Mobile device - Print - Bottom

Previous Lesson -- Next Lesson

9. Nyanmiԑn ndԑ nga e kԑnngԑn titi’n ᴐ yi e ti delԑ’n i nglo

---

Sԑ an bui i kԑ kԑ sran kun ko lafi Krist su’n, wuun ᴐ kwla tᴐ-man sa tԑ’n i lakalԑ’n nun kun’n, ᴐ ti ato. Cԑcԑ! Ͻ kwla tᴐ sa tԑ’n i lakalԑ’n nun. Sanngԑ ng’ᴐ ti nanwlԑ’n yԑlԑ kԑ ᴐ o Nyanmiԑn sa nun, i sa bᴐ kwlalԑ o nun’n, i sa b’ᴐ ti anannganman’n, ᴐ sasa sran sᴐ’n. Blԑ kekle’n nun’n, ᴐ nyan fanngan i Min’n i nuan ndԑ’n nun, afin i Min’n i nuan ndԑ’n ᴐ ijᴐԑ yԑ ᴐ mԑn i fanngan. Nyanmiԑn nin i be o nun, yԑ ng’ᴐ ti kpa tra su’n, yԑlԑ kԑ Nyanmiԑn trԑn i nun nin i Wawԑ’n b’ᴐ man ᴐ nyan kwlalԑ lakalԑ blԑ’n nun’n. Sran ng’ᴐ lafi Krist su’n, ᴐ ′suan awlԑn tralԑ yԑ ᴐ nin bé wla bᴐ be fa guԑ Nyanmiԑn su sa kwlaa ng’ᴐ ju bé nguan’n nun’n.

Sԑ an klo kԑ amun wun delԑ nga Nyanmiԑn deli amun i wlԑ kpa’n, an suan Nyanmiԑn ndԑ’n wᴐ amun nyrun titi. An kan amun ase Nyanmiԑn Wawԑ’n i bo afin i yԑ ᴐ wa tinngԑ amun nyanmiԑn juman dilԑ’n nun asᴐnun’n nun-ᴐn. Sunmanfuԑ Pᴐl kannin kԑ:

Sԑ Nyanmiԑn ndԑ’n nu-an lԑ wuun e kusu e kwla tran-man lԑ. Nyanmiԑn ndԑ’n i yԑ ᴐ ti e wawԑ nun aliԑ’n nin-ᴐn. Kԑ e o lԑ titi’n, e di-man like kpԑ kunngba cԑ le mᴐcuԑ kun nun, sanngԑ e di like kpԑ nsan cԑn ba kun nun sԑ aleje o lԑ’n. E yoe sᴐ k’ᴐ yo nan y’a nyan fanngan e junman dilԑ’n nun’n nan y’a kwla yo ninnge’n kwlaa ng’ᴐ fata kԑ e yo bé’n. Man e se kԑ sran kun di like le mᴐcuԑ kun nun kpԑ kunngba cԑ! Kannzԑ ᴐ su ka-man lԑ wun-man’n, sanngԑ ᴐ yo fakafaka yԑ ᴐ ′tran wie’n nin nguan’n bé afiԑn. I sᴐ sran liԑ’n ᴐ su kwla di-man junman ng’ᴐ ti wunmiԑn su junman’n yԑ blԑ’n kwlaa san ᴐ ′la. I kunngba’n nin-ᴐn, k’ᴐ ti sᴐ-ᴐ wawԑ nun-ᴐn. Kristfuԑ kwlaa ng’ᴐ di-mԑn i wawԑ nun aliԑ’n cԑn kwlaa’n yԑ ᴐ la-man nyanmiԑn ase titi’n, ᴐ kwla nyin-man klolԑ’n nun, su lafilԑ’n nun yԑ sunnzunlԑ’n nun. Ͻ fata kԑ an bu nyanmiԑn ndԑ’n i akunndan titi yԑ an suan nyanmiԑn ndԑ’n amun ti nun. E Min Zezi yili nvialiԑ nun sa kun nglo seli kԑ:

Sԑ amun lԑ Nyanmiԑn ndԑ fluwa’n, nán an fa sie i kԑ an sie fluwa nga’m be lᴐ. Nán an yaci lԑ man ndutre’n gua su. Amun tinndin amun sa yԑ an fa fluwa saun’n, an tike su yԑ an bu i nun ndԑ’n i akunndan, an kanngan ndԑ sᴐ’n cԑn’n kwlaa. An suan i nun ndԑ cinnjin mun amun ti nun. Man nyanmiԑn ndԑ’n yi amun awlԑn’n, afin mԑn’n i Min’n yԑ ᴐ kan ndԑ kle amun-ᴐn.

