Mobile device - Print - Bottom

Previous Lesson -- Next Lesson

3. Kirisita bɛ suw lakunu ka dunuɲa ta kiti tigɛ (Yuhana 5:20-30)

---

YUHANA 5:25-26
25 Can ra ne b’a fɔ aw ye ko wagati dɔ bɛna se, o wagati ye sisan le ye; Den min bɔra Ala ra, suw bɛna o kumakan mɛn; ni minw ka a kumakan mɛn, olugu bɛna ɲanamanya. 26 Sabu se bɛ Fa Ala ye ka ɲanamanya di mɔgɔw ma cogo min na, a ka se di Dencɛ ma ka ɲanamanya di mɔgɔw ma o cogo le ra.

Yesu b’a fɔ k’a gbɛya ko ale le ye can ye: «Can ra, can ra, ne b’a fɔ aw ye». Ciraya kuma minw tun fɔra Yesu nako ta fan fɛ, Yesu ka o bɛɛ dafa kelen kelen hali ka tɛmɛ Layirikɔrɔ mɔgɔw ta miiriya yɛrɛ kan. A bɛ suw lakunu bi, a bɛ o lakunu sini. Adamadenw bɛɛ sanin lo o ta jurumunw kosɔn, kojugu ka o jusukunw cɛn. Nka Yesu ye Saninman ye, Ala Dencɛ min kɛra adamaden ye, a farisogoraman ka se sɔrɔ jurumun kan, janko an ye an ninyɔrɔ sɔrɔ a ta panamanya ra lanaya baraka ra. Ni mɔgɔ min ka nafa la kisiri Kibarodiman kan, o tigi b’a faamu, a bɛ nɔrɔ Yesu ra, ka Ala ta ɲanamanya sɔrɔ. Kabini Yesu kunulon na, an k’a lɔn ko an ta lanaya ye ɲanamanya sɔrɔri ta lanaya le ye, saya diina tɛ. Yesu b’a ta ɲanamanya Nin ci a lamɛnbagaw ma, minw b’a fɛ ka sɔn a ta kumaw bɛɛ ma, hali ni o tɛ se k’a bɛɛ faamu. A bɛ lamɛnni hakiri sɔbɛ di olugu ma, a ta kuma kabakoman bɛ sigiyɔrɔ sɔrɔ o jusukun na. Mɔgɔ minw sanin lo, olugu tɛ se ka kunu, walama ka lamɛnni kɛ o yɛrɛ ma, nka Yesu le bɛ ɲanamanya di o ma, ni o kɛra o bɛ se ka o toro malɔ ka ɲa a ta kumaw ra ka o lamɛn.

An bɛ ɲanamanya min kɛ dugukolo kan yan, dan bɛ o ra, nka Ala ta ɲanamanya min dira an ma, an bɛ to o ɲanamanya ra wagati bɛɛ, dan tɛ o ra. I n’a fɔ Yesu k’a fɔ cogo min na, ko: «Ne le bɛ suw lakunu, ne le bɛ ɲanamanya di; ni mɔgɔ o mɔgɔ ka la ne ra, o tigi bɛna ɲanamanya, hali ni a sara. Ni mɔgɔ o mɔgɔ bɛ ɲanamanya, ka la ne ra, o tigi tɛna sa ka ye fiyewu!» (Yuhana 11:25-26)

Kirisita bɛ se ka ɲanamanya kura di an ma, sabu Fa Ala ka ɲanamanya banbari dafanin ko bɛɛ di ale ma. Kirisita bɛ i ko bunun, ɲanamanya ta ji bɛ seri ka bɔ min fɛ wagati bɛɛ. An bɛ yeelen sɔrɔ tuma bɛɛ, ka kanuya sɔrɔ tuma bɛɛ, ka can sɔrɔ tuma bɛɛ ka bɔ ale ra. Kojugu miiriya, walama dibirakow, walama ŋaniyajuguw, o si tɛ bɔ ale ra. A fanin lo kanuya ra, i ko Pɔli b’a fɔ an ye cogo min na: Kirisita bɛ makari, teri ɲuman tɛ ɲangboya kɛ, a tɛ a yɛrɛ bonya, a tɛ a yɛrɛ dɔrɔn ta nafa ɲini, a tɛ kojugu miiri ni mɔgɔ ye, a tɛ ɲagari terenbariya ra; a bɛ yafa tuma bɛɛ, a bɛ ko sɔnmina tuma bɛɛ. Kanuya tɛ ban fiyewu. Kirisita bɛ nin nɛɛmaw bɛɛ di an ma a ta Nin Saninman le sababu ra. An y’a tɔ a ye an yɛlɛma ka an kɛ ɲanamanya bununjiw ye.

