Mobile device - Print - Bottom

Previous Lesson -- Next Lesson

a) Napp gu yéeme ga (Yowaana 21:1-14)

---

YOWAANA 21:7-8
7 Taalibe ba Yeesu bëggoon ne Piyeer: «Borooù bi la!» Bi Simoŋ Piyeer déggee loolu, dafa woddoo mbubbam, ndaxte dafa summeeku woon; dal di sóobu ci dex gi. 8 Yeneen taalibe ya xëcc mbaal, mi fees dell ak jën, jëme ko ca tefes ga, ndaxte gaal ga sorewul oon; diggante bi waroon na tollook téeméeri meetar.

Wesaarekatu Injiil bii, xamoon na ne napp gu tollu nii, dug neen. Mungi woon ci gaal gi, waaye gis na ne ka muy séen ca tefes ga, du keneen ku dul Yeesu ci boppam. Yowaana jaarul ci turu Yeesu, waaye ak wegeel, dafa ne: «Boroom bi la!»

Loolu daw Yaramu Piyeer, mu xam ne Krist mayaat na leen njàngat mu bees ci napp gii.. Mu daldi nëbb yaramu neenam ngir Boroom bi bañ a gis ay cëram. Mu sóobu ci ndox mi, féey ba ca tefes ga. Dafa bàyyi gaal ga ca gannaaw, ak xaritam ya, ak jën yay pat-pati. Mu fàtte lépp ndaxte xolam a ngi doon rëkk ngir Yeesu.

Yawaana des ci gaal gi, ak li mbëggeelam dëggëre woon ni bosu Piyeer lépp Mu nekk ak àndadoom ya, ñu daldi teeral gaal ga ca 100 meetar ya desoon. Mujj gi ñu teer.

YOWAANA 21:9-11
9 Bi ñu teeree, ñu gis ab taal, ñu ciy lakk ay jën, teg mburu ca wet ga. 10 Yeesu ne leen: «Indileen ci jën yi geen jàpp.» 11 Simoŋ Piyeer yeg ca gaal ga, dal di xëcc mbaal ma ca tefes ga, mu fees dell ak jën yu mag; matoon na téeméeri jën ak juró om fukk ak ñett. Te li muy baree-bare lépp, taxul mbaal ma dog.

Bi taalibe ya agsee dañoo fekk ay jën yu ñuy lakk ci safara. Fu Mu leen jële woon? Mu woo leen ngir ñu lekkandoo ak Moom. Mooy Boroom bi ba noppi nekk kiy dalal gan yi. Mu séddook ñoom lekkam ja ak xol bu sedd guy. Dafa nuy may nu bokk ci liggéeyam ak ci déqéem. Bu taalibe ya dégguloon ay kàddoom, kon duñu jàpp dara. Waaye fii, dafa leen a woo ngir ñu lekkandoo. Doy na waar ci li Boroom bi soxlawul ñamu àddina, di wàccee boppam ngir séddook ñoom gii lekk, ndax bëgg ñu yég cofeelam doŋŋ.

Ci ab cosaan bu yàgg, gis nanu ci ne limu 153 jën mooy xeetu jën ya ñu xamoon ca jamono jooja. Dafa mel ni Yeesu dafa ne woon: «Buleen gëti benn xeetu doomu Aadama rekk, waaye indil-leen ma xeeti àddina sépp.» Ñaan nañu ñépp ñu dugg ci dundug Yàlla. Ni mbaal gi xottekuwul ci diisaayu jën ya, noonu it Jàngu bi du seey walla muy ñàkk jokko ak Xel mu Sell mi, bu dee sax ñenn ciy mboloom dañoo bewu mbaa ñu ñàkk mbëggeel. Jàngu bi dëgg, moo koy moom.

YOWAANA 21:12-14
12 Yeesu ne leen: «Ñówleen ndekki.» Kenn ci taalibe yi ñemewu Koo laaj ki mu doon ndaxte xam nañu ne Boroom bi la. 13 Yeesu jegeñsi leen, jël mburu mi, jox leen, jox leen it jën. 14 Bi Yeesu dekkee ba tey, bii mooy ñetteelu yoon bi Mu feeñoo ay taalibeem.

