Waters of LifeBiblical Studies in Multiple Languages |
|
Home Bible Treasures Afrikaans |
This page in: -- Albanian -- Arabic -- Armenian -- Bengali -- Burmese -- Cebuano -- Chinese -- DIOULA -- English -- Farsi? -- French -- Georgian -- Greek -- Hausa -- Hindi -- Igbo -- Indonesian -- Javanese -- Kiswahili -- Kyrgyz -- Malayalam -- Peul -- Portuguese -- Russian -- Serbian -- Somali -- Spanish -- Tamil -- Telugu -- Thai -- Turkish -- Twi -- Urdu -- Uyghur -- Uzbek -- Vietnamese -- Yiddish -- Yoruba
Previous Lesson -- Next Lesson YUHANA - Yeelen Bɛ Manamana Dibi Ra
Kirisita ta kibarodiman karan ka kaɲa ni Yuhana
KARANKUN 1 - Ala Ta Yeelen Manamanatɔ (Yuhana 1:1 - 4:54)
A - Ala Ta Kuma Kɛra Farisogo Ye Yesu Ra (Yuhana 1:1-18)
2. Batizerikɛbaga bɛ Kirisita ta sira labɛn (John 1:6-13)YUHANA 1:9-10 Kirisita ye dunuɲa ta yeelen sɔbɛ ye. San camanba tɛmɛnin kɔ, Nin Saninman tun k’a nako fɔ ciraw sababu ra. Layirikɔrɔ kitabuw bɛ Kirisita nako fɔ siɲagako caman, ko a bɛna na dunuɲa kɔnɔ. Cira Ezayi k’a fɔ ko: «A flɛ, dibi ka dugukolo yɔrɔ bɛɛ datugu, dibifinba ka mɔgɔw bɛɛ datugu; nka Matigi Ala ta yeelen bɛna jigi ele kan, a ta nɔɔrɔ bɛna na i kunna» Ezayi 60:2). Yuhana 1:9-10 na, o yɔrɔ ra «dunuɲa» tɔgɔ fɔra siɲagako naani. Kibarodiman sɛbɛbaga Yuhana fɛ, o kuma kɔrɔ ka surun dibi kɔrɔ ra, sabu a sɛbɛra ko: «dunuɲa bɛɛ lajɛnnin bɛɛ bɛ Setana ta fanga le kɔrɔ» (1 Yuhana 5:19). Fɔlɔfɔlɔ dunuɲa tu man jugu, sabu Ala tun k’a dan k’a ɲa. Ala ta nɔɔrɔ ni a ta ɲumanya tun ka yɔrɔ bɛɛ fa. «Ala tun ka fɛn o fɛn kɛ, a ka o bɛɛ flɛ, k’a ye ko o bɛɛ ka ɲi kosɛbɛ» (Damina 1:31). Ala ka mɔgɔ dan ka kaɲa ni a yɛrɛ cogo ye; Ala ta nɔɔrɔ tun dira an bɛmaw, minw tun ye mɔgɔ fɔlɔw ye, fɔ Danbaga ta yeelen tun bɛ manamana ka bɔ olugu fana ra, i ko dugalen. Nka yɛrɛbonya kosɔn, o kɛra mɔgɔjuguw ye ani mɔgɔ murutininw. Jɛnɲɔgɔnya min tun bɛ o ni Ala cɛ o banna o ra, ka sɔn dibi ta kokɛcogow ma. Ka i yɛrɛ mabɔ Ala ra, o bɛ i kɛ mɔgɔjugu ye tuma bɛɛ, i n’a fɔ Dawuda b’a fɔ cogo min na, Zaburu 14:1 na, ko : « Mɔgɔ kolɔnbariw b’a fɔ o yɛrɛ kɔnɔ ko: «Ala tɛ yi!» O mɔgɔw ye mɔgɔkolonw le ye, o ta kɛwalew bɛɛ haramunin lo; o si tɛ koɲuman kɛ. » O bɛɛ n’a ta, Kibarodiman sɛbɛbaga Yuhana ka nin seereya kɛ, ko Kirisita nana nin dunuɲa jugu kɔnɔ, i n’a fɔ tere bɔtɔ bɛ dibi gbɛn dɔɔni dɔɔni ka bɔ a yɛrɛ ɲa cogo min na. Kirisita ta yeelen ma don an ta dunuɲa kɔnɔ i ko sanmanamana min bɛ bɔ, k’a kɛ i n’a fɔ a bɛna mɔgɔ fiyen. A jususumanin le nana, ka yeelen bɔ mɔgɔw bɛɛ ye. A ma na i ko kititigɛbaga min bɛ mɔgɔ faga, nka a nana i ko an Kisibaga ani an Kumabɔbaga. Mɔgɔ bɛɛ mako b’a ra ko Kirisita ye yeelen bɔ a ye. Ni o tɛ a bɛ to dibi ra. Kirisita le ye yeelen sɔbɛ ye, mɔgɔ wɛrɛ si tɛ. Ni mɔgɔ min ka sɔn a ta yeelen ma Kibarodiman sababu ra, o tigi jogo bɛ yɛlɛma, a bɛ kɛ mɔgɔ ɲuman ye, ale fana ta yeelen bɛ manamana mɔgɔ tɔw