YUHANA 5:27-29
27 A ka fanga di Dencɛ ma ka kiti tigɛ, sabu Min kɛra Adamaden ye, ale le ye o ye. 28 Aw kana kabakoya o ra, sabu wagati dɔ bɛna se, su minw bɛɛ bɛ kaburuw kɔnɔ, olugu bɛɛ bɛna a kan mɛn. 29 Minw ka koɲuman kɛ, olugu bɛna kunu ka taga to ɲanamanya ra; nka minw ka kojugu kɛ, olugu bɛna kunu ka taga kiti le ra.»

Adamaden Ala lɔnbari sanin lo jurumun kosɔn. Ni mɔgɔ min tɛ Ala kanu, o tigi bɛ Ala ta kiti le ben a yɛrɛ kan. Kirisita ta kumaw ka di, baraka bɛ o ra, o saninyanin lo fana. Ni mɔgɔ min k’a lamɛn, o tigi bɛ ɲanamanya. Ka fara o kan, a ta kumaw ani a ta kokɛogow bɛ mɔgɔ tagamacogo yira a ra. Ala ka kiti to Kirisita boro; Ala Saninman lo, a kɔrɔbɔra setana fɛ, nka a ma jurumun kɛ. Mɔgɔ si tɛna bɔyɔrɔ sɔrɔ Ala ta kiti ra. Mɔgɔ kelenpe min ka kan ni dunuɲa bɛɛ lajɛnnin ta kiti tigɛri ye, o ye Kirisita le ye. Ale le bɛ se ka adamaden bɛɛ ta ko latigɛ. Mɛlɛkɛw ani danfɛn tɔw bɛɛ bɛ a bato.

Suw kunuko bɛ kɛ, sigiya tɛ o ra, ka kaɲa ni Yesu ta latigɛ ye. A ta welerikan mankan bɛna dunuɲa bɛɛ lajɛnnin cɛtigɛ; mɔgɔ saninw tɛ welerikan gbansan mɛn. Nka Dencɛ ta kumakan bɛna mɔgɔ saninw bɛɛ yuguyugu. Mɔgɔw ninw sunɔgɔbagatɔ bɛna kunu, o bɛna bɔ kaburuw kɔnɔ. Kabakow bɛɛ ra belebeleba ye nin ye, ko nin dɔw bɛna kunu ka ɲanamanya tuun, k’a sɔrɔ dɔw bɛna kɛ i ko o sanin lo. Sukunu ko fla le bɛna kɛ, kelen bɛna kɛ ɲanamanya ta ye, kelen bɛna kɛ kiti ta ye. Ko caman bɛna kɛ ka bara an na o lon na: Ɲanasisiba le bɛna ben dɔw kan, k’a sɔrɔ an tun b’a miirira ko o mɔgɔw bɛna kɛ yeelenw ye, ka manamana. Dɔw bɛna manamana i ko tere yeelen, k’a sɔrɔ an tun b’a miirira ko o olugu bɛna kɛ mɔgɔ gbansanw ye, mɔgɔ si mako tɛna minw na.

Ala ɲa kɔrɔ, mɔgɔ ɲumanw tɛna fisaya ni mɔgɔjuguw ye. Nka dɔw ka o ta jurumun yafa sɔrɔ Kirisita Yesu fɛ, ani o k’a fo. O ka o ta ɲanamanya kɛ a ta Kibarodiman ta sebagaya baraka ra. Nin Saninman ta kɛwalew sɔrɔra o ta ɲanamanya ra. Yesu ka o ta hakɛw bɛɛ yafa a ta jori saninman baraka ra. O nɛɛma sera olugu ma lanaya le baraka ra.

Nka o bɛɛ n’a ta, mɔgɔ min b’a miiri ko ale yɛrɛ ta kɛwalew bɛ se k’a kisi Ala ɲa kɔrɔ, o tigi bɛna nin kuma mɛn, ko: Ele nataba, mun kosɔn ele ta hami kɛra i yɛrɛ kelen ta kisiri le ye, i ma sɔn ka kanuya yira i juguw ra? Mun kosɔn Kirisita gbengbenna ka saraka min kɛ ka i ni Ala cɛ bɛn i ma sɔn o saraka ma? Mun kosɔn i banna a ta ɲanamanya banbari ra? I ta yɛrɛbonya kɛra sababu ye k’a to i ka saya ɲanawoloma minkɛ, o tuma i nɛɛmantan ye to ten, k’a sɔrɔ o nɛɛma tun dira i ma.» O mɔgɔ minw sara o ta jurumunw na, olugu bɛna kunu ka don kiti fariman dɔ le ra; o tun ka kuma o kuma fɔ, ani o ta kɛwalew bɛɛ ani o ta miiriyaw bɛɛ, o bɛna o bɛɛ fɔtɔ lamɛn kelen kelen. Nka mɔgɔ min gbarara Kirisita ta nɔɔrɔ ra lanaya baraka ra, o bɛ fa ni Kirisita ta kanuya ye. A bɛ baara kɛ ni ɲagari min ye, o le ye ɲanamanya banbari cogo ye.

