Mobile device - Print - Bottom

Previous Lesson -- Next Lesson

3. Ala ta alaya bɛɛ dafanin yera Yesu ta adamadenya ra (Yuhana 1:14-18)

---

YUHANA 1:14
14 Kuma kɛra adamaden ye. A nana sigi an cɛ ra. Nɛɛma ni can dafanin tun b’a fɛ. An fana k’a nɔɔrɔ ye. Den kelenpe min bɔra Fa Ala ra, ale ta nɔɔrɔ lo.

Yesu Krisita ye jɔn ye ? Ala yɛrɛ lo, adamaden yɛrɛ lo fana. Yuhana bɛ o gundoba fɔ an ye, k’a kɛ i n’a fɔ a ta kibabrodiman kumakanba. Wagati min a bɛ kuma k’a fɔ ko Ala ta kuma kɛra adamaden ye, a bɛ a ta karan jusiginan le yira an na ten. Hayan 14 le ye kunnafoni nata tɔw bɛɛ faamu sababu ye. Ni aw sera ka nin kuma dawulaman kɔrɔw bɛɛ faamu, o tuma aw bɛna se ka kitabu sura tɔw kɔrɔ lɔn ka se fɔ yɔrɔ jan.

Kirisita ta adamadenya ko ni an ta bangeko kura ko cɛ ka jan ɲɔgɔn na kabini a damina. Farikolo bɛ an bɛɛ fɛ, an facɛ ni an bamuso le ka an bange. O kɔ fɛ, Kibarodiman ta kuma sera an ma, ka ɲanamanya banbari di na ma. Nka Kirisita ma bange adamaden dɔ sababu ra min kɛra a facɛ ye. Ala ta kuma nana Mariyamu kɔnɔ, ka kaɲa ni mɛlɛkɛ ta kuma ye, ko : « Nin Saninman bɛna jigi i kan, Ala Kɔrɔtaninba ta sebagaya bɛna i datugu i ko yirisuma. O le kosɔn, i bɛna dencɛ saninman min woro, o bɛna wele ko Den min bɔra Ala ra » (Luka 1:35). Mariyamu sunguruman sɔnna nin cirakan ɲumanba ma ni lanaya ye minkɛ, den dɔ ta nin sɔrɔra a kɔnɔ, ko min ɲɔgɔn ma deri ka kɛ, ko Nin Saninman farara adamaden jori kan, o den nin kɔnɔ. Ala kɛra adamaden ye o cogo le ra.

Ni an bɛ miiri nin ko ra, an hakiri ka dɔgɔ ka nin can faamu. Adamaden ta karan lɔnniya tɛ se ka nin gundo faamu. Adamaden ta kolɔn bɛ dɛsɛ ka nin faamu. Karamɔgɔ dɔw ka cogo ɲini ka dɔ bɔ Kirista bangeko gundo ra ni adamadenw ta lɔnniya ye, k’a fɔ ko Kirisita k’a yɛrɛ yira ni farikolo bisigi dɔ ye, nka farikolo ɲanamanya tun t’a ra, dimi ni tɔɔrɔ bɛ se ka digi min ma. Nka an b’a fɔ k’a gbɛya ko Kirisita tun ye adamaden ye cogo bɛɛ ra, a fana tun ye Ala ye cogo bɛɛ ra.

Kirisita ta adamadenya ko, o le ye nin bangeko kabakoman faamucogo ɲuman ye. Min ye Ala Dencɛ ye wagati bɛɛ ani tuma bɛɛ, ani min tun bɛ Fa Ala kɔrɔ wagati bɛɛ ani tuma bɛɛ, ale nana an ta farisogo ɲɔgɔn ta, a jurumuntan, sabu Nin Saninman min tun bɛ a kɔnɔ, o ka se sɔrɔ jurumun kan. O cogo ra, Yesu kelenpe le ye adamaden ye min ɲanamanyara a jarakibari, ani a saninyanin, kojugu nɔ si ma ye a ra.

Ala Dencɛ nana don mɔgɔ murutiniw cɛ ra, ka kɛ mɔgɔ hinabariw ani mɔgɔjuguw cɛ ra, minw bɛɛ sanin lo. K’a sɔrɔ damina tɛ ale ra, laban t’a ra, a tɛ sa k’a ye, k’a sababu kɛ a ta alaya ye. A ni a ta bonya bɛɛ, a ka an kanu, ka bɔ a ta nɔɔrɔ ra, nɔɔrɔ min tun b’a fɛ Fa Ala kɔrɔ, ka na ɲanamanya an cɛ ra ni yɛrɛmajigiya ye. A kɛra an dɔ ye, ka an ta cogo bɛɛ faamu. K’a to tɔɔrɔ cɛ ra, a ka Ala kan mina fɛn bɛɛ ra. A tun fara hina ra. An ma ban an na, anw mɔgɔjuguw. Kirisita kɛra adamaden ye janko ka gbara anw na, ani janko ka anw gbara Ala ra.

Kirisita farikolo cogo bɔra Layirikɔrɔ ta fanibon cogo fɛ, Ala ni a ta mɔgɔw tun bɛ to ka ɲɔgɔn kunbɛn yɔrɔ min na. Ala tun bɛ Kirisita ra; a k’a yɛrɛ yira an na adamaden cogo ra. Alaya cogo bɛɛ tun bɛ Kirisita ra. Ka kaɲa ni gɛrɛkikan ye, Yuhana k’a fɔ le ko « Ala nana a ta fanibon gban an cɛ ra ». O kɔrɔ ye ko a ma na masabonba le lɔ min bɛ mɛɛn, janko ka to ni an ye dugukolo kan wagati bɛɛ, nka a nana wagati dɔɔni le kɛ ni an ye, i n’a fɔ kongokolon sigibaga minw bɛ wagati dɔ kɛ o ta fanibon kɔnɔ, o kɔ o bɛ a kuru k’a ta ka taga yɔrɔ wɛrɛ ra. Kirisita tora an cɛ ra wagari dɔɔni dɔrɔn le, o kɔ a sekɔra ka taga sankolo ra.

