Mobile device - Print - Bottom

Previous Lesson -- Next Lesson

3. Yeesu feeñu na taalibe ya, ak Tomas (Yowaana 20:24-29)

---

YOWAANA 20:24-25
24 Fekk na Tomaas mi bokk ci fukki taalibe yi ak ñaar, te turam di tekki « séex bi » nekku fa woon, bi Yeesu ñówee. 25 Yeneen taalibe yi ne ko: « Gis nanu Boroom bi! » Waaye mu ne leen: « Su ma gisul fa ñu daajoon pont ya ci ay loxoom, te defuma ca sama baaraam, suma tegul sama loxo ci wetam duma ko gëm mukk. »

Bul foog ne képp kuy ñaawlu rekk dangaa bañ Xel mu Sell mi, te ñiy weddi sa seede dañoo dëgër bopp te yelloo dee gu amul àpp gi (safara). Ci biir xem-xew yu bare yi amoon ci biir ñeent-fukki fan ya jiitu yéegu asamaanu Yeesu, Yowaana won nanu ci ni yiw wi feeñalee ngëm ci xolu nit: du ci ay jëf yu ñu matal, walla xel mbaa ci kow lu jaadu, waaye ci kow yiw rekk ak yërmande.

Tomaas dafa ñaawoon njort, gisatul oon dara lu jekk. Dafa waroon a gëstu mbir mi ba xam dëgg gépp (Yowaana 11:16; 14:5). Ku ànd ak xelam la woon, te bëggoon a xam bu leer ni mbir mi deme. Deewug Yeesu dafa meloon ci moom ne dund gi amatul lu muy saf. Nekkul oon ak taalibe ya, te gisagul Yeesu.

Xëyna Tomaas dafa yaakaar oon sax ne peeñu googu mbiru seytaane la, walla njuuma bu bon moo feeñoo jëmmu Yeesu ngir nax taalibeem yi. Kon book amul genn njàqare gu ci am, bu taxawee ci am lu ko leer ci ndekkite Yeesu. Teg ay loxoom ci légëti pont ya doŋŋ moo ko man oon a yey. Noonu de la naxantee ak Yàlla ba gëm, maanaam gis, door a wóolu.

Mu toog ak taalibe, ya ànd ak mbégte ndax gis nañu Yeesu mi dekki. Moom nag dafa tiisoon lool, ndaxte bëggoon naa gis jaxran ne Yeesu dekki na.

YOWAANA 20:26-28
26 Bi ñu ca tegee ayu-bés, taalibe Yeesu ya dajewaat ca biir kër ga, Tomaas itam a nga fa woon. Bunt yépp tëju woon nañu, waaye Yeesu ne tëll ci seen biir ne leen: « Na jàmm wàcc ci yéen! » 27 Noonu mu ne Tomaas: « Indil sa baaraam fii te seet sama loxo; indil sa loxo, teg ko ci sama wet. Bàyyil di weddi te nga gëm. » 28 Tomaas tontu Ko ne: « Sama Boroom, sama Yàlla! »

Ñu teg ca ayu-bés, Yeesu daldi feeñuwaat taalibeem ya. Ba léegi dañoo ragaloon te doon tëj bunt ya. Jëmmu Yeesu mi dekki ci biir ñi dee ne jameet ci seen biir. Mu baarkeel leen ak jàmmam, may mbaalug bàkkaar taalibeem yu woyof ngëm ya.

Tomaas buqi bët ya ak waaru, bi mu gisee Boroomam bi te dégg baatam. Bëti Yeesu ya teppi xel-ñaaru Tomaas ya ak xoolinu baatin. Mu ne Tomaas na Ko laal, li wuute ak la mu waxoon Maryaama: « Laalal te gis ne nit laa ku am yax aky suux, te teew ci seen biir. » Yeesu waxu ko mu laal légéti pont ya rekk, waaye dafa ko ne it mu teg baaraamam ci wetam gi (faaram gi), te gëm.

Dafa tax ba taalibeem, ba doon seet fu dëgg gi féete, mujje daan xel-ñaaram. Yeesu dafa bëgg nu jébbal Ko sunu kóolute gépp, ndaxte yéene na deewam, ndekkiteem, jokkoom ak Yàlla, ak delluseem, loolu lépp ngir sunu ngëneel. Képp ku weddi dëgg yooyu Jàppe nga Ko nib fenkat.

Ni ko Boroom bi wonee taxawaayu mbëggeel, noonu la fitu Tomaas rëcce ba mu wax baat bu suufe (mel ni kuy tënk ñaanam ya ak xalaatam ya) jébbalu bu gën a rëy, bu nit mos a defal Yeesu: « SAMA BOROOM AK SAMA YÀLLA! » Mu gis ne Yeesu du Doomu Yàlla ju teqalikook Baayam, waaye Yeesu ci boppam Boroom bi la, te fees na ak baatinu Yàlla ci yaramam. Yàlla kenn la du ñaar. Tomaas dafa woowe Yeesu « YÀLLA », te xamoon na ne Xel mu Sell mi du ko àtte ndax ñàkk ngëmam googu, waaye dina ko may yiw wu muy bokke ci boroomam. Tomaas woowe na Ko itam « BOROOM BI » te teg déembam ak ëllëgam ci loxoy musalkatam bi, te gëm bu wér la Yeesu waxoon ba Mu leen di tàggu. Mbokk mi, nga ne lan? Ndax ànd nga ci jébbalu Tomaas gi? Ndax Ku dekki ki ñów na ci yów, ngir nga yéemu ci màggaayam, feral sa xel-ñaar ak sa dëgër-dëgërlu? Wóolul yërmandeem gi te jébbaloo nii ci Moom: « Sama Boroom ak sama Yàlla. »

ÑAAN: Nu ngi lay sant Boroom bi Yeesu ndaxte dàquloo Tomaas, aky xel-ñaaram, waaye dangakoo feeñu. Jébbal nanu la sunu dund. Sellalal làmmiñ ci bépp naxaate.

LAAJ:

127. Lan la jébbalu Toomaas bi, ëmb?

Mobile device - Print - Top