YUHANA 5:30
30 Yesu ko: «Ne tɛ se ka foyi kɛ ne yɛrɛ ma. Ala ka min fɔ ne ye, ne bɛ kiti tigɛ ka kaɲa ni o le ye. Ne ta kiti terennin lo, sabu ne tɛ a kɛ ka kaɲa ni ne yɛrɛ sago ye; min ka ne ci, ne bɛ a kɛ ka kaɲa ni o sago le ye.

Kirisita bɛ baaraw bɛɛ ra belebeleba kɛ; Kititigɛbaga lo wagati bɛɛ. Fangatigiya min tun karifara Kirisita ma, a tun bɛ o ko kala ma. O bɛɛ n’a ta a tun k’a yɛrɛ majigi fɔ ka na a fɔ ko: « Ne tɛ se ka foyi kɛ ne yɛrɛ ma.» O kɔrɔ ye ko ne tɛ se ka kiti tigɛ, walama ka ko dɔ miiri, walama ka mɔgɔw kanu, walama ka nɛnɛkiri ne yɛrɛ ma. O cogo ra a ka bonya la Fa kan.

Yesu tun sirinin lo a Fa ra wagati bɛɛ. O telefɔnijuru ma tigɛ o fla cɛ k’a ye. Ala tun bɛ kuma Yesu fɛ, ka adamadenw ta miiriyaw yira a ra. Ala ta Nin bɛ dunuɲa cogow sɛgɛsɛgɛ; a bɛ i jusukunnakow fana sɛgɛsɛgɛ, ka i ta miiriyaw bɔ kɛnɛ kan, ani i bɛ ko minw dogo tɔw ra. O Nin min bɛ Kirisita ra, o Nin bɛ aw ta kiti tigɛ ni terenniya ye. Ni i ka lɔ i ta jurumun na k’a fɔ Ala ye, ka sɔn Gbengbenyiri tigi ta yafa ma, o tuma i bɛ baraka sɔrɔ. I tɔgɔ bɛ sɛbɛ Ɲanamanya Kitabu kɔnɔ. Yesu bɛna a fɔ mɔgɔ terenninw ma ko: «Aw ye na, ne Fa Ala ta baraka bɛ aw minw kan. Ala ka Masaya min labɛn kabini dunuɲa jusigiwagati ra, aw ye o Masaya cɛn ta» (Matiyu 25:34).

Kirisita ye Can ye, a tɛ faninya fɔ; Min bɛ an kɔnɔ, a ka o lɔn. An ka jogo minw sɔrɔ an bɛmaw fɛ cɛn ye, a ka o lɔn, a fana tɛ teriya ka kiti ben an kan o kosɔn. A bɛ muɲu ka jurumunkɛbaga makɔnɔ, janko a ye nimisa. Minw kɛra hinabagaw ye, Yesu ta saninmanya bɛna olugu faran ka bɔ mɔgɔ tɔw ra, o minw banna a ta miiriya ma ka to o ta kungbɛlɛya ra.

Kirisita k’a ta sabari yira an na, ani a ta yɛrɛmajigiya. A tun bɛ fɛn bɛɛ kɛ ka kaɲa ni a Fa sago le ye. O cogo ra, Yesu k’a Fa sago kɛ a kumacogo fɛ, ani a ta kɛwalew fɛ, hali gbengbenyiri kan. Tuma min a ta wagati sera, a ka Ala daari ko: «Ne yɛrɛ sago kana kɛ, fɔ ele sago.» O ra, a bɛna kiti bɛɛ sekɔ Ala ma.

Jɛnɲɔgɔnya min bɛ Fa ni Dencɛ cɛ, kibarodiman sɛbɛbaga bɛ an karan o ra janko an ta lanaya ye jusigi Ala ta yiracogo saba ta kelenya ko kan. Ka suw lakunu, o sebagaya bɛ Fa fɛ, a bɛ Dencɛ fana fɛ. Ala k’a ta kow bɛɛ yira Dencɛ ra, foyi tɛ yi ni a ma min yira Dencɛ ra. Kirisita kumakan bɛna suw lakunu; lahara ani jahanama lakilew bɛ a boro. Lanaya ye gundo le ye mɔgɔ hakiritigiw fɛ; ni Kirisita ta kanuya nana an fa sabari ra tuma min na, o wagati le ra an bɛna sɔrɔ k’a faamu fɛn min kosɔn an ka kan ka la Ala ta yiracogo saba ra janko ka kisi.

ƝININKARI:

41. Jɛnɲɔgɔnya juman bɛ Fa ni Dencɛ cɛ, ka kaɲa ni Yesu ta ɲafɔcogo ye?

Mobile device - Print - Top