Waters of LifeBiblical Studies in Multiple Languages |
|
|
Home Bible Treasures Afrikaans |
This page in: -- Arabic -- Armenian -- Azeri -- Bulgarian -- Chinese -- English -- French -- Georgian -- Hausa -- Hebrew -- Hungarian? -- Igbo -- Indonesian -- Javanese -- Latin? -- PEUL -- Polish -- Russian -- Somali -- Spanish? -- Telugu -- Uzbek -- Yiddish -- Yoruba
Previous Lesson -- Next Lesson MATTA - Tuubee ko fii laamu Almasiihu on ngun bhadike!
Jandeeji suutaadhi ka Linjiila Almasiihu on no Matta yottiniri mo non
SOBBHUNDU 2 - Fii waaju e golle Almasiihu on Jaliilu (Matta 5:1 - 18:35)
A - Fii waaju ngun ka hoore fello: Fii sariya teddudho on ka laamu kammu ngun (Matta 5:1 - 7:27) -- Fii no maakuuji Almasiihu on dhin mottindiriraa non ka aranun
2. Fii ko waddhii en kon telenma Alla (Matta 6:1-18)
c) Fii no Joomi on tindiniri no juulirtee non (Matta 6:9-13)MATTA 6:10 Jokkoobhe diina heewubhe no wartoo e nder etagol mabbhe andugol muydhe Joomi mabbhe on. Sariyaaji dhin e dhate diina ko sincanaa ko fii jannugol yimbhe bhen no bhe dhoftora yamirooje Alla dhen. Dhen yamirooje e dhin sariyaaji no satti fota, e maanaa: «Wadhu dhun dhoo, wadhaa dhun dhaa.» Ka haqiiqa, neddho woo neddho timminta tigi muydhe Alla dhen maa humpitoo fii majje no laabhiri, bhayru yimbhe bhen ko junuubankeebhe e majjubhe. Barki wonanii Alla, on jattindho en bhittere sariya Muusaa on e dolle mun teddudhe, o imminani en Bhiddho makko yidhaadho on fii andingol en muydhe makko dhen. O landaaki en yo en huuwu goddhun fii no weltiniren mo, dhun e tawde ko kanko woni huuwoowo on e okkoowo on e barkinoowo on. Ko kanko woni Tagudho on e Dandoowo on. O landaaki en yo en timmin sarti woo sarti fii no jabhiredhen, kono himo landii en yo en weebhitano sulfu makko on e yo en jabhu kuugal makko hisinayngal ngal. Ko kanko woni bhundu dokke dhen fow. Himo yhetti ahadi hollugol yimbhe bhen fow yurmeende, o barkina en o faaboo en. Si en yanii dhimmal hara en bonnii yamirooje dhen, o yaafanto en sabu sulfu makko on e giggol makko wondugol e yurmeende ngol. Hara on faamii muydhe Ben mon wondho on ka kammu? Huunde o landaaki on, kono himo dhabbhude no o barkinira on e no o hisinira on e no o hebbinira on bawgal Ruuhu-Seniidho makko on. Ben mon no faalaa okkude on ko o jeyi kon fow. Ko sendi kon diina e andugol tigi Baaba men hinaa samakala. Alla men on hinaa hippotoodho. Ko o jom yurmeende. Tippude e giggol makko ngol, o jattinii en dokinande nde hananodhen donkineede nden e kulol ngol wondunodhen e mun ngol. Ko dhun wadhi si hidhen dhabbha no dhoftoren muydhe makko dhen e fee anditangol mo telenma giggol makko yaajungol ngol. Hidhen gomdhini wondema Ruuhu-Seniidho makko on waawinay en teddingol yamirooje makko dhen. Sariya makko on wontanii en weltaare e ngurndan. Hidhen toroo kadi yo aduna on bhurtu nanditude e kammu ngun sabu dhoftagol muydhe Alla dhen. Aduna on wontii fayda jahannama, hakkee ko furtande Ibuliisa nden tiidhi. Hidhen toroo yo laabhubhe bhen wattite e mbaadi Iisaa-Almasiihu on ndin e nder ko bhe ittata kon hoore mabbhe sadaka e dhoftagol mabbhe. Kono non haa-jooni hidhen ka hoore leydi, yo innde Allaahu on barkinire sabu dhun, hinaa e ley mayri wondhen. Wano non, dhabbhen muydhe Baabaajo on, jokken dhe wondude e ballal Ruuhu makko on. TORAARE: Medhen sujjande ma, Yaa an Baaba, sabu a yedhii Bhiddho maa on bawgal fow ka kammu e ka leydi. Ko kanko woni Landho amen on, medhen sujjande ma. Hunnu muydhe maa dhen ka nder ngurndan amen wano malaa’ikaabhe bhen huuwirta non ebbhooje maa dhen. Hebbin men giggol maa ngol. Feenyu e yibbhe amen bhen e aybhe amen bhen fii no bhe hewtira ka kisiyee e no bhe jokkira tindinoore giggol maa ngol. LANDAL:
|