Yeesu dafa dajale taalibeem ya ca la wër safaras mbëggeelam ga. Kenn ca ñoom ñemewul oon a wax dara, ndaxte xamoon nañu ne gan gii du kenn ku dul Boroom bi ci boppam. Bëggoon nañu koo taf ci seeni dënn lool, waaye ragal ak wegeel ñoo leen ko xañ. Yeesu dog tekkaaral ga, barkeel lee, te séddale leen ñam wa. Noonu Mu baal leen te yeesal leen. Taalibe yépp dañuy faral di dund ci mbaalug seen Boroom; su dul oon kóllëreem gi Mu fas ak ñoom, kon ñoom ñépp dañuy faatu. Dañu koy yéex a wóolu, mbaa di ko yaakaar. Moom du leen xas, waaye dafa leen di ñaax ak ñamam wu kéemaane gi. Yeesu ak Yàlla ñungi séentu ngay séddoo Xabaar bu Baax bi ak li nga am bàkkaar lépp, walla sa yéexaayu xol. Fànna la gu Yeesu di topp, di ci matale ay coobareem, gannaaw bi Mu dekkee.

b) Biral nañu kilifteefu Piyeer ni njiitu gétt gi (Yowaana 21:15-19)

---

YOWAANA 21:15
15 Bi ñu ndékkee ba noppi, Yeesu ne Simoŋ Piyeer: «Simoŋ doomu Yowaana, ndax gën ngaa maa bëgg, ni ma ñii bëgge?» Mu tontu ko ne: «Axaŋ-kay, Boroom bi, xam nga ne bëgg naa la.» Yeesu ne ko: «Toppatool ma sama mbote yi.»

Ci nuyóo jammam gi rekk, Yeesu ca peeñoom bu njjëkk ba, baaloon na ay taalibeem seeny bàkkaar, ak itam li ko Piyeer weddi woon. Waaye weddi Piyeer ba dafa laajoon saafara su gën a xóot. Baaxaayu Boroom bi, ci ay kàddoom lay feeñe. Dafay natt xol yi. Waxul dara lu jëm ci weddi bi, ngir may Piyeer nu mu man a natte boppam. Mu woowe ko turu cosaanam ne ko Simoŋ doomu Yonas, ngir fàttali ko nekkinam gu njëkk ga.

Tey jii Yeesu mungi lay laaj: «Ndax bëgg nga ma? Ndax yaa ngi denc samay kàddu te di wóolu samay dig? Ndax xam nga Ki ma doon, ndax itam jege nga ma? Ndax fekksi nga ma ci sama yoon te bàyyi sa am-am, sa jot, sa kàttan ngir man? Ndax say xalaat ci man rekk lañuy jublu, ndax it yaa ngi nekk benn ak man? Ndax sa dundin mungi may sargal?»

Yeesu dafa laaj Piyeer ne ko: «Ndax yaa ma gën a bëgg ñii?» Piyeer tontuwul: «Déedéet, Boroom gënu ma leen de; wor naa la sax.» Piyeer dafa wóolu woon boppam ba ne waaw, waaye dafa yamale mbëggeelam ci ni Grek yi di waxe cofeel, waaye tontoowul ak mbëggeelu assamaan giy jollee ci Xel mu Sell mi ak ngëm gu dëgër.

Kenn xalabul Piyeer ndax ngëmam lu néew li, waaye Boroom bi dafa ko laaj mu biral mbëggeelam gi ngir man a toppatoo Taalibeem yi. Yeesu dafa laaj taalibe bii di yox-yoxi, mu toppatool Ko taalibe yu yi màggagul ci ngëm. Mbotem Yàlla dafa ràmmu ay mbote ci njëgu bakkanam. Ndax jekk nga ngir dimbali gétt gu ni mel, di dékkoondoo lépp ak ñoom, di leen wommat ak muñ, te di séentu seen mataay? Walla dangay xaar ba ñu won la lu ñu manul, mbaa lu ñu àttanul? Walla danga leen a bàyyi, booba ba tey dañoo gedd gétt te tasaaro? Yeesu dafa njëkk a laaj Piyeer mu toppatoo tuut-tànki ngëm gi.