ye. An ye nin kuma kɔrɔ ɲini k’a faamu: «Danbaga nana a yɛrɛ ta dunuɲa kɔnɔ.» Yɔrɔtigi nana a ta yɔrɔ ra, masacɛ gbarara a ta mɔgɔw ra. Jɔntigi le bɛna kunu k’a nako labɛn ? Jɔn bɛna a nako sɛgɛsɛgɛ k’a can lɔn, ani a nakunw ? Jɔn le labɛnna ka ni dunuɲa ta ko ɲacintanw to yi ka Ala natɔ kunbɛn ? Nin wagati kelen min bɛna an ta dunuɲalatigɛ ta fɛn bɛɛ yɛlɛma, jɔn le bɛna o lɔn k’a faamu, ko o wagati le ra Ala bɛna na ? Matigi Ala barara ka na yɔrɔnin kelen na, ka na kɛ jurumuntɔw cɛ ra. A nana hali mɔgɔ ma bɔ a kala ma, ka na ni hɛra ye. A tun t’a fɛ ka na mɔgɔw ɲa fiyen le ni a ta bonyaba, ni a ta sebagaya ni a ta nɔɔrɔba ye. A nana a ta yɛrɛmajigiya le yira, ani a ta kanuya ni a ta can. Kabini dunuɲa damina wagati ra, yɛrɛbonya k’a to adamaden benna. Setana kɔni, ale tun b’a fɛ ka kɛ danfɛn barakaman ye, ani danfɛn nɔɔrɔman ani hakiritigi, i ko Ala. O kɔ, Kirisita min ye sebɛɛtigi ye, ale bangera ; o ka o denɲɛnin barakantan fitini la bɛganw ta domuniminan kɔnɔ. A ni a ta yɛrɛmajigiya, a ta sabari ni a ta kanminari, a ka se sɔrɔ. A majigira fɔ ka na kɛ adamadenw jukɔrɔ, janko ka bɛɛ kelen kelen kɔrɔta, ka o bɛɛ kisi. Aw ye nin lamɛn, aw adamadenw bɛɛ ! Nin kibarodiman kɔ fɛ, min ka jugu, o ye ko dunuɲamɔgɔw ma yeelen lɔn, o m’a faamu fana. Mɔgɔw ma bɔ a kala ma ko Ala Dencɛ gbarara o ra, ka na kɛ ni o ye. O tora fiyentɔya ni fatɔya ra, o ni o ta hakiritigiyaba bɛɛ, ani o ta lɔnniyaba, ni o ta ceguya bɛɛ. O m’a lɔn ko Ala yɛrɛ le lɔnin bɛ o ɲa kɔrɔ. O tun ma o Danbaga lɔn, o Kisibaga min bɛna o ta kiti tigɛ, o ma sɔn o ma. Ni can gbɛlɛn sababu ra, an bɛ se ka koba dɔ sɔrɔ Ala ta masaya ta ko ra: an tɛ se ka Ala ta kow faamu ni an yɛrɛ ta hakiritigiya ye, ni an yɛrɛ ta adamaden baraka dɔrɔn ye. An bɛ fɛn o fɛn karan k’a lɔn Kirisita ta kanuya ko ra, o ye nɛɛma yɛrɛ ye, Ala bɛ min di an ma gbansan, sabu Nin Saninman min le bɛ an wele Kibarodiman sababu ra, ka sira yira an na ni a ta nɛɛmafɛnw ye, ani ka an mara lanaya sɔbɛ ra. O ra, an ka kan ka nimisa, an kana an jigi la an yɛrɛ ta hakiritigiya kan, walama an jusukun cogoya. An bɛɛ mako b’a ra ka an jusukun dayɛlɛ yeelen sɔbɛ ye, i n’a fɔ yirifiyerenw bɛ dayɛlɛ cogo min na tere yeelen sababu ra. O cogo ra, ka lanaya kɛ Kirisita ra o le bɛ na ni lɔnniya sɔbɛ ye. Lanaya bɛ damina nin cogo min na, o tɛ bɔ anw yɛrɛ ra, nka Matigi ta Nin ta baara lo ; minw bɛɛ bɛ a kan mina a bɛ o baara kɛ olugu bɛɛ kɔnɔ. DAARIKAN: An b’i fo, Matigi Yesu, sabu i nana dunuɲa kɔnɔ. I ma na ka na kiti ben an kan ka i yɛrɛ dimi bɔ, nka i nana ka na adamadenw bɛɛ bla yeelen na ka o kisi. Anw ye fiyentɔw ani hakirintanw le ye. An ta hakɛw yafa an ma ka jusukun ɲuman di an ma janko an ye i kan mina. An ɲaw yɛlɛ k’a to an ye se ka i ye. An jusukun dayɛlɛ k’a to i ta yeelen ɲuman ye don an kɔnɔ, janko an ye se ka ɲanamanya i ta Nin Saninman ta sebagaya ra. ƝININKARI:
|