Ciradenw k’a fɔ ko can lo, ko olugu kɛra Kirisita ta nɔɔrɔ seerew ye. O ta seereya ye ɲagari mankanba le ye, ani ninsɔndiya sababu. O kɛra o seerew ye, minw ka Ala Dencɛ farisogoraman ye o ɲa ra i ko adamaden. O ta lanaya kɛra sababu ye k’a to o sera ka Yesu ta kanuya, ani a ta muɲuri, ani a ta yɛrɛmajigiya, ani a ta kankelentigiya, ani a ta alaya faamu. O ka Ala yɛrɛ ye, a ta saninmanya cogo bɛɛ ra. Layirikɔrɔ ra, kuma min fɔra ko « a ta nɔɔrɔ », o kuma bɛ Ala ta yiracogow bɛɛ yira an na. Ciraden Yuhana bɛ jija ka Yesu ta yiracogow bɛɛ fɔ an ye a ta seereya ra. A ka Yesu ta masaya nɔɔrɔ dogonin ye, ani a ta cɛŋa ani a ta bonya.

Nin Saninman ka nin miiriya don Yuhana kɔnɔ, ka Ala wele ko Fa, ka Yesu wele ko Dencɛ. An tɛ se ka an kɔ don nin tɔgɔw ra. Fani min tun ka Ala tɔgɔ datugu, Nin Saninman bɛ na ni miiriya min ye o bɛ o fani faran, k’a fɔ an ye k’a gbɛlɛya ko Ala saninman, Ala banbari, Ala Danbaga setigiba ye Fa ye, ani ko Dencɛ b’a fɛ, min fana saninman lo, a nɔɔrɔman lo, banbari lo, ani a fara kanuya ra. Ala tɛ kititigɛbaga setigi ye dɔrɔn, min bɛ mɔgɔ halaki k’a yɛrɛ dimibɔ. A bɛ makari, a sabarinin lo. A bɛ muɲu, ani a Dencɛ fana bɛ o cogo kelen na. Ni an bɛ Fa ni Dencɛ ko faamu, o tuma an bɛ se Layirikura kɔnɔko yɛrɛ ma. Ni mɔgɔ min ka Dencɛ ye, o tigi ka Fa fana ye. An bɛ Ala ta cogo min ye dina wɛrɛw ra, nin yirari ka o cogo yɛlɛma, ka an ɲaw yɛlɛ kanuya wagati kan.

Yala aw b’a fɛ ka Ala lɔn wa ? O tuma aw ye Kirisita ta ɲanamanya ko karan ! Karamɔgɔdenw ka mun ye Yesu ra ? O ta seereya kunba ye juman ye ? O ka kanuya ye, nɛɛma ni can bɛ ni a ye. Aw ye miiri nin kumakun fla ra ka aw to Ala daari ra ; ni o kɛra aw bɛna a faamu ko Ala ta nɔɔrɔ dafanin bɛ Kirisita ta ɲanamanya ra. Yesu bɛ na an fɛ ni a ta nɛɛma ye, k’a sɔrɔ an man kan ka ni a ye, sabu kojugu ka an jusukun cɛn. An bɛɛ jarakira ; an si terennin tɛ. Yesu ta nako bɛ a ta nɛɛma ko yira an na. A ma maroya ka an wele ko a balemaw, a ka an ta jurumun bɔ an na, ka an saninya, ka an kɛ danfɛn kuraw ye, ka an fa a Nin na. Nin kɛwale minw bɛ kisiri di an ma, yala o tɛ « nɛɛma dɔ faranin ye nɛɛma dɔ kan wa » ? Ka tɛmɛ o bɛɛ kan belen : an ka lɔyɔrɔ kura sɔrɔ, sabu Kirisita nɛɛmara an ye k’a to an ka lɔyɔrɔ kura sɔrɔ, min bɛ an kɛ Ala denw ye. Nɛɛma ta cikan tɛ janfa kuma ye walama miiriya gbansan, nka lɔyɔrɔ kura lo. Yesu ta adamadenya le b’a yira ko Ala ta baara ye can le ye, ko o le bɛ an ta kisiri ko bɛɛ dafa. Nɛɛma le ye an ta lanaya jusiginan ye.

DAARIKAN: An bɛ an kinbiri gban i ɲa kɔrɔ, ele Denɲɛni min lanin bɛ bɛganw ta domunikɛminan kɔnɔ, an bɛ an kinbiri gban i ɲa kɔrɔ i ko sagagbɛnbagaw ni lɔnnikɛbagaw k’a kɛ cogo min na Bɛtilɛhɛmu. I ye Ala ye, min kɛra adamaden ye, i ma maroya ka an wele ko i balemaw. I ta yeelen bɛ manamana dibi ra. Ne jusukun nɔgɔnin saninya, janko a ye kɛ i sigiyɔrɔ ye wagati bɛɛ. Ne bɛ fara lanabagaw tɔw bɛɛ kan ka i bonya, sabu i ta nɔɔrɔ kɛra farikolo majiginin ye. An b’i daari kosɛbɛ ko i ye i yɛrɛ yira an kɛrɛfɛmɔgɔw ra, janko o ye o ta lɔyɔrɔ kura mina ka sɔn a ma.

ƝININKARI:

12. Kirisita ta adamadenya kɔrɔ ye di?

Mobile device - Print - Top