YOWAANA 21:16
16 Noonu Mu waxaat ko ne: «Simoŋ doomu Yowaana, ndax bëgg nga ma?» Mu ne Ko: «Axaŋ-kay, Boroom bi, xam nga ne bëgg naa la.» Yeesu ne ko: «Sàmmal ma sama xar yi.»

Yeesu yemul foofu, waaye dafa laajte lu wóor: «Ndax gaawtuwuloo ba tontu ma naan «Bëgg naa la»? Ndax sa mbëggeel gi dug neen te matadi? Ndax sa bëggeel gi du ag yégeel rekk? Ndax ci coobare gu dëgg la sampu?»

Laaj bi tooyal xolu Piyeer, noonu mu tontu ne: «Boroom bi xam nga lépp, xam nga fi samay man-man yem. Sama mbëggeel nëbbuwu la. Dama laa bëgg ci dëgg-dëgg, te pare naa ngir jébbale sama dund ngir yów. Lajj naa, te dinaa lajjati. Waaye sa mbëggeel gi moo taal ci sama xol mbëggeel gu amul àpp ci man.»

Yeesu weddiwul waxu Piyeer, waaye mu ne: «Ndegam bëgg nga ma, na nga bëgg itam ñi màgg ci ngëm ci sama jàngu bi. Neexu ñoo toppatoo. Ñu bare ci ñoom. Dañoo dëgër bopp, dañuy daanu ak di jóg, ku ci nekk dangay topp sa yoon. Ndax bëgg ngaa gàddu samay mbote, ba sonn ci lool? Yaay seen njaatige.»

YOWAANA 21:17
17 Mu neeti ko ñetteelu bi yoon: «Simoŋ doomu Yowaana, bëgg nga maam?» Piyeer am na qar ci li Mu ko laaj ñetti yoon: «Ndax bëgg nga ma?» Mu tontu ko ne: «Boroom bi, xam nga lépp; xam nga ne bëgg naa la.» Yeesu ne ko: «Toppatool ma sama xar yi.»

Piyeer dafa weddi Boroomam ñetti yoon, noonu Yeesu fëgg dënnam ñetti yoon ci buntu xolam itam, te natt xóotaayu mbëggeelam. Mu joxoñ baaraam mbëggeelu asamaan gi jóge ci asamaan te Piyeer war koo gis ci dundam. Gisu ko nag ba Xael mu Sell mi wàcc ci moom ca bésub Pantekot ba. Mu teg ca ne: «Ndax yów yaa gën a bokk ñeneen ñépp ci man, ba nga naan dangay joxe sa ngir àddina si?»

Piyeer nangu na ne Yeesu wax na dëgg bi mu waxe ci lu jëm ci ñetteelu weddeem bi, te it Krist xam la lépp. Noonu la Ko Piyeer woowe Yàlla ju dëggu ji, ki xam li nekk ci biir xolu nit ki. Loolu mooy sasu diine bi ñu dénk Piyeer-Toppatoo xar yi.

Ndax ndaw luy toppatoo jurug Yàlla nga? Ndax yaa ngi gis bukki yi ak xel yu bon yiy songesi? Fàttalikul ne nun ñépp ay bàkkaarkat lanu, te yeyoowunu màqaama di nekk njaatige géttu Yàlla, ba mu des li nu Kurwaa bi may. Man naa am sax ne Sàmm yi ñoo gën a yittewoo mbaal xar yi; ndax dañuy sàggane seeny wareef yi gën a am solo?

ÑAAN: Boroom bi Yeesu Krist, yów yaay Sàmm bu Baax bi. Woo nga ma ngir ma nekk sàmm, te yeyoowu ma ko. Maa ngi lay topp te di lox. Dénk nga ma say mbote. Maa ngi wàkkirlu ci Yów, di la ñaan nga aar leen, may leen dund gu amul àpp, te sàmm leen, ngir kenn du leen manal dara. Sellal-leen, te may ma muñ, laabiir, kóolute, ngëm ak yaakaar gu may saxe ci sa mbëggeel. Doo ma bàyyi mukk, ndaxte da nga maa bëgg ci sa biir xol.

LAAJ:

131. Lan moo la gën a laal ci waxtaanu Piyeer bi, ak Yeesu?

Mobile device - Print - Top