Waters of LifeBiblical Studies in Multiple Languages |
|
|
Home Bible Treasures Afrikaans |
This page in: -- Albanian -- Arabic -- Armenian -- Bengali -- Burmese -- Cebuano -- Chinese -- Dioula? -- English -- Farsi? -- French -- Georgian -- Greek -- Hausa -- Hindi -- Igbo -- Indonesian -- Javanese -- Kiswahili -- Kyrgyz -- Malayalam -- PEUL -- Portuguese -- Russian -- Serbian -- Somali -- Spanish -- Tamil -- Telugu -- Thai -- Turkish -- Twi -- Urdu -- Uyghur? -- Uzbek -- Vietnamese -- Yiddish -- Yoruba
Previous Lesson -- Next Lesson YUUHANNA - Ndaygu ngun jalbi ka nder nibhe DAMAL 4 - Fii no ndaygu ngun fooliri non nibhe dhen (Yuuhanna 18:1 – 21:25)
B - Fii immutal Iisaa-Almasiihu on e feenyannde makko nden (Yuuhanna 20:1 - 21:25)
4. Fii Rawnoode Linjiila Yuuhanna on (Yuuhanna 20:30-31)YUUHANNA 20:30-31 Awa en hewtii ka lannoode deftere nde Yuuhanna windi nden. Oo windoowo wondudho e gundooji, no bhangini fii ummutal ndaygu Alla ngun e nder nibhe dhe jabhaali mo dhen. Kono kala jabbhiibhe mo, gomdhini innde makko nden, ko bhen o newnani wonugol bhibbhe Alla. Windoowo Linjiila nantudho innde on naadii en ka luggeendi humondiral allankaakuwal woodirngal ngal sabu annabi Iisaa. O sifanike en fii mayde e ummutal Almasiihu on fii no gomdhiniren mo e no yi’iren ngurndan makko wondhan dhan e men. Ka rabbhinningol haala, sahaabaajo on no jonni en sartiiji nayi fii sifanagol en no laabhiri ko bhuri e hittunde kon e nder ndee deftere nde o windi e ko addi kon o windude ndee. Yuuhanna dhabbhaali no o sifora maakuuji dhi annabi Iisaa maaki dhin fow e kuudhe dhe o huuwi dhen fow. Si wonaano dhun ko defte hebhi defte o windaynoo. O subhii dhii piiji feyyhudhi e jandeeji toddhaadhi fii wallitagol en no faamiren ko hombo woni annabi Iisaa e ko alaa kon nando. O windiraali wa mo Ruuhu-Seniidho Alla on jangani tun wa si tawii o faamaa fii ko o nani kon. Kono himo andunoo, himo ardoreede Ruuhu-Seniidho on fii subhagol piiji hittudhi dhin, himo siforde giggol fii Baalun Alla bhooraykun junuubi aduna on kun, ko e fee sadaka makko on yaafuyee junuubaaji dhin hebhorta. Yuuhanna ko windiri ndee deftere ko fii wallitagol en no faamiren wonde Iisaa neddho mo Naasirata on, on bugitaadho e anyaadho on ko kanko woni Subhaadho on, Almasiihu fodaadho on e Gedhal Alla on fow nde wootere. Rewrude e dhen indhe dhidhi, o jaabike ko Yahuudiyankeebhe bhen habbii kon e saa’i Ahadi Hindi ndin. O nyaawi jamaa makko fempudho on ka leggal altindiraangal oo iwudho e jurriya fodaadho on annabi Daawuda. Annabi Iisaa neddho on timminii tigi ko fewti kon Almasiihu goongaajo on, on wondho Bhiddho Alla on. Giggol Alla mawngol ngol e laabhal makko ngal no no e dow kala toonye. Yuuhanna no mawninirde annabi Iisaa mawgu labaangu. Ko o sifii kon fii annabi Iisaa alaa nando, wallay en kadi no andiren giggol Bhiddho Alla on, on wontudho neddho fii no wontiren bhibbhe Alla. Yuuhanna faalaaka ardaade en e gomdhinal ngal tun, kono himo faalaa sincande en humondiral hakkunde men e Bhiddho Alla on. Bhay annabi Iisaa ko Bhiddho, Alla wontanay en Baaba. Bhay Jom-Bhural on ko Ben men, himo waawi kadi hebhude bhibbhe buy o yedha bhe ngurndan makko poomayankejan dhan. Ko Linjiila Yuuhanna on faala, ko yo en wuuru ngurndan kesan sabu yhiiyhan Almasiihu on wondude e Ruuhu on e men. Hara on jibintinaama ka bannhe ruuhu kaa ko on maybhe e nder junuubaaji mon dhin? Hara ngurndan Alla dhan no tabiti e mon kaa ko on bhe wadhoraa Ruuhu-Seniidho on? Jibinande heyre nden ko gomdhingol Bhiddho Alla on laatorta. On mo hoolike mo hebhay ngurndan iwudhan ka Alla. Dhan ngurndan, o wuuray dhan e nder humondiral tabitungal hakkunde makko e Alla sabu gomdhinal ngal. On mo humondirii e annabi Iisaa faamay wonde annabi Iisaa no humondiri e makko. Suga on gomdhindho mawniray Ruuhu e goonga, o rima ngurndan iwudhan dhan ka Alla. Ngurndan poomayankejan dhan ko giggol Alla wadhayngol ngol no o addira kawtal makko ngal no bhe gomdhinira annabi Iisaa. Kambhe kadi, bhe wontoyay wondubhe e giggol e humondirbhe e makko e bhe o humondiri kanko kadi haa poomaa. TORAARE: Iisaa Joomi, men jarnii ma fii Linjiila on wano Yuuhanna holliri mo non. Tippude e nden deftere nde alaa sifa, men faamii fii mangural maa ngal e goonga maa on. Medhen sujjande ma e dow weltaare bhayru a ardike men no men gomdhinira maa, a yedhii men ngurndan kesan sabu sulfu on. Tiidhinan men gomdhinal amen ngal e giggol amen ngol e telenma maa. Wallito men no men dhoftora yamirooje maa dhen e no men seeditora yeeso yimbhe bhen fii innde maa nden. Medhen faalaa yo yibbhe amen bhen hoolo ma e yo bhe hendo ngurndan heewudhan dhan sabu gomdhinal ngal. LANDAL:
|