Cԑn kun nyanmiԑn sran kun ᴐli dᴐᴐtrᴐ. I tukpacԑ’n ti kekle ᴐ man dᴐᴐtrᴐ’m be waan be kpaci i nun. Kԑ ᴐ srԑli nyanmiԑn mԑnnin i osufuԑ mun nin dᴐᴐtrᴐfuԑ nga be wa kpaci i nun mun’n, be lafili i yԑ be kpacili i nun be yili tukpacԑ’n nin-ᴐn. Blԑ wie kԑ dᴐᴐtrᴐ’m be lafi sran mun bᴐ be kpaci be nun bᴐ ayre nga be fa lafi be’n i ta’n ko kpᴐ’n, be kaan nvialiԑ nun ndԑ wie mun bᴐ be o be akunndan’n nun sanngԑ be wun-man nun. I sin nan nyanmiԑn sran bᴐ be kpacili i nun ᴐ’a tinnge kpa’n, nyanmiԑn ndԑ kpanngban kpa be fin i nuan fiteli. Like uflԑ ᴐ’a fin-man i nuan a fite-man san nyanmiԑn ndԑ ngunmin, afin i awlԑn’n ti yiwa nin nyanmiԑn ndԑ’n.

? Sԑ wᴐ yԑ be kpacili ᴐ nun’n kԑ nyanmiԑn sran sᴐ’n i liԑ’n sa’n, nguԑ ndԑ mun yԑ be ′fin ᴐ nuan ′fite-ᴐ ? ? Jasin Fԑ’n ᴐ’a yi wᴐ akunndan’n? San like ng’ᴐ o wᴐ awlԑn’n nun’n yԑ ᴐ fite ᴐ nuan-ᴐn. Sԑ a klo kԑ a nyin wawԑ’n nun’n, ᴐ fata kԑ a ‵kanngan nyanmiԑn ndԑ’n titi. Kԑ a ′kanngan nyanmiԑn ndԑ’n, Nyanmiԑn bᴐbᴐ yԑ ᴐ kan ndԑ kle wᴐ-ᴐ.

Sԑ an klo kԑ Krist i Wawԑ’n tinngԑ amun’n, man amun wla kpԑn ndԑ nga su titi: An kanngan nyanmiԑn ndԑ’n titi yԑ an srԑ nyanmiԑn kԑ ᴐ tu i bo kle amun yԑ an kan amun wun ase ndԑ sᴐ’n i bo. Kԑ e se kԑ an kanngan nyanmiԑn ndԑ’n cԑn’n kwlaa’n, ᴐ ti-man mmla bᴐ i su falԑ’n kle yalԑ-ᴐ, ᴐ ti akluujuԑ like bᴐ be kunndԑ-ᴐ, be nyԑn-mԑn. Kԑ gbanflԑn kun fa minndԑ bla bᴐ ᴐ’a trԑ i ase’n i fluwa’n, bᴐ kԑ ᴐ ko nyԑn’n ᴐ kpli tike su, ᴐ kanngan nun, ᴐ kanngan flan nun’n, i kunngba’n nin-ᴐn, be kwlaa nga be klo Krist’n, be kanngan i nuan ndԑ’n, be flan nun, be bu i akunndan, be fa sie be akunndan’n nun, be fa su yԑ be nin ndԑ sᴐ’n yԑ be wu-ᴐ. Sran kwlaa ng’ᴐ lafi e ti kpᴐfuԑ’n i su’n, ᴐ kwla kᴐ-man i nyrun yԑ ᴐ kwla yo-man kpa i nguan’n nun sԑ Jasi Fԑ’n nu’ԑn i nun. Ͻ fata-man kԑ e yaci nyanmiԑn ndԑ’n i kannganlԑ le. Sԑ e kanngan-man nyanmiԑn ndԑ’n, e wawԑ nun nguan’n ᴐ kan ase yԑ ᴐ wu.

I sᴐ’n ti sԑ an klo kԑ amun nyin wawԑ nun’n, ᴐ ti cinnjin kԑ an kanngan Moiz i mmla’n nin Jasin Fԑ’n titi. Nyanmiԑn bᴐbᴐ yԑ ᴐ kan ndԑ kle amun trelele i nuan ndԑ’n nun-ᴐn.

Mobile device - Print - Top