Nden yankinaare no bhangini mangu mawgu annabi Iisaa ngun. Fokiya makko mo lefol gootol on no nandi e mo yottinoowo mawdho sadaka on bhornotoo on. Ko annabi Iisaa tigi woni yottinoowo mawdho sadaka iwudho on ka Alla e tefanoowo on Banii-Aadama en fow. Ko dhun addi yo o tampu o lettee.

Duubhi guluuje adalde dhun, Ruuhu-Seniidho on hiitino ko laabhi fii fempeede makko nden ka leggal altindiraaangal. Ka Zabuura 22, e hino ko windii kon: «Bhe senditii conci an dhin», ko dhun suufaabhe bhen woowi wadhude. Onsay Ruuhu on jokkitii: «Bhe wadhii fokiya an on urbha.» Ruuhu on fennyinno no laabhiri piiji feyyhudhi dhin ka leggal altidiraangal, hollugol wondema ko annabi Iisaa fempaa kon ka leggal altidiraangal no tawaa e muydhe Alla dhen. Wano annabi Iisaa holliri non, sukundu makko woo yanata e bhaawo muydhe Alla dhen. On mo yeddi fempande nden ka leggal altindiraangal, haray yeddi ko taariika ka fillitii kon, kono haray o dartike kadi Ruuhu Allaahu hiitiidho on dhin piiji feyyhudhi gila duubhi wuluure adalde yo dhi laato. Suufaabhe bhen huuwiri majjere e faadhere hakkil ka binde leggal altindiraangal. Bhe senditi conci heddiidhi aaden lettaadho on. Yurmeende woo bhe wondaa. Bhe miijitanooki fii ko sottoowo on hibbani kon aduna on yhiiyhan mun dhan ka hoore leggal altindiraangal.

Musibbhe, hara on fempidaama e Almasiihu on, hara on yubbhondirii e makko ka mayde makko? Kaa ko jawle e innde wondhon e dhabbhude? Hara hidhon yidhi Fempaadho on ka leggal altindiraangal? Hara on hendike peewal iwungal ngal ka Alla e laabhal haqiiqawal ngal sabu mayde makko nden? Kaa ko on jogiibhe gite dhe yi’ataa, dhe teddinaa sadaka mo oo fempaadho ka leggal altindiraangal ngal wadhi on? Ruuhu-Seniidho on no humondiri e Bhiddho Alla on sabu gomdhinal ngal e giggol ngol fii no hebhiren gebhal ka mayde e ka wattineede makko e ka ngurndan makko yedhaadhan dhan sadaka.

TORAARE: Iisaa-Almasiihu, Joomi, men jarnii ma fii ko ronditidhaa kon leggal altidiraangal ngal. Medhen jarnude ma fii munyal maa ngal e giggol maa ngol e baraaji maa dhin. Men jarnii ma fii ko yaafanidhaa men kon junuubaaji amen dhin e dhi aduna on dhin. A itii junuubu amen on ka hoore leggal altindiraangal, a moyyhintinii hakkunde yimbhe bhen e Alla. Ko an woni sottoowo men on e tefanoowo men on.

LANDAL:

115. Ko hondhun bindol windiingol ngol ka dow leggal altindiraangal firi?

Mobile device - Print - Top